މިހާރު މިއީ ރާއްޖޭގެ ކަނޑުގެ ވަސީލަތްތައް ދެމެހެއްޓެނިވި ގޮތެއްގައި ބޭނުންކުރުމުގެ ފުރުސަތު އޮތް ވަގުތެއްކަމަށް ފިޝަރީޒް މިނިސްޓަރ އަހްމަދު ޝިޔާމް ވިދާޅުވެއްޖެއެވެ.
އެކްސްގައި ހިއްސާކުރެއްވި މެސެޖެއްގައި މިނިސްޓަރު ޝިޔާމް ވިދާޅުވީ، ރާއްޖޭގެ އިގުތިސާދު ސިންދަފާތުކުރުމަށް ރައީސް ޑރ. މުއިއްޒަު ގެންގުޅުއްވާ ތަޞައްވުރުގެ ސަބަބުން ކުރިން ފުޅާ ދާއިރާއެއްގައި އަތްނުލެވި ހުރި އެތައް ވަސީލަތަކަށް ވާސިލުވުމުގެ މަގު ފަހިވެގެން ހިނގައްޖެ ކަމަށެވެ. އަދި ރާއްޖޭގެ އިގްތިސާދީ ޚާއްސަ ސަރަހައްދު(އީއީޒެޑް) ރައްކާތެރިކޮށް ބެލެހެއްޓުމުގެ ނިޒާމު ވަރުގަދަކުރެވި ގާބިލިއްޔަތުކަން އިތުރުކުރެވުމުން ދެމެހެއްޓިނިވި ގޮތެއްގައި ކަނޑުގެ ވަސީލަތްތައް ބޭނުންކުރުމުގެ ކަންކަން ފުޅާކުރުމުގެ ފުރުސަތު ލިބިގެން ހިނގައްޖެ ކަމަށެވެ.
”އީއީޒެޑް ރައްކާތެރިކޮށް، ބެލެހެއްޓުމުގެ ގާބިލުކަން ވަރުގަދަކުރުމުން، މިހާރު މިއީ ދެމެހެއްޓެނިވި ގޮތެއްގައި ކަނޑުގެ ވަސީލަތްތައް ބޭނުންކުރަން އެކަށީގެންވާ ފުރުޞަތު އޮތް ވަގުތެއް“ މިނިސްޓަރު ވިދާޅުވެފައި ވެއެވެ.
ކަނޑުގެ ނަފާވެރިކަމަށް ބަރޯސާވެ ރާއްޖޭގެ އިގުތިސާދު ނަގާ ކޮށްޅަށްޖެހުމުގެ މަސައްކަތް ސަރުކާރުން ކުރަމުންދާއިރު، ކަނޑާއި ފަޅުތަކާއި، ކަނޑުގެ ވަސީލަތްތައް ރާއްކާތެރިކޮށް ދެމެހެއްޓެނިވިގޮތެއްގައި ނަފާވެރިކަން ގެނުވޭނެ ގޮތަކަށް ސަރުކާރުގެ ސިޔާސަތުތައް ދަނީ ބައްޓަން ކުރަމުންނެވެ. އަދި ކަމާއި ގުޅުން ހުރި ނިޒާމުތައްވެސް ގާއިމުކުރުމުގެ މަސައްކަތް ސަރުކާރުން ދަނީ ކުރަމުންނެވެ.
ދާދި ފަހުންވަނީ މަސްވެރިންނާއި، ކަޑު ދަތުރުކުރާ ފަރާތްތައް ޚާއްސަ އެޕްލިކޭޝަންއެއް ތައާރަފުކޮށްފަ އެވެ. އަދި އަސްކަރީ ޑްރޯންގެ އެހީގައި ރާއްޖޭގެ ކަނޑުގެ ސަރައްހަދު ސައުވީސް ގަޑީއިރު ބެލެހެއްޓޭނެ ނިޒާމެއް ގާއިމުކޮށް ވައިގެ ބާރެއް ވުޖޫދުކޮށްފަ އެވެ. މި ހުރިހައި ކަމަކީވެސް މަސްވެރިންގެ ރައްކާތެރިކަމާއި، ނަފާވެރިކަމާއި ގުޅިފައިވާ ކަންތައްތަކެވެ.