މާލޭ އުތުރު ބަނދަރު ބޭނުންކުރާ އޮޑިވެރިންނަށް ދިމާވާ މައްސަލަތައް ހައްލުކުރުމަށް މާލެ ސިޓީ މޭޔަރުގެ އިސް ނެންގެވުމާއެކު މަޝްވަރާ ބައްދަލުވުމެއް ބާއްވައިފި އެވެ.
މޯލްޑިވްސް ޕޯޓް ލިމިޓެޑް(އެމްޕީއެލް)ގައި މިއަދު މެންދުރު ބޭއްވި މި ބައްދަލުވުމަކީ ބަނދަރު ބޭނުންކުރާ އޮޑިވެރިންނަށް ދިމާވާ މައްސަލަތައް ހައްލުކުރުމަށް އެމްޕީއެލްގެ އެހީތެރިކަން ހޯދުމަށް އެކުންފުނީގެ ވެރިންނާ މަޝްވަރާކުރުމަށް ބޭއްވެވި ބައްދަލުވުމެކެވެ. މި ބައްދަލުވުމުގައި، އެމްޕީއެލްގެ ސީއީއޯ މުޙައްމަދު ރިޝްވާންއާއި އެކުންފުނީގެ އިސްވެރިން ބައިވެރިވަޑައިގެންނެވި އެވެ. މި ބައްދަލުވުމަށް މޭޔަރ އާދަމް އާޒިމް ވަޑައިގެންނެވީ، މާލޭ އުތުރު ބަނދަރު ބޭނުންކުރަމުން އަންނަ ބައެއް މަސްވެރި އޮޑިފަހަރާއި، މުދާ އުފުލާ އޮޑިފަހަރުގެ ވެރިންގެ އިތުރުން ކެޔޮޅުންނާއި މީޑިއާ ހިމެނޭ ޓީމަކާއެކުގަ އެވެ. މޭޔަރާއެކު މި ބައްދަލުވުމުގައި، ހުޅުމާލެ ދާއިރާގެ ކައުންސިލަރު އަލީ އައިމަން އާއި ގަލޮޅު އުތުރު ދާއިރާގެ ކައުންސިލަރ މަރިޔަމް ރީހާން ނާޡިމްވެސް ބައިވެރިވެވަޑައިގެންނެވި އެެވެ.
މި ބައްދަލުވުމުގައި މޭޔަރުވަނީ ބަނދަރު ބޭނުންކުރާ ފަރާތްތަކަށް ކުރިމަތިވަމުން އަންނަ ތަކްލީފްތައް ބަޔާންކުރައްވައި އެކަންކަން ހައްލުކުރުމުގައި ސިޓީ ކައުންސިލަށް ކުރިމަތިވަމުން އަންނަ ގޮންޖެހުންތައް ފާހަގަކުރައްވާފަ އެވެ. އަދި އެކަންކަން ހައްލުކުުރުމަށް އެމްޕީއެލްއަށް އެހީތެރިވެވިދާނެގޮތްތައް މޭޔަރު ވަރަށް ސަރީހަ އިބާރާތުން ބަޔާންކޮށްދެއްވި އެވެ. އަދި، އަތޮޅުތެރެއިން މުދާ ހިފައިގެން އަންނަ އޮޑިފަހަރަށް އެއްގަމަށް މުދާ ބޭލުމަށާއި އަލުން ބަރުކުރުމަށް ގާތްކުރަން ޖާގަ ހޯދުމަށް ދިމާވެފައިވާ މައްސަލަ ވަކީން ޚާއްސަގޮތެއްގައި ފާހަގަކުރެއްވި އެވެ.
މޭޔަރުގެ ވާހަކަފުޅު އަޑު އެއްސެވުމަށްފަހު އެމްޕީއެލްގެ ސީއީއޯ ރިޝްވާން ވިދާޅުވީ، ބަނދަރު ބޭނުންކުރުމުގައި އޮޑިވެރިންނަށް ކުރިމަތިވަމުން އަންނަ މައްސަލަތައް ހައްލުކުރެއްވުމުގައި އެމްޕީއެލްއިން ސިޓީ ކައުންސިލަށް ފުރިހަމަ އެއްބާރުލުން ދެއްވަން ބޭނުންފުޅުވާ ކަމަށެވެ. އަދި، ބަނދަރު ބޭނުންކުރުމުގައި މިހާރު ހުރި ގޮންޖެހުންތަކަށް މިވަގުތަށް ދާއިމީ ހައްލެއް ނުގެނެވުނު ނަމަވެސް، މި ވަގުތުން މިވަގުތަށް ގެނެވޭނެ ހައްލުތަކަކަށް މިއަދުން ފެށިގެން އެމްޕީއެލްއިން މަސައްކަތްކުރާނެކަމަށެވެ. އެގޮތުން ބަނދަރު ތޮތްޖެހޭ މައްސަލަ ހައްލުކުރުމަށް، ހުޅުމާލެ ބަނދަރުގައި އެމްޕީއެލްއިން ކަނޑައަޅާ ވަކި ވަގުތުތަކެއްގައި މުދާ އުފުލާ ބާލާ އުޅަނދުތަކަށް ބޭނުންކުރެވޭނެ އިންތިޒާމު ހަމަޖައްސަވާނެކަމަށް ވިދާޅުވިއެވެ. އަދި ކުރިޔަށް އޮތީ ރަމަޟާން މަސްކަމަށްވުމާއެކު، އެމަސް ނިމުމުން އެކަމުގެ ދާއިމީ ހައްލަކަށް ސިޓީ ކައުންސިލާ ވަރަށް ގާތުން މަސައްކަތްކުރައްވަމުން ގެންދަވާނެކަމުގެ ޔަގީންކަން ސީއީއޯ ދެއްވި އެވެ.
