ރާއްޖޭގައި މިހާރު ގާއިމުކޮށްފައިވާ އައިސް ޕްލާންޓްތަކުން ދުވާލެއްގެ މައްޗަށް 2215 ޓަނުގެ އައިސް އުފައްދަމުން އަންނަކަމަށް ފިޝަރީޒް މިނިސްޓްރީން ބުނެފި އެވެ.
އެ މިިނިސްޓްރީން މިއަދު ބުނީ، ރާއްޖޭގެ އެކި ރަށްރަށުގައި ފަރުދުންގެ ވިޔަފާރީގެގޮތުގައްޔާ އަދި ކުންފުނިތަކުން 78 އައިސްޕުލާންޓު ގާއިމުކޮށްގެން ހިންގަމުން އަންނަކަމަށެވެ. އަދި، މި ތަންތަނުން ދުވާލެއްގެ މައްޗަށް 2215 ޓަނުގެ އައިސް އުފައްދަމުން އަންނަކަމަށެވެ.
މިނިސްޓްރީން ބުނީ، ސަރުކާރުން މިހާރު އަލަށް ގާއިމު ކުރުމުގެ މަސައްކަތް ފެށި 11 އައިސްޕްލާންޓް ގާއިމުކޮށް ނިމޭއިރު ދުވާލަކު އިތުުރު 350 ޓަނު އައިސް އުފެއްދޭނެކަަމަށެވެ.
މަސްވެރިންނަށް އައިސް ލިބުމުގައި ދިމާވާ ދަތިތަކަށް ހައްލު ހޯދުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ހއ. ދިއްދޫ، ހދ. ކުޅުދުއްފުށި، ށ. ފުނަދޫ، ށ. ކޮމަންޑޫ، ޅ. ނައިފަރު، އއ. ރަސްދޫ، މ. ވޭވަށް، ދ.ބަނޑިދޫ، ދ. މީދޫ، ހއ. އިހަވަންދޫ އަދި ގދ. ރަތަފަންދޫގައި އައިސް ޕްލާންޓު ގާއިމުކުރުމަށް ސަރުކާރުން ވަނީ ނިންމާފަ އެވެ.
މި އައިސްޕްލާންޓްތައް މިފްކޯއާއި ހަވާލުކޮށްގެން ގާއިމުކުރަން ސަރުކާރުން ނިންމާފައިވާއިރު، މީގެ ތެެރެއިން ފަސް ޕްލާންޓެއް ގާއިމު ކުރަނީ ސައުދީ ފަންޑް ފޮރ ޑެވެލޮޕްމެންޓްގެ އެހީގައެވެ. އަނެއް ހަ ޕްލާންޓް ގާއިމުކުރަން ނިންމާފައިވަނީ ދައުލަތުގެ ބަޖެޓުންނެވެ.
ސަރުކާރުން މިހާތަނަށް 25 ރަށެއްގައި އައިސް ޕްލާންޓުތައް ގާއިމްކޮށްފައިވާއިރު، މީގެ ތެެރެއިން ބައެއް ޕްލާންޓްތައް މިހާރު އޮޕަރޭޓް ނުކުރެއެވެ. އެކަން ހައްލުކުރުމަށް މިފްކޯއާ ގުޅިގެން މަސައްކަތްކުރަމުން އަންނަކަމަށް މިނިސްޓްރީން ބުނެފައިވެއެވެ.