މަސްވެރިން މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އަށް މަސްވިއްކި ބައެއް ބިލުތަކަށް އެކުންފުނިން ފައިސާ ދައްކައިފި އެވެ.
މިއަދު މިފްކޯގެ ރަސްމީ އެކްސް އެކައުންޓުގައި ހާމަކޮށްފައިވާ ގޮތުގައި، މަސްދޯނިފަހަރަށް ދޫކުރާ ފައިސާގެ ތެރެއިން 09 އޭޕްރިލް 2024 ގެ ނިޔަލަށް ހުރި ބިލުތަކުގެ ފައިސާ މިހާރުވަނީ ދައްކާ ނިންމާފަ އެވެ. މިފްކޯއިން އަދިވެސް މަސްވެރިންނަށް ދައްކަން ޖެހޭ ފައިސާގެ ހަފުތާއެއްގެ ”ބެކްލޮގް“ އެބަަޮތެވެ. އެ ފައިސާ ދައްކާނެގޮތުގެ ތަފުސީލެއް މިފްކޯއިން ހާމަކޮށްފައެއް ނުވެއެވެ.
މަސްވެރިން މަސް ކިރާތާ 48 ގަޑިއިރުތެރޭގައި އެ ބިލުތަކަށް ފައިސާ ދައްކަން ރައީސް، ޑރ މުއިއްޒު ވައުދުވެވަޑައިގެންނެވިނަމަވެސް، ވެރިކަމާއި ހަވާލުވެވަޑައިގެންނެވިތާ ފަސްވަނަ މަސް ގުނަމުންދާއިރުވެސް، އަދިވެސް އެ ވައުދުފުޅެއް ނުފުއްދެވެއެވެ. ސަރުކާރުން ބުނަނީ ދައުލަތުގެ މާލީ ހާލަތު ހުރިގޮތުން އެކަން އެގޮތަށް ނުވަނީ ކަމަށެވެ. އަދި މިފްކޯ ބަނގްރޫޓްވަމުން އަންނާތީ އެތަން ރީ ސްޓްރަކްޗަރ ކުރަމުން އަންނަކަމަށެވެ. އެހެންނަމަވެސް މަސްވެރިން މިފްކޯއަށް ވިއްކާ މަސް ބަރާބަރަށް އެކްސްޕޯޓްކޮށް ދައުލަތުގެ މާލިއްޔާއަށް ބޮޑު އަދަދުން ޑޮލަރު ވަންނަމުންދާކަން އެމްއެމްއޭ އަދި މޯލްޑިވްސްގެ ކަސްޓަމްސްގެ ތަފާސް ހިސާބުތަކުން ދައްކައެވެ.
މަސްވެރިންނަށް ބަރާބަަރަށް ފައިސާ ދެމުން ނުދިޔަ ކަމުގައިވިޔަސް ދައުލަތުގެ އެހެން ޚަރަދުތައް ބަރާބަރަށް ދަނީ ކުރަމުންނެވެ. ޚަރަދު ކުޑަކުރަން ފިނޭންސްއިން އެންގިކަމުގައިވީ ނަމަވެސް މަސްވެރިންނަށް ފައިސާ ދިނުން ފިޔަވައި އެހެން ޚަރަދުތައް ދަނީ ކުރަމުންނެވެ.
މަސްވެރިން ދަނީ ނިކަން ގާތުން މިކަން ބަލަމުންނެވެ. ކެޔޮޅާއާ ވާހަކަދެއްކި މަސްވެރިންނާއި ކެޔޮޅުން ބުނީ ބޮޑެތި ވަފްދުތައް ގޮވައިގެން އިންތިޚާބާއި ދިމާކޮށް ރައީސް އަތޮޅުތަކަށް ފުލުފުލުން ދަތުރުކުރެއްވި ކަމަށެވެ. މިއީ، ސިޔާސީ މަގުސަދަކަށްޓަކައި ދައުލަތުގެ ޚަރަދުގައި ކުރެއްވި ދަތުުރުތަކެއްގެ ގޮތުގައި މަސްވެރިން ސިފަކުރިއެވެ. މީގެ އިތުރުން އިންތިޚާބާއި ދިމާކޮށް ބޮޑެތި މުސާރައިގައި ދައުލަތަށާއި ސިޔާސީ މަގާމުތަކަށް ވަޒީފާތަކަށް މީހުން ނަގަމުންދާކަންވެސް މަސްވެރިން ފާހަނގަކުރިއެވެ. އެހެންކަމުން މަސްވެރިންނަށް ފައިސާ ނުދެވިގެން އުޅެނީ ދައުލަތުގައި ފައިސާނެތިގެންކަމަކަށް ގަބޫލު ނުކުރެވޭ ކަމަށް މަސްވެރިން ބުންޏެވެ. އެއީ، ލޯމަތިން އެކަން ސާފުކޮށް ފެންނަން އޮތުމުންކަމަށް މަސްވެރިން ދަނީ ބުނަމުންނެވެ.
މަސްވެރިން ބުނީ، މިފްކޯއިން ޚަބަރު ފަތުރާއިރު، ”މަސްދޯނިފަހަރަށް ދޫކުރާ ފައިސާގެ ތެރެއިން“ މިހެން ބަސްމަގު ބޭނުންކުރުމުން މަސްވެރިންނަށް މިފްކޯއިން ފައިސާ ހަދިޔާ ކުރަނީ ކަމަށް މާނަކުރެވޭ ކަމަށެވެ. އެއީ އެއްވެސް ހާލެއްގައި މިފްކޯއިން މަސްވެރިންނަށް ދޭ ފައިސާ ނޫންކަމަށާއި އެއީ މަސްވެރިންނަށް މިފްކޯއިން ދައްކަން ހުރި ދަރަނީގެ ފައިސާކަމަށެވެ. އެހެންކަމުން އާާންމުންނަށް އޮޅުން ނާރާނެހެން ”ބިލުތަކަށް ފައިސާ ދެއްކުން“ މިހެން ބޭނުންކުރުން އެންމެ ރަނގަޅުކަމަށް މަސްވެރިން ބުންޏެވެ.
މިފްކޯއިން މަސްވެރިންނަށް ފައިސާ ބަރާބާރަށް ނުދިން ކަމުގައިވިޔަސް މިފްކޯއިން ވަނީ އެތައް ވަޒީފާއެއް އިއުލާނުކޮށް މިހާރު ވަޒީފާގައި ތިބި 100 އަށްވުރެ ގިނަ މުވައްޒަފުންތަކަކަށް އިންތިޚާބާއި ދިމާކޮށް ޕްރޮމޯޝަން ދީފައެވެ.