އިއްޔެ މަޑުއްވަރީ ފަރިހި-2 ދޯނިން މަހަށްދިޔަ ތިން މީހުން ހޯދައިފި އެވެ.
ކެޔޮޅާއަށް މައުލޫމާތު ދެމުން ދޯނީގެ ވެރިފަރާތްކަމުގައިވާ އިބްރާހިމް ފައިސަލް ވިދާޅުވީ، އެމްއެންޑީއެފް ކޯސްޓްގާޑް މެރިޓައިމް ރެސްކިއު ކޯޑިނޭޝަން ސެންޓަރުން އެމީހުންނާއި، ދޯނި ފެނުނުކަމުގެ އުފާވެރި ޚަބަރު ހިއްސާކުރިކަމަށެވެ.
”ދެންމެ ގުޅާފަ ބުނެފި ޢެމީހުން ފެނިއްޖެޔޭ. ތިން މީހުންގެ ހާލުވެސް ރަނގަޅުަކަމަށް ބުނީ. ޝަހީދު އަލީ މިހާރު ދަތުރުކުރަނިއްޔޭ. އިތުރު ތަފްސީލުދޭން ފަހުން ގުޅާނެކަމަށް އެމީހުން ބުނީ.“ އިބްރާހިމް ބުންޏެވެ.
އެމްއެންޑީއެފް އިން މީގެ އިރުކޮޅެއް ކުރިން ބުނެފައިވަނީ، ގެއްލުނު ދޯނި ހޯދުމަށް އެމްއެންޑީއެފް އެއަރ ކޯރގެ ޢަސްކަރީ ޔޫއޭވީ އާއި އެމްއެންޑީއެފް ކޯސްޓްގާޑުގެ އުޅަނދުފަހަރު ބޭނުންކޮށްގެން ކަނޑާއި ވައިގެ މަގުން އެމްއެންޑީއެފުން ކުރަމުންދިޔަ މަސަައްކަތުން ދޯނި ހޯދާފައިވާކަމަށެވެ. އަދި، ދޯނި ފެނުނީ މ. ރަތްމަންދޫގެ 23 ނޯޓިކަލް މޭލު ބޭރުން އިންޖީނު ހުއްޓިފަައިވަނިކޮށްކަމަށް ހާމަކޮށްފައި ވެއެވެ.
ޑައިވިންގް އެކްސްކާޝަންތަަކަށް ބޭނުންކުރަމުން އަންނަ ފަރިހި-2 ދޯނީގައި ތިން މީހަކު ފަރުމަސް ބާނަން ދަތުުރުފެށީ އިއްޔެ ހަވީރު 4 ޖަހާ އެހާކަންހާއިރު އެވެ. އެމީހުން އެނބުރި އަންނަން ބުނި ގަޑިއަށް ނައިސްގެން ގުޅާ ގުޅާ ޚަބަރެއް ނުވެގެން ބޯޓުގެ ވެރި ފަރާތުން ފުލުހަށް ރިޕޯޓްކުރީ ރޭ 22:06 އެހާކަންހާއިރު އެވެ. ހާދިސާގެ މަޢުލޫމާތު ލިބުމުން މ. އަތޮޅު ފުލުހުންގެ ލޯންޗުން، ދޯންނާއި މީހުން ހޯދުމުގެ މަސައްކަތް ފަށައި އެމްއެންޑީއެފް ކޯސްޓްގާޑާވެސް އެ ޚަބަރު ހިއްސާކުރި އެވެ.
އެ ޚަބަރު ލިބުމާއެކު، އެމްއެންޑީއެފް ސެންޓްރަލް އޭރިއާ ކޮމާންޑް، ކޯސްޓްގާޑް ތާޑް ސްކޮޑްރަންއިން، އެ ދޯނި ހޯދުމުގެ މަސައްކަތް ފެށިއެވެ. މ. މުލީގައި އޮންނަ ”ކޯސްޓްގާޑް ހާބަރ ކްރާފްޓް 114“ އިން ދޯނި ހޯދުމުގެ މަސައްކަތް ފެށީ ރޭ 23:20 ގަ އެވެ. އަދި، ދަންވަރު 2 ޖަހާއެހާކަންހާއިރު، އެމްއެންޑީއެފް ވައިގެ ބާރުން އެ ދޯނި ހޯދުމަށްޓަކައި ”ޔޫއޭވީ“ ޑްރޯންވެސް ބޭނުންކުރަން ފެށި އެވެ. އަދި މިއަދު މެންދުރުފަހު އޮޕަރޭޝަން އިތުރަށް ފުޅާކޮށް، ކޯސްޓްގާޑް ޝިޕް ޝަހީދު ޢަލީ ވެސް ހަރަކާތްތެރިވާން ފެށިއެވެ.