މަޑުއްވަރީ ފަރިހި-2 ދޯނިން ފަރުމަސް ބާނަން ދިޔަ މީހުންގެ ޚަބަރެއް އަދިވެސް ނުވާކަމަށް ދޯނީގެ ވެރިފަރާތްކަމަށްވާ އިބްރާހިމް ފައިސަލް ބުނެފި އެވެ.
ގެއްލިގެން ހޯދަމުން ދަނީ މ .ރަތްމަންދޫ ބޭރުން ފަރުމަސް ބާނަން ނުކުތް މަޑުއްވަރީ ފަރިހި-2 ދޯންޏެވެ. ހުކުރު ދުވަހު ހަވީރު އޭގެއިން މަހަށް ދިޔައީ މާފުށްޓަށް ނިސްބަތްވާ ތިން މީހުންނެވެ. މި ތިން މީހުންނަކީވެސް އިބްރާހިމްގެ ގާތް ރަށްޓެހިންނެވެ. އެމީހުން މަހަށް ދާން ދޯނި ދިނީވެސް އޮންނަ ގާތްކަމުން ކަމަށް އިބްރާހިމް ބުންޏެވެ.
ހުކުރު ދުވަހު އަސުރުން ފައިބައިގެން މަހަށް ދިޔައީ ރޭގަނޑު 8 ޖަހާލާއިރު އެނބުރި އަންނާނެކަމަށް ބުނެފައެވެ. އެހެންނަމަވެސް 8 ޖަހާ ބޮޑުވިފަހުންވެސް އެމީހުންގެ ޚަބަރެއް ނުވާތީ އިބްރާހިމް އެމްއެންޑީއެފް ކޯސްޓްގާޑާށާއި ފުލުހުންނާ މައުލޫމާތު ހިއްސާކުރިއެވެ.
މިކަމާއި ގުޅޭގޮތުން ފުލުހުން ބުނީ، ދޯނީގެ ޚަބަރެއްނުވެ ވީނުވީއެއް ނޭނގި ގެއްލިފައިވާކަމުގެ މަޢުލޫމާތު ހުކުރު ދުވަހުގެ 22:06 އެހާކަންހާއިރު ލިބުނުކަމަށެވެ. އަދި، ހާދިސާގެ މަޢުލޫމާތު ފުލުހުންނަށް ލިބުމާއެކު މ. އަތޮޅު ފުލުހުންގެ ލޯންޗުން، ދޯންނާއި މީހުން ހޯދުމުގެ މަސައްކަތުގައި ހަރަކާތްތެރިވަމުންއަންނަ ކަމަށާއި، ހާދިސާގެ މަޢުލޫމާތު އެމް.އެން.ޑީ.އެފް އާ ވެސް ހިއްސާކުރިކަމަށެވެ.
ދޯންޏާއި އެ މީހުންނާ ބެހޭ އެއްވެސް މަޢުލޫމާތެއް ލިބިފައިވާނަމަ ފުލުހުންގެ އެމަރޖެންސީ ނަންބަރު 119 އަށް ނުވަތަ ކޯސްޓްގާރޑަށް ގުޅައި މަޢުލޫމާތު ހިއްސާކުރުމަށް ފުލުހުން ވަނީ އެދިފަ އެވެ.
އެމްއެންޑީއެފް ސެންޓްރަލް އޭރިއާ ކޮމާންޑް، ކޯސްޓްގާޑް ތާޑް ސްކޮޑްރަންއިން، ވެސް މިހާރު ވަނީ އެ ދޯނި ހޯދުމުގެ މަސައްކަތް ފަށާފައެވެ. ކޯސްޓްގާޑުގެ ދެ އުޅަނދެއް ދޯނި ހޯދުމުގެ މަސައްކަތުގައި ހަރަކާތްތެރިވަމުން އަންނަކަމަށް ޚަބަރުލިބިފައި ވެއެވެ.
ގެއްލިގެން ހޯދަމުންދަނީ ޑައިވިންގް އެކްސްކާޝަންއަށް ބޭނުންކުރަމުން އަންނަ 20 މީހުންގެ ޖާގައިގެ ދޯންޏެކެވެ. އިބްރާހިމް ބުނީ ރަށްޓެހިންނާއި އަދި އެހެން މީހުންވެސް ސްޕޯޓްސް ފިޝިންގެ ނޫނީ ފަރުމަސްވެރިކަމަށް ދާން ދޯނި ބޭނުންވެގެން ބުނާ ފަހަރުތަކުގައި ދޯނި ދެމުން އަންނަކަމަށެވެ.
ސަމާލުކަމަށް: ގެއްލިގެން ހޯދަމުންދާ ދޯޏްނަކީ، ކ. މާފުށީ ޒުވާން ވިޔަފާރިވެރިޔާ އާސިމް މުހައްމަދުފުޅު (ސިމްބެ) އަތުން މަޑުއްވަރީ އިބްރާހިމް ފައިސަލް ގަނެފައިވާ ދޯންޏެކެވެ. އެހެންނަމަވެސް އަދި ރަޖިސްޓްރީ އޮތީ އިބްރާހިމްގެ ނަމަށް ބަދަލުނުކޮށެވެ. މި ހާދިސާ އާއި ގުޅިގެން ފުލުހަށާއި، އެމްއެންޑީއެފްއަށް ރިޕޯޓްކުރިއިރުވެސް އެ ވާހަކަ ފާހަގަކޮށްފައިވާނެކަމަށް އިބްރާހިމް މައުލޫމާތު ދީފައި ވެއެވެ.