މަސްވެރިންގެ ގައުމީ ދަފުތަރު އެކުލަވާލުމުގެ މަސައްކަތް މިއަހަރުގެ ޖޫން ނުވަތަ ޖުލައި މަހުގެ ނިޔަލަށް ފުރިހަމަ ކުރެވިގެންދާނެކަމަށް ފިޝަރީޒް މިނިސްޓަރު އަހްމަދު ޝިޔާމު ވިދާޅުވެއްޖެއެވެ.
މަސްވެރިންގެ ގައުމީ ދަފްތަރު އެކުަލަވާލުމުގެ ގޮތުން ދަފްތަރުގައި ރަޖިސްޓްރީ ވުމުގެ ފުުރުސަތު ހުޅުވާލުމަކީ ހަފުތާ-14 މަގުޗާޓުގައި ސަރުކާރުން ހިމަނާފައިވާ ވައުދެކެވެ.
ސަރުކާރުގެ ހަފުތާ-14 މަގުޗާޓުގައި ހިމެނޭ ފިޝަރީޒް މިނިސްޓްރީގެ މަސައްކަތްތައް ފުރިހަމަވެފައިވާ މިންވަރު ހާމަކުރުމަށް މިއަދު މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ދަފްތަރާއި ބެހޭގޮތުން މިނިސްޓަރު ވިދާޅުވީ، މިއަދާ ހިސާބަށް އާއިރު މަސްވެރިންނަކީ ދައުލަތް ދަންނަ ބަޔަކަށް ނުވާތީ މަސްވެރިންނަކީ ދައުލަތް ދަންނަ ބަޔަކަށް ހެދުމަށް ކުރެވޭ އެންމެ ބޮޑު މަސައްކަތަކީ ދަފްތަރު އެކުލަވާލުން ކަމަށެވެ. ދަފްތަރެއް ނެތުމުން މަސްވެރިންނަށް ބޭންކްތަކުން ދޫކުރާ ފެސިލިޓިސްތަކަށް އެކްސެސެނުވުމާއި ސަރުކާރުގެ މުވައްސަސާތަކާއި ކުންފުނިތަކުން ދޭ ޚިދުމަތްތައް މަސްވެރިންނަށް މިހާރު ނުލިބޭކަން ފާހަގަކުރައްވައި މިނިސްޓަރު ވިދާޅުވީ ދަފްތަރު ފުރިހަމަ ވެގެން ދިއުމާއެކު އެކަންކަމަށް ހައްލުލިބި މަސްވެރިންނަކީ ދައުލަތް ދަންނަ ވަޒިފާ އަދާކުރާ ބަޔަކަށް ވެގެންދާނެކަމަށެވެ.
މަސްވެރިންގެ ގައުމީ ދަފުތަރު އެކުލަވާލުމުގެ މަސައްކަތް ކުރިޔަށްދާ ގޮތް ހިއްސާކުރައްވަމުން މިނިސްޓަރު ވިދާޅުވީ މިދިޔަ ފެބްރުއަރީ މަހުގެ 16 ވަނަ ދުވަހު ދަފްތަރ އިފްތިތާހުކޮށ،ް ދަފްތަރުގައި ރަޖިސްޓްރީވުމުގެ ފުރުސަތު ހުޅުވާލާފައިވާ ކަމަށެވެ. އަދި ރަޖިސްޓްރީ ކުރުމުގެ މަސައްކަތް މަސްވެރިންނަށް އެކަނި ދޫކޮށް ނުލާ ކައުންސިލްތަކާއި ގުޅިގެން ދަފްތަރު އަދާހަމަ ކުރުމުގެ މަސައްކަތް ކުރަމުން އަންނަ ކަމަށެވެ. އަދި ދަފްތަރު ޖޫން/ ޖުލައި މަހުގެ ނިޔަލަށް ފުރުހަމަ ކުރެވޭނެކަމުގެ އުންމީދު ކުރެވޭ ކަމުގައި ވިދާޅުވި އެވެ.
”ދަފްތަރުގައި ރަޖިސްޓްރީ ވާން އެއޮތީ ހުޅުވާލާފައި. ހަމަ އެކަނި މަސްވެރިންނަށް ދޫކޮށްނުލާ އަޅުގަނޑުމެން ވުޒާރާއިން މިގެންދަނީކައުްނސިލްތަކާ އެކީގައި ވުހާވެސް އަވަހަކަށް މަސްވެރިންގެ ދަފްތަރު ފުރިހަމަ ކުރެވޭތޯ. އަޅުގަނޑުމެން މިއުންމީދު ކުރަނީ ޖޫން/ ޖުލައި ހިސާބުގައި ދަފްތަރު އެއްކޮށް ފުރިހަމަ ކުރެވޭނެކަމަށް.“ މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ދަފްތަރުގެ މަސައްކަތް ފުރިހަމަ ކުރުމުގެ ގޮތުން މިނިސްޓްރީގެ ޓީމެއް މިހާރުވެސް އައްޑޫ ސިޓީ، ފުވައްމުލައް ސިޓީ، ގއ، ގދ، ލ، ށ، އަދި ހދ އަތޮޅުގައި ހަރަކާތްތެރިވަމުން އަންނަކަމަށެވެ. އެއަށްފަހު މިޓީމުން ދެން ހަރަކާތްތެރިވާނީ ހއ، ޅ، ތ، އަދި މާލެއާއި ހުޅުމާލެ ސިޓީގައި ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ މަސްވެރިންގެ ދަފްތަރު އެކުލަވާލާއިރު، އޭގައި ހިމަނާނީ ހަމައެކަނި ކަޅުބިލަމަހާއި ކަންނެލި މަސްވެރިން ނޫންކަމަށާއި، މަސްވެރިކަމުގެ ސިނާއަތުގައި އެހެން ބާވަތްތަކުގެ މަސްވެރިކަން ކުރާ ފަރާތްތައްވެސް މި ދަފްތަރުގައި ހިމެނިގެން ދާނެކަމަށެވެ.
މިނިސްޓަރު ވިދާޅުވީ މަސްވެރިންގެ ގައުމީ ދަފްތަރު ފުރިހަމަވެގެން ދިއުމާއެކު، މަސްވެރިންނަށް ވަރަށް ބޮޑު ލުއިތަކެއް ލިބިގެންދާނެކަމަށެވެ. ވަކިން ޚާއްާސަކޮށް މަސްވެރިންނަށް ދައުލަތުން ފޯރުކޮށްދޭންޖެެހޭ ޚިދުމަތްތައް ދިނުމުގައި ލުއި ފަސޭހަތަކެއް ލިބި، މަސްވެރިންނަށް އެޚިދުމަތްތައް ހޯދުމަށް މަގުކޮށިގެން ދާނެކަމަށެވެ.