އައްޑޫސިޓީގައި ”އިންޓަނޭޝަނަލް ފިޝް ހަބް“ އެއް ހަދަން ނިންމާފައިވާ ކަމަށް މޯލްޑްވިސް ޕޯޓްސް ލިމިޓެޑް (އެމްޕީއެލް) އިން ބުނެފި އެވެ.
އިއްޔެ އެ ކުމްފުނިން ބޭއްވި ނޫސްވެރިންގެ ބައްދަލުވުމެއްގައި ސީއީއޯ މުހައްމަދު ވަޖީހު އިބްރާހީމް ވިދާޅުވީ، އައްޑޫސިޓީގައި ފްރީ ޒޯނެއް ގާއިމުކޮށް އެތަނުގައި އިންޓަނޭޝަނަލް ފިޝް ހަބެއް ހެދުމަށް ނިންމާފައިވާ ކަމަށެވެ. އަދި ”އިންޓަނޭޝަނަލް ފިޝް ހަބް“ ތަރައްގީ ކުރާނީ ބޭރުގެ ވިޔަފާރިވެރިންނަށް އެތަނުގައި އިންވެސްޓު ކުރެވޭގޮތަށް ކަމަށްވެސް ވިދާޅުވި އެވެ.
”އޭރުން މިތަނަށް އަންނާނެ ދުނިޔޭގެ ބޮޑެތި މަހުގެ މަސައްކަތް ކުރާ ކުންފުނިތައް، އައިސް އެތަނުގައި އެ މީހުންގެ ފެކްޓްރީތަކާއި މި ހުރިހާ ކަމެއް އެތާގައި ޕްރޮސެސް ކޮށްފަ ދެން އެ މީހުން ދުނިޔޭގެ ތަންތަނަށް ފޮނުވާނީ.“ ވަޖީހު ވިދާޅުވި އެވެ.
ދިވެހި މަސްވެރިން ބާނާ މަސް ވިއްކުމަށްފަހު ފައިސާ ލިބުމުގައި ދިމާވާ ދަތިތަކަށް ހައްލެއް ހޯދައިދިނުމަށް އުފެއްދުންތެރި ވިސްނުމެއް ގެންގުޅެން ޖެހޭކަމަށާއި، ”އިންޓަނޭޝަނަލް ފިޝް ހަބް“ ތަރައްގީކުރަނީ މަސްވެރިން ބާނާ މަސްކޮޅު ވިއްކާލުމަށް ފަހު ފައިސާ ނުލިބިގެން އުޅޭތީ އެކަމަށް ހައްލެއް ގެނައުމުގެ ގޮތުން ކަމަށްވެސް އެމްޕީއެލްގެ ސީއީއޯ ވިދާޅުވި އެވެ.
މިިދިޔަ ޖެނުއަރީމަހު އެމްޕީއެލްއިން ވަނީ އައްޑޫ ޕޯޓްގައި ބަންކަރިން ޚިދުމަތްވެސް ފަށާނެކަމަށް ބުނެފައެެވެ. އޭރު ސީއީއޯ ވަޖީހު ވިދާޅުވެފައިވަނީ އައްޑޫ ސަރަހައްދުގެ ރައްޔިތުންނަށް، ކުރިއަށްއޮތް 3 މަސްދުވަހުގެ ތެރޭގައި އައްޑޫ ޕޯޓުން ބަންކަރިންގެ ޚިދުމަތް ދޭނެ ކަމުގެ ޔަޤީން ކަން ދޭ ކަމަށެވެ. އަދި އައްޑޫ ބަނދަރު ޒަމަނީ ފެންވަރަށް ތަރައްގީކޮށް ބަންކަރިންގެ ޚިދުމަތް ދޭންފެށުމުން އެޕޯޓަށް ލިބޭ އާމްދަނީ އިތުރުވެ، އިތުރު މުވައްޒަފުން ނަގަން ޖާގަލިބި، އެތަނުގައި ތިބި މުވައްޒަފުންގެ މުސާރައަށް ހެޔޮ ބަދަލުތަކެއް އަންނާނެ ކަމަށް އޭރު ވިދާޅުވި އެވެ.
2006 ގައި އައްޑޫ ޕޯޓް ބޭނުން ކުރަން ފެށިނަމަވެސް، އޭޝިއަން ޑިވެލޮޕްމަންޓް ބޭންކްގެ ލޯނު އެހީގައި ހިތަދޫ ޕޯޓް ތަރައްގީކޮށް، ދެކުނުގެ މައި ހަބްގެ ގޮތުގައި ހިދުމަތް ދޭން ފެށީ 2009 ވަނަ އަހަރު ޖުލައި މަހު އެވެ. މިއީ މާލެ ފިޔަވައި ރާއްޖޭގައި އޮޕަރޭޓް ކުރާ ތިން ބަނދަރުގެ ތެރޭގައި ހިމެނޭ އެއް ބަނދަރެވެ.