މިދިޔަ ބުރާސްފަތި ދުވަހު މަސްވެރިން މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ)އަށް ވިއްކި މަހަށްވާ ފައިސާ ދޫކޮށްފި އެވެ.
މިފްކޯއިން މިއަދު އާންމުކުރި ތަފާސްހިސާބުތަކަށް ބަލާއިރު، މިދިޔަ ބުރާސްފަތި ދުވަހު މަސްވެރިން މިފްކޯއަށް 4.6 މިލިއަން ރުފިޔާގެ މަސް ވިއްކާފައި ވެއެވެ. މަސްވެރިން މިފްކޯއިން ކްރެޑިޓަށް ނަގާފަހުރި އައިހާއި ތެލަށްވާ އަގު އުނިކުރުމަށްފަހު މިއަދު ވަނީ މަސްވެރިންނަށް ފައިސާ ދޫކޮށްފަ އެވެ. މިފްކޯއިން ބުނާގޮތުގައި މަސްވެރިންނަށް ދޫކޮށްފައިވަނީ 3.6 މިލިއަން ރުފިޔާ އެވެ.
މިދިޔަ ހަފްތާގައި އެންމެ ގިނަ އޮޑިފަހަރު މިފްކޯއަށް މަސްކިރާފައިވަނީ ބުރާސްފަތި ދުވަހު އެވެ. އެދުވަހު 40 އޮޑިއަކުން މިފްކޯގެ އެކި ފެސިލިޓީތަކަށާއި، ބޯޓްތަކަށް މަސް ކިރާފައި ވެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅާ އެއްގޮތަށް، މަސްވެރިން މިފްކޯއަށް ވިއްކާ މަހަށް 48ގަޑީއިރުގެ ތެރޭގައި ފައިސާ ދޫކުރަން ފަށާފައިވަނީ މިދިޔަ އަހަރުގެ ޑިސެންބަރުމަހުގެ 10 ވަނަ ދުވަހު އެވެ. ބޭންކް އޮފް މޯލްޑިވްސްއާއި، ފިނޭންސް މިނިސްޓްރީއާއި، މިފްކޯއާ ދެމެދު ވެވުނު އެއްބަސްވުމެއްގެ ދަށުން، އެދުވަހުން ފެށިގެން މަސްވެރިންނަށް ދަނީ ގަވައިދުން ފައިސާ ދޫކުރަމުންނެވެ.