މިއަހަރުގެ ފެބްރުއަރީ މަހު ރާއްޖެއިން ބޭރުގެ ގައުމުތަކަށް 173 މިލިއަން ރުފިޔާގެ ރޯމަހާއި މަހުގެ އުފެއްދުންތައް އެކްސްޕޯޓްކޮށްފައިވާ ކަން ކަސްޓަމްސްގެ ތަފާސް ހިސާބުތަކުން ދައްކައިފި އެވެ.
ކަސްޓަމްސްއިން މިއަދު އާންމު ކުރި ފެބްރުއަރީ މަހުގެ އިމްޕޯޓް އެކްސްޕޯޓް ތަފާސް ހިސާބުތަކަށް ބަލާއިރު، އެންމެގިނަ އަދަދަކަށް އެކްޕޯޓްކޮށްފައިވަނީ ގަނޑުކުރި ކަޅުބިލަމަހެވެ. ޖުމްލަ 82 މިލިއަން ރުފިޔާގެ ކަޅުބިލަމަސް މިދިޔަ މަހު އެކްސްޕޯޓްކޮށްފައި ވެއެވެ. އަދި، މަސްދަޅު ހިމެނޭހެން ތައްޔާރުކުރި ކަޅު ބިލަމަހަށް ބަލާއިރު 55 މިލިއަން ރުފިޔާގެ މަސް އެކްސްޕޯޓްކޮށްފައި ވެއެވެ.
މީގެ އިތުރުން، 23 މިލިއަން ރުފިޔާގެ ގަނޑުކުރި ރޯ ކަންނެލިއާއި، 5 މިލިއަން ރުފިޔާގެ ކަންނެލި މަސްބުރި އެކްސްޕޯޓްކޮށްފައި ވެއެވެ. އަދި 8 މިލިއަން ރުފިޔާގެ މަހާއި މަހުގެ އެހެން ބާވަތްތައް ވެސް އެކްސްޕޯޓްކޮށްފައި ވެއެވެ.
އެންމެ ގިނައިން މަސްބޭރުކޮށްފައިވަނީ ތައިލޭންޑަށެވެ. އޭގެ އިތުރުން އިނގިރޭސި ވިލާތާއި، ޖަރުމަންވިލާތައި ބަންގްލަދޭޝްއާއި ފަރަންސޭސި ވިލާތައްވެސް މަސް އެކްސްޕޯޓްކޮށްފައި ވެއެވެ. ކުރިން މަސް އެކްސްޕޯޓްކުރާ މައިގައުމުތަކުގެ ތެރޭގައި އޮތް އިންޑިއާ މިފަހަރުގެ ލިސްޓަކު ނެތެވެ. އެހެންކަމުން އިންޑިއާއަށް މަސް އެކްސްޕޯޓްކުރިކަމެއް ކަށަވަރެއް ނުވެއެވެ.
މި އަހަރުގެ ޖެނުއަރީ މަހު އެކްްސްޕޯޓްކޮށްފައިވަނީ 145 މިލިއަން ރުފިޔާގެ މަހާއި މަހުގެ ބާވަތްތަކެވެ. އެހެންކަމުން ޖެނުއަރީ މަހާ އަޅާ ކިޔާއިރު، ފެބްރުއަރީމަހު މަަސް އެކްޕޯޓް ކުރި މިންވަރު 28 މިލިއަން އިތުރުވެފަ އެވެ.