މަސްވެރިން އަތުން މިފްކޯއަށް މަސް ގަތް ފައިސާގެ ތެެރެއިން ޖެނުއަރީ ފަންސަވީހުގެ ނިޔަލަށް ހުރި ބިލުތަކަށް ފައިސާ މިއަދު ދޫކޮށްފި އެވެ.
މިފްކޯއިން މަސްވެރިންނަށް ފޮނުވި މެސެޖުގައި ބުނެފައިވަނީ، ޖެނުއަރީ ފަންސަވީހުގެ ނިޔަލަށް ދޭންޖެހޭ ފައިސާ މިހާރު ޖަމާކުރެވިފައިވާ ކަމަށެވެ.
”މަސްވެރިންގެ ސަމާލުކަމަށް! 25 ޖެނުއަރީ 2024 ގެ ނިޔަލަށް މަސްވެރިންނަށް ދޭން ޖެހިފައިވާ ފައިސާ މިހާރުވާނީ ޖަމާ ކުރެވިފައި. ޝުކުރިއްޔާ!“ މިފްކޯއިން ބުނެފައި ވެއެވެ.
މިފްކޯއިން އިތުރަށް ބުނެފައިވަނީ މޯލްޑިވްސް އިސްލާމިކް ބޭންކުގެ އެކައުންޓް ތަކަށް ބޭންކް އޮފް މޯލްޑިވްސް އިން ޓްރާންސްފަރ ކުރުމުގެ ޓެކްނިކަލް މައްސަލައެއް ދިމާވެފައިވާތީ އިސްލާމިކް ބޭންކް އެކައުންޓްތަކަށް ފައިސާ ޖަމާވެފައި ނުވާނެކަމަށެވެ. އަދި މައްސަލަ ހައްލުވުމުން ޖަމާ ކުރެވޭނެ ކަމަށް މިފްކޯއިން ބުނެފައި ވެއެވެ.
މިފްކޯއިން މީގެ ކުރިން ބުނެފައިވަނީ މަސްވެރިންގެ ބިލުތަކަށް ދޭން ހުރި ފައިސާގެ ”ބެކްލޮގް“ މިއަދުގެ ނިޔަލަށް ޚަލާސް ކުރާނެކަމަށެވެ. އެހެންނަމަވެސް ”ބެކްލޮގް“ ޚަލާސްވީކަމެއް އަދި ކަށަވަރެއް ނުވެއެވެ. ކެޔޮޅާއާ ވާހަކަ ދެއްކި މަސްވެރިއަކު ބުނީ ފައިސާ ދޫކޮށްފައިވަނީ 25 ރުފިޔާ ރޭޓުން މިފްކޯއިން ގަތް މަހަށް ކަމަށެވެ.