”ދިވެހިރާއްޖޭގެ ހިބަރުގެ މަސްވެރިކަން މެނޭޖްކުރުމުގެ ޕްލޭން“ އަކީ ދިވެހިރާއްޖޭގައި ހިބަރުގެ މަސްވެރިކަން ބެލެހެއްޓުމުގައި މަގުދައްކައިދޭ މައިގަނޑު އަސާސްއެވެ. ދިވެހިރާއްޖޭގައި ހިންގާ ހިބަރުގެ އާބާދީއަށް އަސަރުކުރާނެ ހުރިހާކަމަށް މި ޕްލޭން ހިނގާނެއެވެ. އޭގެ ތެރޭގައި ހިބަރު ބޭނުމާއި، ޕްރޮސެސްކުރުމާއި، ރައްކާކުރުމާއި، ގަނެ ވިއްކުމާއި ދިވެހިރާއްޖެއިން ހިބަރުގެ އުފެއްދުންތައް އެކްސްޕޯޓްކުރުން ހިމެނެއެވެ. އަދި މި ހަރަކާތްތަކުގައި ބައިވެރިވާ އަދި މި ހަރަކާތްތަކާއި ގުޅުންހުރި ތަންތަނަށްވެސް މި ޕްލޭން ހިނގާނެއެވެ.
މި މެނޭޖްމަންޓް ޕްލޭނަކީ، ދިވެހިރާއްޖޭގެ މަސްވެރިކަމުގެ ޤާނޫނުގެ 18 ވަނަ މާއްދާގެ ދަށުން ހަދައިފައިވާ، އެޤާނޫނުގެ 17 ވަނަ މާއްދާގެ (ހ) ގެ 4 ވަނަ ނަންބަރުގައި ބަޔާންކޮށްފައިވާ މަސްވެރިކަން ރާވައި، ހިންގައި، ބެލެހެއްޓުމުގެ ޕްލޭނެވެ.
ޕްލޭންގެ މައިގަނޑު މަގުސަދުތައް:
- ދިވެހިރާއްޖޭގެ ހިބަރުގެ މަސްވެރިކަން މެނޭޖްކުރުމަށް ހަރުދަނާ ފިޔަވަޅުތަކެއް ކަނޑައެޅުމާއި، އެ ފިޔަވަޅުތަކަކީ ދިވެހިރާއްޖެއިން ބައިވެރިވާ މަސްވެރިކަން ރާވައި، ހިންގައި ބެލެހެއްޓުމާގުޅޭ ސަރަޙައްދީ ޖަމްޢިއްޔާތަކުން ކަނޑައަޅައިފައިވާ މިންގަނޑުތަކާ އެއްހަމަ ކުރެވިފައިވާ ފިޔަވަޅުތަކަށް ހެދުން؛
- ހިބަރުގެ މަސްވެރިކަން ރާވައި، ހިންގުމުގެ އިންތިޒާމެއް ޤާއިމުކޮށް، ޒިންމާދާރު ގޮތެއްގައި ހިބަރުގެ މަސްވެރިކަން ބަލަހައްޓައި މި މަސްވެރިކަމުގެ ފައިދާ ދިގު މުއްދަތަކަށް ދިވެހި ރައްޔިތުންނަށް ލިއްބައިދިނުން؛ އަދި
- ހިބަރުގެ މަސްވެރިކަމާއި ވިޔަފާރި، ދެމެހެއްޓެނިވި ގޮތެއްގައި ތަރައްޤީކުރުމުގައި ޝާމިލްވާ ދައުލަތުގެ އިދާރާތަކާއި އެންމެހައި މަޞްލަޙަތުވެރިންނަށް މަގުދައްކައިދިނުން.
މި ޕްލޭންގެ ދަށުން މެނޭޖްކުރާނެ ބާވަތްތަކަކީ، ތިރީގައިވާ ބާވަތްތައް ހިމެނޭގޮތުން ރާއްޖޭގައި ބާނާ އެންމެހާ ބާވަތެއްގެ ހިބަރާއި އެ ބާވަތްތަކަށް އަމާޒުކޮށް ކުރެވޭ މަސްވެރިކަމުގައި ބާނާ ބާވަތްތައް ފިޔަވައި، ހިފޭ، ބޭނޭ ނުވަތަ ނެގޭ ކަނޑުގެ އެހެނިހެން ދިރުންތަކެވެ.
- ފަންގަނޑު ހިބަރު
- ތުންގަނޑު ހިބަރު
- ކަޅު މަސްހިބަރު
- ނޫ މަސްހިބަރު
- ގަޅިޖެހި ހިބަރު
މި ޕްލޭންގެ ދަށުން ހިބަރުގެ މަސްވެރިކަމާއި، މަސްވެރިކަމުގެ ވިޔަފާރީގެ ހަރަކާތްތައް ހަރުދަނާ ނިޒާމެއްގެ ތެރެއިން މޮނިޓަރ ކުރުމަށްޓަކާ ހިބަރުގެ މަސްވެރިކަން ކުރާ އުޅަނދުފަހަރާއި ވިޔަފާރި ބޭނުމަށް ހިބަރު ޕްރޮސެސްކުރުމުގައި ހަރަކާތްތެރިވާ ފަރާތްތަށް ލައިސަންސްކުރުމަށް ވަނީ ނިންމާފައެވެ. އަދި، ހިބަރުގެ ސްޓޮކް މެނޭޖްކުރުމަށްޓަކާ ކޮންމެހެން ފިޔަވަޅުއަޅަން ޖެހިއްޖެ ހާލަތެއްގައި އެކަންކުރުމަށްވެސް ވަނީ ނިންމާފައެވެ. މިގޮތުން އެޅުމަށް ނިންމާފައިވާ ފިޔަވަޅުތަކުގެ ތެރޭގައި ވަކި ސަރަހައްދަކުން ހިބަރު ހިފުން މަނާކުރުމާއި ވަކި ބާވަތެއް ހިފުން ނުވަތަ ޕްރޮސެސްކުރުން މަނާކުރުން ހިމެނެއެވެ. އަދި އެކްސްޕޯޓް ކުރެވޭ ހިބަރުގެ ބާވަތްތަކުގެ ކޯޓާއެއް ކަނޑައަޅާ ތަންފީޒުކުރުމާއި އަދި މީގެ އިތުރުންވެސް ހިބަރުގެ ސްޓޮކަށް އަސަރުކޮށްފާނެ ހަރަކާތްތަކާ ގުޅޭގޮތުން އެހެނިހެން ފިޔަވަޅު އެޅުން މިޕްލޭންގައި ހިމެނެއެވެ.
މި ޕްލޭނަށް އަމަލުކުރަން ފަށާފައިވަނީ ޑިސެންބަރު 2020 ގަ އެވެ. މި ޕްލޭންއަށް އަމަލުކުރަން ފެށުމާއެކު ހިބަރުގެ ތިރީ ތުންގަނޑު ފެށޭ ހިސާބުން ފެށިގެން ނިގޫ ފަތްގަނޑު ދެކަފިވާ ހިސާބަށް 60 ސެންޓިމީޓަރު ހަމަނުވާ ހިބަރު ބޭނުން ވަނީ މަނާކޮށްފަ އެވެ.