ތިނަދޫ ސިޓީގައި މިހާރު ތަރައްޤީކުރަމުން އަންނަ އިންޑަސްޓްރިއަލް ޒޯން ސަރަހައްދުގައި ގާއިމުކުރާ ކޯލްޑް ސްޓޯރޭޖްގެ ސިވިލް މަސައްކަތްތައް މެދުނުކެނޑި ކުރިޔަށްދާކަމަށް އެ މަސައްކަތުގެ ކޮންޓްރެކްޓަރ، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ(އެމްޓީސީސީ)އިން ބުނެފި އެވެ.
ތިނަދޫ އިންޑަސްޓްރިއަލް ޒޯންގައި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ)އަށް ކަނޑައަޅާފައިވާ ސަރަހައްދުގައި ގާއިމުކުރާ ކޯލްޑް ސްޓޯރޭޖްގެ ފައުންޑޭޝަން މަސައްކަތްތަކާއ،ި ޑީސަލް ޓޭންކްގެ ފައުންޑޭޝަން މަސައްކަތްތަކާއ،ި އެއް ފަންގިފިލާގެ 4,790 އަކަފޫޓުގެ އިދާރީ އޮފީސް އިމާރާތެއް ޤާއިމުކުރުމާއ،ި އެއް ފަންގިފިލާގެ 261 އަކަފޫޓުގެ ކެމިކަލް ރައްކާކުރާ ޢިމާރާތެއް ޤާއިމުކުރުމާއ،ި އެއް ފަންގިފިލާގެ 266 އަކަފޫޓުގެ ލޮނު ރައްކާކުރާ ޢިމާރާތެއް ޤާއިމުކުރުމުގެ މަސައްކަތް ހިމެނެއެވެ. އަދި 3,050.363 އަކަފޫޓުގެ ސަރަޙައްދެއްގައި ރ-ީއިންފޯރސްޑް ކޮންކްރީޓް ޕޭވިންގ އެޅުމުގެ މަސައްކަތްވެސް ހިމެނެއެވެ. ސައުދީ ޑެވެލޮޕްމެންޓް ފަންޑް(އެސްޑީއެފް) ގެ އެހީގައި ކުރިޔަށްގެންދާ މި މަޝްރޫއުގެ މަސައްކަތް އެމްޓީސީސީއާ ހަވާލުކޮށްފައިވަނީ 12 ޖުލައި 2023ގައެވެ.
މި މަޝްރޫއުގެ އެންމެ ފަހުގެ ތަފުސީލު ހާމަކުރަމުން އެމްޓީސީސީން އިއްޔެ ބުނެފައިވަނީ، ކޯލްޑް ސްޓޯރޭޖްގެ ސިވިލް މަސައްކަތާއި، ކެމިކަލް އަދި ލޮނު ރައްކާކުރާ ފެސިލިޓީގެ މަސައްކަތުގެ %52 މަސައްކަތް ނިމިފައިވާކަމަށެވެ. އަދި މިހާރު ކުރިޔަށްދަނީ ރޭނުމާއި ސިމެންތި ޖެހުން ފަދަ މަސައްކަތް ކަމަށް ބުނެފައި ވެއެވެ. އަދި ހަމަ އެކަނި ކޯލްޑް ސްޓޯރޭޖްގެ މަސައްކަތަށް ބަލާނަމަ %25 މަސައްކަތްވެސް ފުރިހަމަކުރެވިފައިވާކަމަށް އެމްޓީސީސީން ބުނެފައި ވެއެވެ. މީގެ އިތުރުން އިދާރީ އޮފީހުގެ %48 މަސައްކަތްވެސް ނިމިފައިވާކަމަށް އެ ކުންފުނިން ބުނެފައި ވެއެވެ.
ތިނަދޫ އިންޑަސްޓްރިއަލް ޒޯނުގައި ހުވަދު އަތޮޅުގެ މަސްވެރިންނަށް ބޭނުންވާ ހިދުމަތްތައް ފޯރުކޮށްދިނުމަށް 1,000 ޓަނުގެ މަސް ފިނިކުރާ ކޯލްޑް ސްޓޯރޭޖެއް ގާއިމުކުރުމުގެ މަސައްކަތް ހަލުވިކަމާއެކު ކުރިޔަށްދާއިރު، ސަރުކާރުގެ އަމާޒަކީ އަންނަ އަހަރަށް އެތަން ނިންމައި ޚިދުމަތް ދޭން ފެށުމެވެ. ފިޝަރީޒް މިނިސްޓަރު އަހްމަދު ޝިޔާމް މީގެކުރިން ބުނެފައިވަނީ، ތިނަދޫގެ ކޯލްޑް ސްޓޯރޭޖްގެ މަސައްކަތް 2025 ވަނަ އަހަރު ނިންމައި މަސްގަންނަން ފެށުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބޭނުންފުޅުވާ ކަމަށާއި، އެ މަސައްކަތް އަވަސްކުރުމަށް އެ ވުޒާރާއިން ކުރެވެންހުރި ކަންކަން ކުރަމުންދާ ކަމަށެވެ. ސަރުކާރުގެ މި އަމާޒަށް ވާސިލުވެވިއްޖެނަމަ ހުވަދު އަތޮޅު ދެކުނުބުރީގައި އެންމެ އަވަހަށް އޮޕަރޭޝަނަށް ގެނެވޭ ކޯލްޑް ސްޓޯރޭޖަކަށް މި ފެސިލިޓީ ވެގެން ދާނެއެވެ.
ހުވަދު އަތޮޅަކީ ރާއްޖޭގެ ދޮށީ މަސްވެރިކަމުގެ މައި މަރުކަޒަށްވެފައި، ދޮށީ މަސްވެރިކަމުގައި ހަރަކާތްތެރިވާ ރާއްޖޭގެ އެކި ސަރަހައްދަށް ނިސްބަތްވާ ގިނަ އޮޑިފަހަރުތައް އެ ސަރަހައްދުގައި ހަރަކާތްތެރިވަމުންދެއެވެ. އެ އޮޑިފަހަރުތަކުން ބާނާ ހުރިހައި މަހެއް ކޫއްޑޫ ފިޝަރީޒް ކޮމްޕްލެކްސް(ކޭއެފްސީ) އަށް ކިރޭނެ ކެޕޭސިޓީ އެ ފެސިލިޓީގައި ނެތުމަކީ މަސްވެރިންނަށް މިހާރު ކުރިމަތިވެފައިވާ އެންމެ ބޮޑު އެއް މައްސަލައެވެ. ތިނަދޫ ކޯލްޑް ސްޓޯރޭޖް ފެސިލިޓީ ނިންމައި ޚިދުމަތް ދޭން ފެށުމާއެކު މި މައްސަލައަށް ދާއިމީ ހައްލެއް ލިބިގެންދާނެއެވެ.