ވަޒީރުންނާ ސީދާ ސުވާލުކުރުމަށް ފުރުޞަތު ހުޅުވާލައިގެން ބާއްވާ އާންމު ފޯރަމް ”އަހާ“ ގައި ފިޝަރީޒް މިނިސްޓަރު އަހްމަދު ޝިޔާމް ބައިވެރިވެވަޑައިގަންނަވާނެއެވެ.
އާންމުންނަށް އެތަނަށް ވަޑައިގެން ބައިވެރިވެވޭގޮތަށް އަދި ފޯރަމް ހިނގަމުންދާ ވަގުތު ސޯޝަލްމީޑިޔާގެ ވަސީލަތްތައް މެދުވެރިކޮށްވެސް ބައިވެރިވެވޭ ގޮތަށް ހުޅުވާލެވިގެން ކުރިއަށްދާ މި ފޯރަމަކީ ރައީސުލްޖުމްހޫރިއްޔާގެ އޮފީހާއި ޕަބްލިކް ސަރވިސް މީޑިޔާ (ޕީއެސްއެމް) ގުޅިގެން ބާއްވާ ފޯރަމެކެވެ.
ފޯރަމް އޮންނާނީ ހޯމަ ދުވަހުގެ ރޭ 08:30 ގަ އެވެ. މަސްވެރިންނަށް އެތަނަށް ގޮސްގެންވެސް ސުވާލު ކުރެވޭނެއެވެ. އަދި ނުދެވޭނެމަ ކުރަން ބޭނުންވާ ސުވާލު މެސެޖުވެސް ކޮށްލެވޭނެއެވެ. ސުވާލު ކުރުމަށް އޭއެޗް ޖަހާފަ، ހުސަތަންކޮޅެއް ދޫކުރުމަށް ފަހު، ބޭނުންވާ ސުވާލު ލިޔުމަށްފަހު 300 އަށް އެސްއެމްއެސް ފޮނުވާށެވެ.
ފިޝަރީޒް މިނިސްޓަރު އަހްމަދު ޝިޔާމްގެ އިތުރުން، ހޯމް މިނިސްޓަރު އަލީ އިހުސާންއާއި، މަތީ ތައުލީމާއި ބެހޭ މިނިސްޓަރު މަރިޔަމް މާރިއާ އާއި، ސިވިލްއޭވިއެޝަން މިނިސްޓަރު މުހައްމަދު އަމީން އާއި ޔޫތު މިނިސްޓަރު މުހައްމަދު އިބްރާހިމް ވަހީދު(އަޝްވާޑް) މި ފޯރަމްގައި ބައިވެރިވަޑައިގަތުމަށްވަނީ ހަމަޖެހިފަ އެވެ.
މި ފޯރަމަކީ، ސަރުކާރުން ކުރިއަށް ގެންދާ މަސައްކަތްތަކާ ބެހޭ މަޢުލޫމާތު ވަޒީރުންގެ ފަރާތުން ރައްޔިތުންނަށް ދެއްވުމަށާއި، ރައްޔިތުންގެ ސުވާލުތަކަށް ސީދާ ވަޒީރުން ޖަވާބު ދެއްވުމަށް ފުރުޞަތު ދިނުމުގެ ގޮތުން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިއުލާނު ކުރައްވައިގެން ކުރިޔަށް ގެންދަވާ ފޯރަމެކެވެ.
މިކަމަކީ ރައީސުލްޖުމްހޫރިއްޔާގެ ރިޔާސީ ވަޢުދުފުޅެއްގެ އިތުރުން، އެމަނިކުފާނުގެ ސަރުކާރުން ވީހާވެސް ރައްޔިތުންނާ ގާތުން މަސައްކަތް ކުރެއްވުމަށާއި، ވީހާވެސް ހާމަކަން ބޮޑު ގޮތެއްގައި ސަރުކާރުގެ މަސައްކަތްތައް ކުރިއަށް ގެންދިއުމަށް ބާރު އެޅުއްވުމުގެ ގޮތުން ކުރައްވާ މަސައްކަތްޕުޅެކެވެ.