ކަނޑުފޭރޭ މީހުންނާ ދެކޮޅަށް އަރަބި ކަނޑުގައި ހިންގި އޮޕަރޭޝަނަކަށް ފަހު، ރާއްޖެ އަށް އައި ޖަޕާނުގެ މަނަވަރު ފުރައިފި އެވެ.
ރާއްޖޭގައި ހުންނަ ޖަޕާނުގެ އެމްބަސީން މިއަދު ބުނީ ޖަޕާން މެރިޓައިމް ސެލްފް ޑިފެންސް ފޯސް (ޖޭއެމްއެސްޑީއެފް) ގެ އަކެބޯނޯ މަނަވަރު ރާއްޖޭގައި ބަނދަރުކޮށްފައި އޮތޯ މި މަހުގެ 19 އަދި 20 ގައި ކަމަށެވެ. އަދި އެ މަނަވަރު މިހާރު ރާއްޖެ އިން ފުރާފައިވާ ކަމަށްވެސް އެ އެމްބަސީން ބުނެފައި ވެއެވެ.
މިއީ އަރަބި ކަނޑާއި ގަލްފް އޮފް އެޑެންގައި ހަރަކާތްތެރިވާ ކަނޑުފޭރޭ މީހުންނާ ދެކޮޅަށް ހިންގި އޮޕަރޭޝަނެއްގައި ބައިވެރިވި މަނަވަރެއް ކަމަށް ޖަޕާން އެމްބަސީން ބުނެފައި ވެއެވެ. އަދި، އެ މަނަވަރުގެ ކޮމާންޑިން އޮފިސަރު ޓޮގޯވާ، ޖަޕާނުން ރާއްޖެ އަށް ކަނޑައަޅުއްވާފައި ހުންނަވާ ސަފީރު ޓޮގާވާ އާ ބައްދަލު ކުރެއްވިކަމަށް ބުނެފައި ވެއެވެ.
މި ދަތުރުގައި އެ މަނަވަރުން އެއްވެސް އެހެން ހަރަކާތެއް ހިންގި ކަމެއް އެއްވެސް އިދާރާއަކުން ހާމަކޮށްފައެއް ނުވެއެވެ.
.