މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އިން މަސްވެރިން އަތުން މަސްގަތުމަށް ފަހު ފައިސާ ނުދައްކާތާ ތިން ހަފުތާ ވެއްޖެއެވެ.
އެންމެ ފަހުން މިފްކޯއިން މަސްވެރިންނަށް ފައިސާ ދޫކޮށްފައި ވަނީ، މިމަހުގެ 11 ވަނަ ދުވަހު އެވެ. އެދުވަހު މިފްކޯއިން ފައިސާދޫކޮށްފައިވަނީ، 27 ޖުލައި އިން 8 އޯގަސްޓުގެ ނިޔަލަށް މަސްވެރިން މިފްކޯއަށް ވިއްކި 266 މެޓްރިކް ޓަނުގެ މަހަށްވާ 4.2 މިލިއަން ރުފިޔާ އެވެ. އޭގެ ފަހުން ތިން ހަފްތާއަށް މަސްކިރުވައި މަސްވެރިންނަށް ބިލު ހަވާލުކޮށްފައިވާއިރު، އެ ބިލުތަކަށް 10 މިލިއަން ރުފިޔާ އަރައެވެ.
މަސްވެރިން ތިބީ މިކަމާ ވަރަށް ހިތްހަމަ ނުޖެހިފަ އެވެ. މަސްވެރިން ބުނީ ސަރުކާރުންވެސް އަދި މިފްކޯއިން ބުނާ އެއްޗެއް މިހާރު ގަބޫލުކުރަން ބޭނުން ނުވާކަމަށެވެ.
”އެމީހުން އެދައްކަނީ ދެކޮޅު ނުޖެހޭ ވާހަކަ. ފުރަތަމަ ބުނީ 48 ގަޑިއިރޭ، އެ ބަދަލުވީ 24 ގަޑީއިރަށް. އެވަރުންވެެސް ނުވި. ފަހުން 2 ހަފުތާއިން ފައިސާ ދޫކުރަން ބުނެފަ މާގިނަ ދުވަހަކު އެކަމެއްވެސް ނުވި. މިހާރު ތިން ހަފުތާ މިވީ ލާރިކޮޅެއް ނުދޭތާ. އަހަރުންވެސް ދިރިތިބޭނީ ކައިގެން ބޮވެގެން ދޯ؟ މަސް ނިމުނީ އެކި ދިމަދިމާއިން ނޯޓިސްތައް އަންނަނީ، ބިލުތައް ޖޫރިމަނާ ވަނީ.“ މަސްވެރިއަކު ބުންޏެވެ.
މިފްކޯއިން ގަވައިދުން ބިލުތަކަށް ފައިސާ ނުދައްކާތީ އޮޑި ފަހަރުތަކަށް ބަރާބަރަށް މަހަށް ނުކުންނަންވެސް މިހާރު ވަނީ ގޮންޖެހުންތަކާ ކުރިމަތިވެފަ އެވެ. އޮޑިވެރިޔަކު ބުނީ، މިފްކޯއިން ފައިސާ ދޫކުރާއިރު އޮޑީގެ ޚަރަދަށް ކަނޑާފައި ބާކީ ބައި މަސްވެރިންނަށާއި ފަޅުވެރިންގެ މައްޗަށް ބަހާލީމައި ޖެހެނީ ކުޑަ މިންވަރެއް ކަމަށެެވެ. އަދި އެލިބޭ އެތިކޮޅުން ދެކޮޅު ނުޖެހޭކަމަށެވެ. އަދި މި މައްސަލައިގައި މަސްވެރިން އޮޑިން ފޭބުމާއި، އަދި އެހެން ދޯނިތަކަށް ބަދަލުވުމަކީވެސް މިހާރު އޮޑިވެރިންނަށް ދިމާވެފައިވާ ވަރަށް ބޮޑު ގޮންޖެހުމެއްގެ ގޮތުގައި ފާހަގަކުރެ އެވެ.
”ހަގީގަތަށް ބުންނަންޏާ އަސްލު ދެކޮޅު ނުޖެހޭ. މަހަށް ފުރަން ތެޔޮ އަޅަންޖެހޭ. ފަޅުވެރިންނަށް ކާންބޯތަކެތި ގަންނަން ޖެހޭ. ދޯނީގެ މައިންޓެނަންސް ކުރަން ޖެހޭ. ބައެއް ފަހަރު ދަތުރެއް މި ނިންމާލަން ޖެހެނީ އެއްވެސް ފައިދާއެއްނެތި. ދެން މިފްކޯއަށް ކިރާ މަހަށް އެ މީހުން އެބުނާ މުއްދަތުގައި ލާރި ދޭނަމަ ކޮންމެވެސް ގޮތެއް ހަދާ ލެވުނީސް. މިފްކޯއިން ފައިސާ ދިނީމައި، ޚަރަދަށް ކަނޑާލާފައި މިއޮންނަނީ ސުމެއް. ކިރިޔާ އަނެއް ދަތުރަށް ތައްޔާރުވާވަރު ވަނީ.“ އޮޑިވެރިޔަކު ބުންޏެވެ.
