ކ. މާފުށީ ބަނދަރު އަޕްގްރޭޑް ކުރުމުގެ މަޝްރޫގެ %55.3 މަސައްކަތް ނިމިފައިވާ ކަމަށް ކޮންސްޓްރަކްޝަން މިނިސްޓްރީން ބުނެފި އެވެ.
މިނިސްޓްރީގެ ފަރާތުން މި މަޝްރޫއު އެމްޓީސީސީއާ ހަވާލުކުރީ 23 ޖެނުއަރީ 2023ގަ އެވެ. 82.6 މިލިއަން ރުފިޔާގެ މި މަޝްރޫއުގެ އަމަލީ މަސައްކަތް އެމްޓީސީސީން ފެށީ 29 މެއި 2023 ގައެވެ.
މި މަޝްރޫޢުގެ ދަށުން، 63,711 ކިއުބިކް މީޓަރުގެ ސަރަޙައްދެއްގެ އައު ހާބަރ ބޭސިން ފުންކުރުމާއި، 28,836 ކިއުބިކް މީޓަރުގެ ސަރަޙައްދެއްގެ ކުރިން ފުންކޮށްފައިވާ ފަޅު އަލުން ފުންކުރުމާއި، 4,414 ކިއުބިކް މީޓަރުގެ ސަރަޙައްދެއްގެ ނެރު ފުންކުރުމާއި، 31 މީޓަރުގެ ސަރަޙައްދެއްގައި ބޭރުތޮށި ލުމަށް ވަނީ ނިންމާފައެވެ. އަދި 680 މީޓަރުގެ ސަރަޙައްދެއްގައި ބޮޑުހިލައިގެ ރިވެޓްމެންޓް ޖެހުމާއި، 700 މީޓަރުގެ ސަރަޙައްދެއްގައި ޖިއޯބޭގް ރިވެޓްމެންޓް ޖެހުމަށް ވެސް ވަނީ ނިންމާފަ އެވެ.
މީގެ އިތުރުން 374 މީޓަރުގެ ސަރަޙައްދެއްގައި އެއްގަމުތޮށި ލުމާއި، 160 މީޓަރު ދިގު 2 މީޓަރު ފުޅާ ކޮންކްރީޓް ޖެޓީއެއް ހެދުމާއި، 19 މީޓަރު ދިގު 3 މީޓަރު ފުޅާ ބްރިޖެއް ހެދުމަށް ވެސް ވަނީ ނިންމާފައެވެ. އަދި 1,869 އަކަ މީޓަރުގެ ސަރަޙައްދެއްގައި ހާބަރ ޕޭވްމަންޓް ހެދުމާއި، ބަނދަރު ބައްތި ހަރުކުރުމުގެ މަސައްކަތް ވެސް ހިމެނެއެވެ.
ކޮންސްޓްރަކްޝަން މިނިސްޓްރީން ބުނީ، ބަނދަރުގެ އެއްގަމު ވާޓަރުގެ މަސައްކަތް މިހާރު އެއްކޮށް ނިންމައި މިހާރު ކުރިއަށް ދަނީ ބަނދަރު ފުން ކުރުމުގެ މަސައްކަތްކަމަށެވެ. އަދި، މުޅި މަޝްރޫއަށް ބަލާއިރު، %55.3 މަސައްކަތް ނިމިފައިވާ ކަމަށް ކޮންސްޓްރަކްޝަން މިނިސްޓްރީން ބުންޏެވެ.
މާފުށްޓަކީ ޓޫރިޒަމާއި މަސްވެރިކަމުގެ ސިނާއަތުގެ ހަރަކާތްތައް ގިނަ ރަށަކަށްވެފައި، އެރަށުގެ ބަނދަރަކީ މި ދެ ސިނާއަތުގައިވެސް ހަރަކާތްތެރިވާ ގިނަ އަދަދެއްގެ އުޅަނދުފަހަރު ބޭނުންކުރަމުން އަންނަ ބަނަދަރެކެވެ. ބަނދަރު ތަރައްގީވެގެން ދިއުމުން އެރަށަށް އަރާ ފޭބުމަށް ފަސޭހަވެ، އިގުތިސާދީ ހަރަކާތްތަކުގައި ބޭނުންކުރާ އޮޑިފަހަރަށް ފަސޭހައިން ގާތްކުރެވި، ވިޔަފާރި ހަރަކާތްތަކުން ލިބޭ ނަފާ އިތުރުވެގެންދާނެއެވެ.