ދ. މީދޫގައި ސަރުކާރުން ގާއިމުކުރަމުންދާ އައިސް ޕްލާންޓު އަޅާ ސަރަހައްދު ސާވޭ ކުރުމުގެ މަސައްކަތް ފަށައިފި އެވެ.
ފިޝަރީޒް މިނިސްޓްރީން މައުލޫމާތުދޭގޮތުގައި، މި ސާވޭކުރަމުންދަނީ އެ މިނިސްޓްރީއާއި، މިފްކޯގެ ފަންނީ ޓީމަކުންނެވެ. އެޓީމުން މިހާރު ދަނީ ސާވޭކުރުމަށް އެސަރަހައްދުގައި ހަރަކާތްތެރިވަމުންނެވެ.
ދ. މީދޫ އައިސް ޕްލާންޓް އަަޅަނީ، އަތޮޅުތެރޭގައި އިތުރު 11 އައިސްޕްލާންޓް ގާއިމުކުުރުމަށް ސަރުކާރުން ކުރިޔަށްގެންދާ މަޝްރޫއުގެ ދަށުންނެވެ. މި މަޝްރޫއުގެ ދަށުން ދ. މީދޫގެ އިތުރުން އެއަތޮޅު ބަނޑިދޫ އާއި ރަތަފަންދޫގައިވެސް އައިސް ޕްލާންޓް ގާއިމުކުރުމަށް ވަނީ ނިންމާފަ އެވެ.
ސަރުކާރުން އައިސްޕްލާންޓް ގާއިމު ކުރުމުގެ މަސައްކަތް ފެށި އިތުުރު ރަށްތަކުގެ ތެރޭގައި ހއ.ދިއްދޫ، ހދ.ކުޅުދުއްފުށި، ށ.ފުނަދޫ، ށ.ކޮމަންޑޫ، ޅ.ނައިފަރު، އއ.ރަސްދޫ، މ.ވޭވަށް ހިމެނެއެވެ. މި 11 އައިސްޕްލާންޓް ގާއިމުކޮށް ނިމޭއިރު ދުވާލަކު 350 ޓަނު އައިސް އުފެއްދުމުގެ ގާބިލުކަން ލިބިގެންދާނެއެވެ.
މި އައިސްޕްލާންޓްތައް އެޅުމުގެ މަސައްކަތްކުރިޔަށްގެންދާނީ މިފްކޯއިންނެވެ. މިކަމަށް ޚަރަދު ކުރާނީ ދައުލަތުގެ ބަޖެޓުންނާއި، ސައުދީ ފަންޑު ފޮރ ޑިވެލޮޕްމަންޓުގެ އެހީގައެވެ.
ސަރުކާރުން މިހާތަނަށް 25 ރަށެއްގައި އައިސް ޕްލާންޓުތައް ގާއިމްކޮށްފައިވާއިރު، އިތުރު އައިސް ޕްލާންޓް ގާއިމުކުރުމަކީ މަސްވެރިންނަށް އަމާޒުކޮށްގެން ގާއިމުކޮށްފައިވާ އައިސް ޕްލާންޓުތަކުގެ ނެޓުވޯކުގެ ކެޕޭސިޓީ ވަރަށް ބޮޑުތަނުން އިތުރުވެގެން ދާނެކަމެއްކަމަށް މިނިސްޓްރީން ބުނެއެވެ.
ރާއްޖޭގެ އެކި ރަށްރަށުގައި ފަރުދުން އަދި ކުންފުނިތަކުން 78 އައިސްޕުލާންޓު ގާއިމުކޮށްގެން ހިންގަ އެވެ. އެތަންތަނުން ދުވާލެއްގެ މައްޗަށް 2215 ޓަނުގެ އައިސް އުފައްދައެވެ.