މިފްކޯގެ ސީއީއޯ އަޙުމަދު ޝަމާހު ރަޝީދު ސަސްޕެންޑްކުރި މައްސަލަ ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް (އެސްއޯއީ) ކޮމިޓީން ބަލަން ނިންމައިފި އެވެ.
އެސްއޯއީ ކޮމިޓީ މިއަދުގެ ބައްދަލުވުމުގައި ދާންދޫ ދާއިރާގެ މެންބަރު ޔައުގޫބް އަބްދުﷲ ވަނީ ކޮމިޓީއަށް ޝަމާހުގެ އިތުރުން ޕްރައިވެޓައިޒޭޝަން އެންޑް ކޯޕްރަޓައިޒޭޝަން ބޯޑު (ޕީސީބީ)ގެ ބޯޑުގެ މެންބަރުން ހާޒިރުކޮށް ސުވާލު ކުރުމަށް ހުށަހަޅުއްވާފަ އެވެ. މި ހުށަހެޅުމަށް މާފަންނު މެދު ދައިރާގެ މެންބަރު އިބްރާހިމް ރަޝީދު ތާއީދުކުރެއްވުމާއެކު، އެންމެ އަވަހަށް ދެން އޮންނަ ޖަލްސާއެއްގައި މައްސަލަ އެޖެންޑާކޮށްގެން ކުރިއަށް ގެންދަން ކޮމިޓީން ވަނީ ނިންމާފައެވެ.
މިދިޔަ ހޯމަ ދުވަހު ސަމާހް ސަސްޕެންޑުކުރީ، ކޯޕަރޭޓް ގަވަނެންސާއި ގުޅުންހުރި މައްސަލަތަކެއް ޕީސީބީއަށް ހުށަހެޅި އެކަމުގެ ފުރިހަމަ އިންކުއަރީއެއް ހިންގުމަށްކަމަށް ބުނެއެވެ.ޕީބީސީން އޭރު ބުނެފައިވަނީ، އޭނާ ސަސްޕެންޑްކުރީ ސަރުކާރު ހިއްސާވާ ކުންފުނިތަކުގެ ޑިރެކްޓަރުންގެ ސުލޫކީ މިންގަޑާއި ޝަކުވާ ހުށަހެޅުމާއި، އަދި ފިޔަވަޅު އެޅުމާއި ބެހޭ އުސޫލުގެ ފަންސަވީސް ވަނަ މާއްދާގެ (ށ) ގެ އެއްވަނަ ނަމްބަރުގައިވާ ހާލަތައް ރިއާޔަތްކުރުމަށްފަހުގައި ކަމަށެވެ.
ޝަމާހު 14 ދުވަހުގެ މުއްދަތަކަށް ސަސްޕެންޑު ކުރީ ކުރިން އެންގުމަކާއި ނުލާ ކުއްލި ގޮތަކަށެވެ. އަދި ސަސްޕެންޑް ކުރިތާ ކުޑައިރުކޮޅެއްގެ ތެރޭގައި ޕީބީސީން އެދުވަހު މިފްކޯއަށް ވަނެވެ. ޕީބީސީގެ ބިއުރޯއަށްވެސް އެދުވަހު ވަނެވެ. އެހެން ނަމަވެސް ޝަމާހުގެ މައްޗަށް ޕީސީބީއިން ތުހުމަތު ކުރި އެއްވެސް ކަމަކާއި ގުޅޭ ގޮތުން އޭނާއާއި އެއްވެސް ސުވާލެއް ކޮށްފައެއް ނުވެއެވެ.
މިދިޔަ ފެބްރުއަރީ މަހުގެ 29 ވަނަ ދުވަހު ޝަމާހު އަށް ޕީބީސީން ފޮނުވި ސިޓީއެއްގައި، ކޯޕަރޭޓް ގަވަނަންސް ކޯޑާއި، ޕީސީބީއިން ހަދާފައިވާ އުސޫލުތަކާއި ހިލާފަށް މިފްކޯ އިން 12 ކަމެއް ކޮށްފައި ވާކަން ފާހަގަ ކޮށް އެކަން އިސްލާހު ކުރުމަށް އަންގާފައި ވެއެވެ.