މި ބައްދަލުވުމުގައި އޮޑިވެރިންވެސް އެމީހުންނަށް ދިމާވާ ކަންތައްތަކާއި ކަންބޮޑުވުންތައް ހިއްސާކުރެއްވިއެވެ. އަދި އެކަންކަން ހައްލުކުރުމަށް ސިޓީ ކައުންސިލުންނާއި އެމްޕީއެލްއަށް ކުރެވިދާނެ ކަންތައްތަކުގެ ޚިޔާލާއި މަޝްވަރާ ހިއްސާކުރިއެވެ. މުދާ އުފުލާ އޮޑިވެރިން އެންމެ ބޮޑަށް ފާހަގަކުރީ ދިގު ދަތުރަކަށް ފަހު މާލެއަށްވަދެ ގާތްކުރަން ބަލާއިރު ފަޅުތެރެއިން މަގަތަށްވާގޮތަށް ޖާގަނުލިބޭ މައްސަލައާއި މުދާ ހުސްކުރަން ލިބޭ ވަގުތު ކުޑަވުމުގެ ވާހަކައެވެ. އަދި މިގޮތަށް ޖާގައާއި ވަގުތު ނުލިބުމުން، އޮޑިން ގެންނަ ހަލާކުވާ ޒާތުގެ މުދާ ނުބޭލި އެތައް ދުވަހެއްވެ ފަޅުތެރޭގައި އޮންނަން ޖެހޭކަން ފާހަގަކޮށް، ޖުމްލަ ގޮތެއްގައި އެއީ އެމީހުންނަށް ވިޔަފާރީގެ ގޮތުން ލިބޭ ވަރަށް ބޮޑު ގެއްލުމެއް ކަމަށް ބުންޏެވެ.
މިއަދުގެ މަޝްވަރާ ނިންމާލީ ކުރިޔަށް އޮތްތާނގައި އޮޑިވެރިންނަށް ލުއި ފަސޭހަކަމާއެކު ބަނދަރު ބޭނުންކުރެވޭނެ ގޮތްތަކަށް އެމްޕީއެލްއާއި ސިޓީ ކައުންސިލުން މަސައްކަތް ކުރިޔަށްގެންދާނެ ގޮތްތަކަކާމެދު ފުޅާ ދާއިރާއެއްގައި މަޝްވަރާކުރެއްވުމަށްފަހުގައެވެ. އެ މަޝްވަރާގައި އެމްޕީއެލްގެ ބަނދަރުތައް ބެލެހެއްޓުމާއި ގުޅޭ ސެކްޝަންތަކުގެ ވެރިންވެސް ކުރިޔަށް ކަންކަން ރާވާނެ ގޮތާއި ހައްލުކުރަން ގެންގުޅޭނެ އުސޫލުތަކެއް ހުށަހެޅުއްވިއެވެ. އަދި އެއް އަމާޒަކަމަށް ވާސިލުވުމަށް ދެ މުއައްސަސާ ގުޅިގެން މަސައްކަތްކުރުމަށް ކުރިޔަށް އޮތްތާނގައި ސިލްސިލާ ބައްދަލުވުންތަކެއް ބޭއްވުމަށްވެސް އެއްބަސްވިއެވެ.
ބައްދަލުވުން ނިންމާލުމަށްފަހު ކެޔޮޅާއާ ވާހަކަދެއްކި އޮޑިވެރިން ވަނީ އޮޑިވެރިންނަށް ކުރިމަތިވަމުން އަންނަ މައްސަލަތައް ހައްލުކުރުމުގައި މޭޔަރު ކުރައްވާ މަސައްކަތަށް ވަރަށް ބޮޑަށް ތައުރީފް ކުަރައްވާފައެވެ. ވަކީން ޚާއްސަކޮށް އެކަންކަން ވަރަށް ގާތުން ބަލައި، އޮޑިވެރިންނާ ވަރަށް ގާތުން މަސައްކަތްކުރައްވާތީ އެކަން ބަލައިގަނެެ މޭޔަރަށް ޝުކުރު އަދާކުރިއެވެ.