ދިވެހިރާއްޖޭގެ ކަނޑުގެ ޚާއްސަ އިގުތިސާދީ ސަރަހައްދުގައި މަސްވެރިކަން ކުރަމުންދިޔަ ދިވެހި މަސްދޯނިތަކަކަށް އިންޑިއާގެ ކޯސްޓްގާޑުގެ ސިފައިން އެރުމާއި ގުޅިގެން އެ ދޯނިތަކުގައި ތިބި މަސްވެރިންނަށް ސައިކޯސޯޝަލް ސަޕޯޓު ދިންކަމަށް ފިޝަރީޒް މިނިސްޓްރީން ބުނެފި އެވެ.
ސަރުކާރުގެ ހަފުތާ-14 މަގުޗާޓުގައި ހިމެނޭ އެ މިނިސްޓްރީގެ ކަންކަން ހާސިލުވި މިންވަރު ބަޔާންކުރުމަށް އިއްޔެ އެމިނިސްޓްރީން ބޭއްވި ނޫސްވެރިންގެ ބައްދަލުވުމުގައި، އިންޑިއާ ސިފައިން ދިވެހި މަސްވެރި އުޅަނދުތަކަށް އެރި މައްސަލައިގެ ސަބަބު ސާފުވެއްޖެތޯ ނޫސްވެރިއަކު ކުރި ސުވާލަށް ޖަވާބުދެއްވަމުން މިނިސްޓަރު އަހްމަދު ޝިޔާމް ވިދާޅުވީ އެމައްސަލާގައި ކަންބޮޑުވުން ފާޅުކޮށްފައިވާ ކަމަށާއި ވަރަށް ގާތުން އެ މަސްވެރިންގެ ހާލަތު ބެއްލެބި ކަމަށެވެ. އަދި އެކަމާއިގުޅިގެން ގުޅިގެން ބައެއް ދޯނިތަކުގެ ފަޅުވެރިންނަށް ސައިކޯސޯޝަލް ސަޕޯޓު ދީފައިވާކަމަށް މިނިސްޓަރު ވިދާޅުވި އެވެ. އެހެންނަމަވެސް ސައިކޯސޯޝަލްް ސަޕޯޓް ފޯރުކޮށްދިނީ ކިތައް މަސްވެރިންނަށްކަމާއި އެކަންކުރި ގޮތުގެ ތަފުސީލު މިނިސްޓަރު ހާމަކުރައްވާފައެއް ނުވެއެވެ.
”އެކަމާއި ގުޅިގެން އަޅުގަނޑުމެންނަށް ގަބޫލު ކުރެވުނީ ބައެއް ދޯނިތަކަށް އެހީތެރިކަންވެސް ބޭނުންވާކަމަށް…ގަބޫލުކުރެވިގެން އެބޭފުޅުންނަށް ސައިކޮލޮޖިކަލް ސަޕޯޓްވެސް މިނިސްޓްރީން ވާނީ ފޯރުކޮށްދީފައި.“ މިނިސްޓަރު ވިދާޅުވި އެވެ.
އިންޑިއާ ކޯސްޓްގާޑުގެ ސިފައިން ދިވެހި މަސްވެރި އުޅަނދުތަކަށް އެރި މައްސަލައިގެ އެއްވެސް ތަފުސީލެއް މިނިސްޓަރު ނުދެއްވައެވެ. ވިދާޅުވީ، ޑިފެންސް މިނިސްޓްރީއާއި، ފޮރިން މިިނިސްޓްރީން އެކަމާއި ގުޅޭ ކަންކަން ކުރާނެކަމުގެ ޔަގީންކަން ދީފައިވާ ކަމަށާއި، އެކަމާއި ގުޅުން ހުރި ކަންތައްތައް މިހާރުވެސް އެ ދެމިނިސްޓްރީން ކުރަމުން އަންނަކަމަށެވެ.
”އެނގިވަޑައިގަންނަވާނެ ޑިފެންސް މިނިސްޓްރީން ގެންދެވީ ވަރަށް ބޮޑަށް މީޑިއާތަކާއި އެ މައުލޫމާތު ހިއްސާކުރައްވަމުން. އަދި ފޮރިން މިނިސްޓްރީންވެސް އެކަމުގައި ކުރައްވަންހުރި ކަންތައްތައް ކުރައްވާނެކަމުގެ ޔަގީންކަން އަޅަުގަނޑުމެންނަށް ވަނީ ދެއްވާފައި. އަދި އެކަމުގެ ސަބަބާއި އެއީ ކީއްވެގެން ހިނގައިދިޔަކަމެއް ކަން. އަޅަުގަނޑުމެންނަށްވުރެ ބޮޑަށް މިކަމާއި ގުޅުންހުރި ވުޒާރާއާއެކު އެބޭފުޅުން ވާނީ އެކަންތައް އޮޅުން ފިލުވާފައި.“ މިނިސްޓަރު ވިދާޅުވި އެވެ.