މި ސަރުކާރުގެ ފަސް އަހަރުދުވަހުގެ ތެރޭގައި އެމްއެންޑީއެފްގެ ކޯސްޓްގާޑްގެ ކެޕޭސިޓީ ދެގުނަޔަށް ބޮޑުކުރައްވާނެކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ދިވެހި ވައިގެ ބާރުގެ އިފްތިތާހީ ޖަލްސާގައި އެމަނިކުފާނު ވިދާޅުވީ ކަނޑުމަގުގައި މިހާރު ބޭނުންކުރަމުން އަންނަ ކޯސްޓްގާޑުގެ އުޅަނދުތަކުގެ ޙާލަތު ހުރީ ވަރަށް ދަށްކޮށްކަމަށެވެ. ކޯސްޓްގާޑުގެ އޮޕަރޭޝަންތަކަށް އާދައިގެ މެދު ސައިޒުގެ ގާތްގަނޑަކަށް ހަތަރު ފަސް އުޅަނދެއް އަދި ދިހަވަރަކަށް، ބާރަވަރަކަށް ކުދި އުޅަނދު އޮތް ނަމަވެސް، ބައެއް ތަކެތި ބޭނުންވެސް ނުކުރެވޭ ޙާލަތުގައި ހުރިކަމަށް ވިދާޅުވި އެވެ.
”މިއީ ހިތާމަހުރި ކަމެއް. އެތައް އަހަރެއް މިދިޔައީ މިކަންކަމަށް ސަމާލުކަން ނުދެވި. އެހެން ނަމަވެސް، މިއީ، ދިވެހި ޢަސްކަރިއްޔާ. މިއީ، އެއްގޮތަކަށްވެސް އަޅުގަނޑުމެން ބަލައިގަންނަންޖެހޭނެ، ދިވެހިންނަށް ޙައްޤު މިންވަރެއް ނޫން.“ ރައީސް ވިދާޅުވި އެވެ.
ރައީސް ވިދާޅުވީ މިސަރުކާރުގެ ފަސް އަހަރުތެރޭގައި މި ހާލަތު ބަދަލުކޮށްދޭނެކަމުގެ ޔަގީންކަން ދެއްވާކަމަށެވެ. އަދި އެކުވެރި ދައުލަތްތަކުގެ އެހީތެރިކަމާއެކު އެހީގައި ކޯސްޓްގާޑުގެ ކެޕޭސިޓީ ވަރުގަދަކޮށް، ދެގުނަޔަށް ބޮޑު ކުރައްވާނެކަމަށް ވިދާޅުވި އެވެ.
”މިތާ އިޢުލާނު ކުރަން ބޭނުންވާ ކަމަކީ، އިރާދަކުރެއްވިއްޔާ މި ފަސް އަހަރު ނިމޭއިރު، މިހާރުގެ ކޯސްޓްގާޑުގެ ކެޕޭސިޓީ، ދެގުނަޔަށް ބޮޑުކުރާނެކަން. އެކި ސައިޒްގެ އުޅަނދުތައް އިރާދަކުރެއްވިއްޔާ ހޯދައިދޭނަން. މިހާރުވެސް އެ މަސައްކަތް އެބަ ހިނގާ. ކުރިން ދެންނެވި ފަދައިން، އަޅުގަނޑުމެންނާ ވަރަށް ގާތް ތުރުކީގެ ސަރުކާރާ އެކީގައި. އަދިވެސް އެކުވެރި ބައެއް ޤައުމުތަކާ އެކީގައި، އެ މުޢާމަލާތްތައް ކުރެވެމުންދަނީ. އިރާދަކުރެއްވިއްޔާ އަޅުގަނޑުމެންގެ ކޯސްޓްގާޑުގެ ކަނޑުގެ ކެޕޭސިޓީވެސް ދާނީ ދުވަހަކަށްވުރެ ދުވަހެއް މަތިކުރެވެމުން.“ ރައީސް ވިދާޅުވި އެވެ.
ރައީސް ވިދާޅުވީ، މީގެކުރިން ރާއްޖޭގެ ކަނޑުގެ އަޑި ދިރާސާ ކުރަން އެހެން ފަރާތްތަކުގެ އެހީ ހޯދިނަމަވެސް ދެން އެކަންވެސް ކުރިއަށް ގެންދާނީ، ޢަސްކަރިއްޔާގެ ފަރާތުންކަމަށެވެ. އަދި، އެކަމަށްޓަކައި ބޭނުންވާ މާލީ ތަނަވަސްކަން، ބަޖެޓުގެ ތެރެއިން އެމް.އެން.ޑީ.އެފް. އަށް ހަމަޖައްސައިދީފައިވާކަމަށާއި، މި އަހަރުގެ ތެރޭގައި ހައިޑްރޮގްރަފީގެ މަސައްކަތް އެމް.އެން.ޑީ.އެފް.ގައި، އެ ކެޕޭސިޓީ ޤާއިމުކުރެވި އަމިއްލައަށް ކުރަން ފަށާނެކަމަށެވެ.