ދިވެހިރާއްޖޭގެ މަސްވެރިންނާއި ކަނޑު ދަތުރުކުރާ ފަރާތްތަކަށް ހާއްސަކޮށް ތައްޔާރުކޮށްފައިވާ ’ރަސްއައިން‘ މޯބައިލް އެޕްލިކޭޝަން ލޯންޗުކޮށްފި އެވެ.
އެމްއެންޑީއެފްގެ އެއާ ކޯޕް އިފްތިތާހު ކުރުމަށް ނ. މާފަރުގައި ބޭއްވި ޚާއްސަ ރަސްމިއްޔާތުގައި މި އެޕްލިކޭޝަން ލޯންޗުކޮށްދެއްވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.
”ރަސްއައިން“ގެ ނަމުގައި އަލަށް ތައާރަފްކުރި މި މޯބައިލް އެޕަކީ ރާއްޖޭގެ މަސްވެރިންނަށާއި ކަނޑުދަތުކުރު ކުރާ އުޅަނދުފަރަށާއި، ރާއްޖޭގެ ކަނޑުން ނަފާ ހޯދަމުންދާ ސިނާއީ މަސައްކަތްތަކުގައި ހަރަކާތްރިވަމުން އަންނަ ފަރާތްތަަކަށް ޓެކްނޮލޮޖީގެ މަންސަތަކުގައި ބޭނުން ހިފޭނެ މުހިންމު އެޕެެކެވެ. މިއެޕް އެންރޮއިޑް އަދި އައިއޯއެސް ފޯނުތަކުގައިވެސް ބޭނުންކުރެވެއެވެ.
މި އެޕް ފަރުމާ ކޮށްފައިވަނީ މަސްވެރިންނަށާއި ކަނޑުދަތުރު ކުރާ ފަރާތްތަކަށް ބޭނުންވާ މުހިންމު މައުލޫމާތުތަކެއް ހިމަނައިގެންނެވެ. އެގޮތުން މިއެޕްގައި ރާއްޖޭގެ މެޕްގެ އިތުރުން، މޫސުމީ އިންޒާރުތަކާއި، މަސް އައިނު ހުންނަ ސަރަހައްދުގެ މައުލޫމާތު ހިމަނާފައިވެއެވެ. މީގެ އިތުުރުން މަސްކަނދުފަތިތައް އަޅާފައިވާ ސަރަހައްދުތަކާއި އެހެނިހެން ވަސީލަތްތަކުން އެއްކުރާ މަސް ހުންނަ ތަންތަނުގެ މައުލޫމާތާއި، ރާއްޖޭގެ ކަނޑުތަކުގެ ދިޔަވަރާއި އޮއިވަރުގެ މައުލޫމާތު ފެންނަން ހުންނާނެ އެވެ. މީގެ ސަބަބުން، މަސްވެރިންނަށް މަސްވެރިންކަން ރަނގަޅު ސަރަހައްދު ކަނޑައެޅުމުގަ އާއި މަސްއައިން ހޯދުމުގައި ކުރާ ހޭދަ ކުޑަކުރުމަށް އެހީއަކަށް ވާނެއެވެ. މި އެޕްގެ ތިންވަނަ ޓެބް މުއާސަލާތީ ހަބެއްގެ ގޮތުގައި ހާއްސަކޮށްފައިވާއިރު، އުޅަނދުފަހަރުން ފޮނުވާ މެސެޖުތަކާއި ކުއްލި ހާލަތުގައި ކޯސްޓްގާޑުން ފޮނުވާ ޑިސްޓްރެސް ޕުޝް މެސެޖުތައްވެސް ވަގުތުން ފެންނަމުންދާނެ އެވެ.
އެމްއެންޑީއެފުން ބުނީ، ރަސްއައިން އެޕް ވެގެންދާނީ މަސްވެރިކަމުގެ މަސައްކަތަށް އެހީތެރިކަން ފޯރުކޮށްދިނުމާއި ދިވެހ މަސް ކަނޑުތައް ހިމާޔަތްކޮށް ބެލެހެއްޓުމުގައި ގައުމީ ދިފާއީ ބާރާއި ދިވެހި މަސްވެރިން ގުޅިގެންގެން ކުރާ މަސައްކަތަށް ލިބިގެންދާނެ ވަރަށް ބޮޑު ކުރިއެރުމަކަށްކަމަށެވެ.