ޕީސީބީން ފާހަނގަކުރި ކަންތައްތަކުގެތެރޭގައި، ކުންފުނީގެ މުދަލާއި ވަސީލަތްތައް އަމިއްލަ ބޭނުމުގައާއި ސިޔާސީ ބޭނުންތަކަށް ފާޅުކަންބޮޑު ގޮތެއްގައި ބޭނުންކުރުމާއި، ކުންފުނީގެ ދާއިމީ މުވައްޒަފުން ނުހައްގުން ވަޒިފާގެ މަސްއޫލިއްޔަތުން ދުރުކުރުމާއި, ވަޒީފާގެ ބިރުދެއްކުމާއި, ދާއިމީ މަގާމްތަކުގައި ތިއްބެވި މުވައްޒަފުންނަށް ވަޒީފާއާބެހޭ ގާނޫނާއި ޚިލާފުވާ ސަބަބެއްނެތި މަގާމާއި މުސާރަ ދަށްކުރުމާއި, ސަބަބެއް ނެތި އެހެން ޑިޕާޓްމަންޓްތަކަށާއި, ކުންފުނީގެ ސައިޓުތައް ހުންނަ ރަށްރަަށަށް ބަދަލުކުރުން ހިމެނެއެވެ.
މީގެ އިތުރުން، ކުންފުނީގެ މުވައްޒަފުން ނެގުމާއި ގުޅޭގޮތުން ހަދާފާއިވާ ޕޮލިސީތަކާއި މުސާރައިގެ އޮނިގަޑާއި ޚިލާފަށް ސީއީއޯގެ އާއިލީ ގުޅުންހުރި ފަރާތްތަކަށާއި, ރައްޓެހިންނަށް ބަޖެޓް ހަމަޖެހިފައި ނުވަނީސް ވަޒީފާ ދިނުމާއި، ބެސްޓު ޕްރެކްޓިސްއާއި ގަވަރނަންސް އުސޫލުތަކާއި ޚިލާފަށް ހެޑް ހަންޓް ކުރުމުގެ ނަމުގައި މުވައްޒަފުންގެ ގަވާއިދާއި ޚިލާފަށް, އެއްވެސް ޝަރުތަކަށް ބެލުމެއްނެތި, އާންމުކޮށް އިއުލާން ކުރުމަކާނުލާ, އިޖުރާތުތައް ފުރިހަމަނުކޮށް މުވައްޒަފުން ވެއްދުމާއި، ޕީސީބީގެ ހުއްދަ ހޯދުމަކާނުލާ, ކުންފުނީގެ މަގާމްތައް އުފައްދާ, އެމަގާމްތަކަށް މީހުން ވެއްދުމާއި، އުސޫލުތަކާއި ޚިލާފަށް, އެކަށީގެންވާ ތައުލީމާއި ތަޖުރިބާ ނެތް ފަރާތްތައް ޑިޕާޓްމަންޓްތަކުގެ ވެރިންނަށް ލުންވެސް ފާހަނގަކޮށްފައި ވެއެވެ.
ޝާމާހުގެ މައްޗަށް ޕީބީސީން ބޮޑެތި ތުހުމަތުތައް ކޮށް، ކުއްލިގޮތަކަށް ސަސްޕެންޑްކޮށްފައިވާއިރު މިފްކޯއިންވެސް އަދި ޝަމާހުވެސް މިކަމާއި ގޫޅޭގޮތުން ރަސްމީ ސިފައެއްގައި އެއްވެސް އެއްޗެއް ބުނެފައެއް ނުވެއެވެ.