މ. މުލީ ބަނދަރު ފުންކުރުމުގެ މަސައްކަތް މާދަމާ ފަށަން ހަމަޖެހިފައިވާތީ އޮޑިވެރިން އެކަމަށް ސަމާލުވުމަށް މުލީ ކައުންސިލުން އެދިއްޖެއެވެ.
އެކައުންސިލުން މިކަމާއި ގުޅޭގޮތުން އާންމުކުރި އިއުލާނެއްގައި ބުނެފައިވަނީ މަދާމާއިން ފެށިގެން ބަނދަރު ފުންކުރުމުގެ މަސައްކަތް ކުރިޔަށްދާތީ، އެ މަސައްކަތްކުރާ ފަރާތްތަކަށް ދަތިނުވާ ގޮތަށް ބަނދަރު ބޭނުންކުރުމާއި ބަނދަރުގައި އޮޑިދޯނިފަހަރު އެޅުމަށް އެދޭކަމަށެވެ.
ކަައުންސިލުން ބުނީ، ބަނދަރު ފުންކުރަމުގެ މަސައްކަތް ކުރިޔަށްދާއިރު، ކައުންސިލްގެ އިރުޝާދާއި ޚިލާފަށް ބަނދަރުގައި އަޅާފައިވާ އުޅަނދުތަކަށް ގެއްލުންވިއަސް، އެކަމުގެ ޒިންމާ ކައުންސިލުންނާއި، މަސައްކަތްކުރާ ފަރާތުން ނުނަގާނެ ކަމަށެވެ.
މުލީ ބަނދަރު ތަރައްގީ ކުރުމުގެ މަޝްރޫއަކީ 61،8 މިލިއަން ރުފިޔާގެ މަޝްރޫއެކެވެ. މަޝްރޫއުގެ މަސައްކަތް ކުރިޔަށް ގެންދަނީ އެމްޓީސީސީއާއި ހަވާލުކޮށްގެންނެވެ.
މި މަޝްރޫއުގެ ދަށުން 33،888 ކިއުބިކް މީޓަރުގެ ސަރަހައްދެއްގައި ހާބަރ ބޭސިން ފުންކުރުމާއި، 465 މީޓަރުގެ ސަރަހައްދެއްގައި ބޭރުތޮށިލުމާއި، 6،254 ކިއުބިކް މީޓަރުގެ ސަރަހައްދެއްގައި ނެރު ފުންކުރުމާއި، 89 މީޓަރު ސަރަހައްދެއްގައި ރިވެޓްމެންޓް ޖެހުމުގެ އިތުރުން 479 މީޓަރުގެ ސަރަހައްދެއްގައި އެއްގަމު ތޮށި ލުމަށް ވަނީ ހަމަޖެހިފައެވެ.
މީގެ އިތުރުން 2،730 އަކަ މީޓަރުގެ ސަރަހައްދެއްގައި ހާބަރ ޕޭވްމެންޓް އެޅުމާއި ބަނދަރު ބައްތިއާއި ނެރު ބައްތި ހަރުކުރުމުގެ މަސައްކަތް ކުރުމަށް ވަނީ ހަމަޖެހިފައެވެ.