މީގެ ކުރިން އޮޑި ފަހަރުގައި ގިނަ ޒުވާނުންތަކެއް މަހަށް ދިޔައެވެ. އެހެންނަމަވެސް ވަރަށް ގިނަ ޒުވާނުން މިހާރު ދަނީ އޮޑިތަކުން ފައިބަމުންނެވެ. ސަބަބެއް ކަމުގައި އެމީހުން ބުނަނީ ދިރިއުޅުމުގެ ކަންކަމަށް ބޭނުންވާ ވަރަށް ފައިސާ ނުލިބި ދަރަނިވެރިވުމެވެ.
”އަހަރުމެންގެވެސް އާއިލާއެއް އެބައޮތް. ޒިންމާތަކެއް އެބައޮތް. އެޓްލީސްޓް އަމިއްލައަށް ކޮފީތައްޓެއްވެސް ބޯލެވޭވަރު ނުވޭ. އަހަރެން މިހާރު އަމިއްލަ ތަނެއްގެ ވަޒފާއަށް ދަނީ.މަސް ނިމުނީމައި މުސާރަ ލިބޭ. އެހެންވީމައި އަހަރެން އޯކޭ. އެކަމު ރަށްޓެހިން އަބަދު ޝަކުވާ ކުރާ އަޑު އަހަންވީމައި ހަމަ ވަރަށް ހިތްދަތި.“ ޒުވާން މަސްވެރިއަކު ބުންޏެވެ.
މަސްވެރިންނާއި ކެޔޮޅުން ބުނީ، މިފްކޯއިން ބިލުތަކަށް ފައިސާ ދެއްކުމުގައި ލަސްވުމާއި އަދި، މަސް ގަންނަ އަގަށް ފަހުން ގެނައި ބަދަލާއި ގުޅިގެން މިހާރު މިފްކޯއަށް މަސްްކިރަން ބޭނުންނުވާކަމަށެވެ. ޕްރައިވެޓް ކުންފުނިތަކުން މިހާރު މިފްކޯއަށްވުރެ ބޮޑު އަގުގައި މަސް ގަންނާތީ މަސްކިރަން ބޭނުންވަނީ އެ ކުންފުނިތަކަށް ކަމަށްވެސް އެމީހުން ބުންޏެވެ.
”މިހާރު މިފްކޯއަށް މަސްކިރާކަށް މަޑެއް ނުކުރަން. ހޮރައިޒަން އިން އެބަގަނޭ މިފްކޯއަށް ވުރެ 2 ރުފިޔާ 3 ރުފިޔާ އަގުބޮޑުކޮށް. ދެން މަސް ބާނައިގެން ކައިރި ރަށްރަށުގެ ބަނދަރަށް ވަދެ މަސްކޮޅު މިވިއްކާލަނީ. އޭރުން ވަގުތުން ފައިސާ އަތައް އަރާ. މަޑުކުރާކަށް ނުޖެހޭ.“ ކެޔޮޅަކު ބުންޏެވެ.
މަސްވެރިންނާއި އޮޑިވެރިންގެ ޝަކުވާތައް މިއަދު މިފްކޯއާ ހިއްސާކޮށްލުމުން، އެ ކުންފުނިން ބުނީ، ފައިސާ ނުދެއްކިގެން އުޅެނީ މިފްކޯގެ މަސްކިރާ މިންވަރު ދައްކަމުން ލިބޭ ވިޔަފާރި ފައިދާ ދަށްކަމުން ކަމަށެވެ. އަދި ފިނޭންސް މިނިސްޓްރީން މިހާރު ފަންޑް ހޯދުުގެ މަސައްކަތް ކުރަމުން އަންނަކަމަށެވެ. އަދި ފަންޑް ލިބުނުހާ އަވަހަކަށް މަސްވެރިންގެ ފައިސާ ދައްކާނެކަމަށެވެ. މިފްކޯއިން ބުނީ، މަސްވެރިންގެ ހާލަތު ވަޒަން ކުރެވޭ ކަމަށާއި، މާލީ ހާލަތު ދަށްނަމަވެސް، މަސްވެރިންގެ ބިލުތަކަށް ފައިސާ ދެއްކޭނެ އިންތިޒާމުތަކެއް ހަމަޖައްސަން މަސައްކަތްކުރާނެކަމަށެވެ.
މިހާރު ބެކްލޮގްގައި ހުރީ، 9 އޯގަސްޓުން ފެށިގެން 30 އޯގަސްޓުގެ ނިޔަލަށް ކިރި މަހަށްވާ 10 މިލިއަން ރުފިޔާ އެވެ.
ނޯޓް: އޮޑިވެރިންނާއި، ކެޔޮޅުންނާއި މަސްވެރިންގެ ނަން ހާމަކޮށްފައި ނުވަނީ މަސްލަހަތައްޓަކަ އެވެ.