އެއްގަމާއި، ކަނޑާއި، ވައިގެމަގުންވެސް ޤައުމު ދިފާޢުކުރުމުގެ ޒަމާނީ އަސްކަރީ ޤާބިލުކަން ދިވެހިރާއްޖޭގައި ވަރުގަދަކުރުމަށް، މި ސަރުކާރުން ކުރަމުންދާ މަސައްކަތްތަކުގެ ތެރެއިން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެމް.އެން.ޑީ.އެފްގެ އެއަރ ކޯރ އިފުތިތާހުކޮށްދެއްވައި، އަންމޭންޑް އޭރިއަލް ވެހިކަލް (ޔޫ.އޭ.ވީ) ނުވަތަ ޑްރޯން ސިފައިންގެ ޚިދުމަތަށް ތަޢާރަފުކޮށްދެއްވައިފި އެވެ.
މި ޚިދުމަތްތައް ތައާރަފުކުރެއްވުމަށްފަހު އެމަނިކުފާނު ދެއްކެވި ވާހަކަފުޅުގައި ވިދާޅުވީ ދިވެހި ރައްޔިތުންގެ ސަލާމަތާއި ރައްކާތެރި ކަމަށްޓަކައި އަދި އިޤްތިޞާދީ މަސައްކަތްތަކާއި، އިންސާނީ ސަލާމަތްތެރި ކަމަށްޓަކައި މިއަދު މި ފެށިގެން މިދިޔައީ ވަރަށްބޮޑު، ވަރަށް ބިޔަ ޤައުމީ މަސައްކަތެއްކަމަށެވެ. އަދި، ޒަމާނީ ޓެކްނޯލޮޖީގެ އެހީގައި މީގެ ފަހުން ރާއްޖޭގެ ކަނޑުގެ ސަރަހައްދު ބަލަހައްޓާނީ ދިވެހިން ކަމަށް ވިދާޅުވި އެވެ.
”މީގެކުރިން މިކަހަލަ ކަންތައްތައް އަޅުގަނޑުމެން ކުރަން ޖެހިފައި އޮތް ގޮތަކީ، އެހެން ބޭފުޅުންގެ، އެހެން ފަރާތްތަކުގެ، އެހެން ޤައުމުތަކުގެ އެހީތެރިކަން ހޯދަންޖެހުން. އެއީކީވެސް މައްސަލައެއް ނޫން. އޭރުގައި އަޅުގަނޑުމެންގެ އެ ކެޕޭސިޓީ ނެތީ. އެހެން ނަމަވެސް، މިއަދު އިރާދަކުރެއްވިއްޔާ އަޅުގަނޑުމެން އަމިއްލައަށް އަޅުގަނޑުމެންގެ ސަރަޙައްދު ބެލެހެއްޓީމާ، އަޅުގަނޑުމެންގެ މިނިވަންކަން އަޅުގަނޑުމެންނަށް އިރާދަކުރެއްވިއްޔާ އެބަ ޔަޤީންވެގެންދޭ. ހާލުގައި ޖެހިގެން ހޯދަންޖެހޭ މީހާ ނުހޯދިގެން މީގެކުރިން އުޅެންޖެހުނުހާ ގިނަ ވަގުތު، ދެން އުޅެންނުޖެހޭނެކަން އިރާދަކުރެއްވީތީ ޔަޤީންވެގެން އެބަދޭ.“ ރައީސް ވިދާޅުވި އެވެ.
ރައީސް ވިދާޅުވީ، ޢަސްކަރިއްޔާގެ ޤާބިލިއްޔަތު އިރާދަކުރެއްވީތީ އެއަރ ކޯ އުފެއްދިގެން ޤާއިމުވެގެންދާއިރު، އަދި ކުރިއަށް އޮތް ދުވަސްތަކުގައި، ރާއްޖޭގެ މިނިވަންކަން ޙިމާޔަތް ކުރުމަށްޓަކައި އިތުރު ގިނަ ކަންތައްތައް ޢަސްކަރިއްޔާގައި ޤާބިލް ކަމުގައި އިތުރުކުރެވިގެންދާނެކަމަށެވެ.
ދިވެހި ވައިގެ ބާރުގައި ޚިދުމަތް ކުރާނީ ތުރުކީވިލާތުން ތަމްރީނު ލިބިފައިވާ ދިވެހި ސިފައިންނެވެ. އަދި ޑްރޯންވެސް އޮޕަރޭޓްކުރުމުގެ ހުރިހައި ކަމެއްގައި ހަރަކާތްތެރިވާނީ ދިވެހި ސިފައިންނެވެ. ރާއްޖޭގެ ކަނޑުގެ ސަރަަހައްދު ސައުވީސް ގަޑީއިރު ބެލެހެއްޓުމަށް މި ޑްރޯންތައް ބޭނުންކުރަމުންދާނެއެވެ. އޭރުން ކަނޑުގެ ހާދިސާތަކުގައި މީހުން ގެއްލުމާއި އަދި އޮޑި ދޯނި ފަހަރު ގެއްލިގެން ހިންގާ ސަވައިލެންސް އޮޕަރޭޝަންތަކުގައި މި ބޭނުންކުރާނެއެވެ.މި ޑްރޯނަކީ ރޭނގަޑު ކަނު އަނދިރީގައިވެސް ބޭނުން ކުރެވޭ ގޮތަށް ފަރުމާކޮށްފައިވާ ޑްރޯންތަކެކެވެ. އެހެންކަމުން ޜޭގަނޑުގެ ވަގުތެއްގައި ކަނޑުގެ ހާދިސާއެއް ހިނގިނަމަވެސް ކޯސްޓްގާޑުގެ އެހީތެރިކަމާއެކު ޑްރޯންވެސް ސަވައިލެންސް އޮޕަރޭޝަނުގައި ބޭނުންކުރާނެއެވެ.