އޮޑިދޯނިފަހަރު ބަނުމާއި ސިނާއީ މަސައްކަތް ކުރުމަށް ބިން ކުއްޔަށް ދޫކުރަން އިންނަމާދޫ ކައުންސިލުން ނިންމައިފިއެވެ.
އިންނަމާދޫ ކައުންސިލުން ކުއްޔަށްދޭން ނިންމާފައިވަނީ، އެރަށުގެ ސިނާއީ މަސައްކަތްކުރާ ސަރަހައްދުން 1800އަކަފޫޓްގެ 2 ބިމެވެ. ބިން ކުއްޔަށްދޫކުރަނީ 5 އަހަރަށްވުރެ ދިގުނޫން މުއްދަތަކަށެވެ.
ބިން ކުއްޔަށް ދޫކުރެވޭ ބޭނުންތައް:
1- ލަކުޑި އަދި ފައިބަރު އޮޑި ދޯނިފަހަރު ބަނުމުގެ މަސައްކަތްކުރުމަށް
2- ލަކުޑި އަދި ފައިބަރު އޮޑިދޯނިފަހަރު މަރާމާތުކުރުމުގެ މަސައްކަތްކުރުމަށް
3- ލަކުޑި އަދި ފައިބަރުގެ އެކިއެކި މަސައްކަތްކުރުމަށް
4- ވަޑާންގެ ހިންގުމަށް
5- ލޯންޗ،ް ޑިންގީ ފަދަ އުޅަނދުތައް ބަނުމުގެ މަސައްކަތްކުރުމަށް
6- ލޯންޗ،ް ޑިންގީ ފަދަ އުޅަނދު މަރާމާތު ކުރުމުގެ މަސައްކަތްކުރުމަށް
7- ލަކުޑި އަދި ފައިބަރު އޮޑިދޯނިފަހަރު/ލޯންޗް/ޑިންގީ ފަދަ އުޅަނދުތައް ބަނުމާއި މަރާމާތުކުރުމުގެ މަސައްކަތްކުރުމަށް
8- އޮޑިދޯނިފަހަރު ބަނުމާއި ސިނާއީ މަސައްކަތްތަކާއި ގުޅުންހުރި މުދަލާއި ތަކެތި ރައްކާކޮށް ގުދަންކުރުމަށް
9- ކެމިކަލް ގުދަންކުރުމަށް
ބިންކުއްޔަށް ނަގަން ބޭނުންވާ ފަރާްތްތަކަށް ބީލަން ހުށަހެޅުމުގެ ފުރުސަތު އިންނަމާދޫ ކައުންސިލުން މިހާރުވަނީ ހުޅުވާލާފައެވެ. ބީލަމުގައި ބައިވެރިވެވޭނީ ބިޑް ރެޖިސްޓްރޭޝަން ފޯރމް ފުރިހަމަ ކުރެއްވުމަށްފަހު ކައުންސިލް އީ-މެއިލް: [email protected] އަށް މެއިލް ކުރުމުން ނުވަތަ ކައުންސިލްގެ ނަންބަރ: 7380052 އަށް ވައިބަރކޮށްގެންނެވެ. ބީލަމުގައި ރަޖިސްޓްރީވެވޭނެ އެންމެ ފަހު ތާރީހަކީ 2025 ޖޫން 4 ވާ ބުދަ ދުވަހުގެ މެންދުރު 13:00 ކަމަށް ކައުންސިލުން ބުނެފައި ވެއެވެ. އަދި، ބީލަން ރަޖިސްޓްރީކުރުމަށް ދީފައިވާ މުއްދަތުގެ ފަހުން ހުށަހަޅާ ފޯމުތައް ބަލައިނުގަންނާނެކަމަށްވެސް ކައުންސިލުން ބުނެފައިވެއެވެ.
ބީލަމުގައި ބައިވެރިވެވޭ ފަރާތްތައް:
- ވިޔަފާރި ރަޖިސްޓްރީ ކުރުމުގެ ޤާނޫނުގެ ދަށުން ރަޖިސްޓްރީކޮސްފައިވާ ވިޔަފާރިތައް
- އަމިއްލަ ފަރުދުންގެ ވިޔަފާރީގެ ޤާނޫނުގެ ދަށުން ރަޖިސްޓްރީ ކޮށްފައިވާ އަމިއްލަ ފަރުދުންނަށް.
- ރަޖިސްޓްރީކުރެވި ހިންގަމުންދާ ކުލަބު ޖަމިއްޔާތައް،
- އަމިއްލަ ފަރުދުން
އިންނަމާދޫ ކައުންސިލުން ބުނީ، މި ބީލަމާއި ގުޅިގެން ފްރީ ބިޑް ބައްދަލުވުމެއް ނުބާއްވާނެކަމަށެވެ. އަދި، ބީލަން ހުޅުވުން އޮންނާނީ ޖޫން 15 ވާ އާދިއްތަ ދުވަހުގެ 13:00 ގައި ކައުންސިލް އިދާރާގައި ކަމަށާއި، ބީލަން ހުޅުވުމަށް އޮންނަ ބައްދަލުވުމުގައި ބައިވެރިވެވޭނީ ކަނޑައެޅިފައިވާ މުއްދަތުގައި ބީލަން ރަޖިސްޓްރީ ވުމަށް އެދި ފޯމު ހުށަހަޅައި ބީލަމުގައި ރަޖިސްޓްރީ ކުރެވިފައިވާ ކަމުގެ ސްލިޕް ފޯރުކޮށްދެވިފައިވާ ފަރާތްތަކަށް އެކަނި ކަމަށް އިންނަމާދޫ ކައުންސިލުން ބުނެފައިވެއެވެ.