މަސްވެރިކަން މެނޭޖްކުރުމަށް ލަފާދޭ ކޮމިޓީތަކުގެ މަގާމުތަކަށް ކުރިމަތިލުމުގެ ފުރުސަތު ހުޅުވާލައިފި

ރާއްޖޭގައި ކުރަމުން އަންނަ އެކި ބާވަތްތަކުގެ މަސްވެރިކަން ރާވައި ހިންގައި ބެލެހެއްޓުމަށް އެކުލަވާލާފައިވާ ގަވާއިދުތަކުގެ ދަށުން، އެކި ބާވަތުގެ މަސްވެރިކަން މެނޭޖްކުރުމަށް ލަފާދޭ ކޮމިޓީތައް އެކުލަވައިލުމަށް ކަނޑައަޅައި، އެ ކޮމިޓީތަކުގެ މަގާމުތަކަށް ކުރިމަތިލުމުގެ ފުރުސަތު ފިޝަރީޒް މިނިސްޓްރީން ހުޅުވާލައިފި އެވެ.

ފިޝަރީޒް މިނިސްޓްރީން މިކަމާގުޅޭގޮތުން އާންމުކުރި އިއުލާނެއްގައި ބުނެފައިވަނީ ކަނޑުމަހުގެ މަސްވެރިކަން ރާވައި، ހިންގައި، ބެލެހެއްޓުމާބެހޭ ގަވާއިދާއި، ފާނަ މަސްވެރިކަން ރާވައި، ހިންގައި، ބެލެހެއްޓުމާބެހޭ ގަވާއިދާއި، ހިބަރުގެ މަސްވެރިކަން ރާވައި، ހިންގައި، ބެލެހެއްޓުމާބެހޭ ގަވާއިދާއި، ހުއިފިލަނޑާގެ މަސްވެރިކަން ރާވައި، ހިންގައި، ބެލެހެއްޓުމާބެހޭ ގަވާއިދު އަދި ފަރުމަހުގެ މަސްވެރިކަން ރާވައި، ހިންގައި، ބެލެހެއްޓުމާބެހޭ ގަވާއިދުގެ ދަށުން، މިއިން ކޮންމެ މަސްވެރިކަމެއް މެނޭޖްކުރުމަށް ލަފާދޭ ކޮމިޓީއެއް އެކުލަވައިލުމަށް ކަނޑައަޅާފައިވާކަމަށެވެ. އެގޮތުން އެކުލަވާލަން ކަނޑައެޅި 5 ކޮމިޓީތަކަކީ، ކަނޑުމަހުގެ މަސްވެރިކަން މެނޭޖްކުރުމަށް ލަފާދޭ ކޮމިޓީ، ފާނަ މަސްވެރިކަން މެނޭޖްކުރުމަށް ލަފާދޭ ކޮމިޓީ، ހިބަރުގެ މަސްވެރިކަން މެނޭޖްކުރުމަށް ލަފާދޭ ކޮމިޓީ، ފަރު މަސްވެރިކަން މެނޭޖްކުރުމަށް ލަފާދޭ ކޮމިޓީ އަދި ހުއިފިލަނޑާގެ މަސްވެރިކަން މެނޭޖްކުރުމަށް ލަފާދޭ ކޮމިޓީ އެވެ.

މިކޮމިޓީތަކުގެ މަސްއޫލިއްޔަތުތަކުގެ ތެރޭގައި، އެ މަސްވެރިކަމެއް މެނޭޖްކުރުމުގެ ޕްލޭން ތަންފީޛުކުރެވޭ މިންވަރު ބެލުމާއި ޕްލޭން ތަންފީޛުކުރެވޭ ގޮތުގެ ތަފުސީލު އަހަރަކު އެއް ފަހަރު މިނިސްޓަރަށް އެރުވުން؛ އެ މަސްވެރިކަމަކާ ގުޅޭ ފަންނީ އަދި އެހެނިހެން މަޢުލޫމާތު އެކުލެވޭ ރިޕޯޓްތައް މުޠާލިއާކުރުން؛ އެ މަސްވެރިކަމާ ގުޅޭ ފަންނީ މަޢުލޫމާތު އެކުލެވޭ ރިޕޯޓުތަކުންނާއި ކަމާ ގުޅޭ ފަރާތްތަކާއެކު ބޭއްވޭ މަސައްކަތު ބައްދަލުވުންތަކުން އަދި މަޝްވަރާ ބައްދަލުވުންތަކުން ނެރެވޭ ނަތީޖާތަކާއި ހުށަހެޅުންތަކާ ގުޅިގެން، އަޅަންޖެހޭ މެނޭޖްކުރުމުގެ ފިޔަވަޅުތަކާބެހޭ ގޮތުން މިނިސްޓްރީއަށް ލަފާ ދިނުން؛ ސަރަޙައްދީ ނުވަތަ ބައިނަލްއަގުވާމީ ފެންވަރުގައި އެ މަސްވެރިކަމާއި މަސްވެރިކަމުގެ ވިޔަފާރި މެނޭޖްކުރުމަށް އަޅާ ފިޔަވަޅުތައް ޤައުމީ ފެންވަރުގައި ތަންފީޛުކުރުމާ ގުޅޭގޮތުން މިނިސްޓްރީއަށް ލަފާ ދިނުމާއެކު، އެ މަސްވެރިކަމެއް މެނޭޖްކުރުމުގެ ޕްލޭން ތަންފީޛުކޮށް، މުޠާލިޢާކޮށް މުރާޖަޢާކުރުމާ ގުޅޭގޮތުން މިނިސްޓްރީއަށް ލަފާ ދިނުން ހިމެނެއެވެ.

ކުރިމަތިލުމަށް ހުޅުވާލާފައިވާ ކޮމިޓީތަކާއި، މަގާމުތަކުގެ ތަފްސީލު:

• ކަނޑުމަހުގެ މަސްވެރިކަން މެނޭޖްކުރުމަށް ލަފާދޭ ކޮމިޓީގެ މަޤާމުތައް:

1- ކަނޑުމަހުގެ މަސްވެރިކަމުގެ ބާވަތްތަކުގެ ތެރެއިން ވަދުނަނުގެ މަސްވެރިކަންކުރާ ފަރާތެއް؛

• ފާނަ މަސްވެރިކަން މެނޭޖްކުރުމަށް ލަފާދޭ ކޮމިޓީގެ މަޤާމުތައް:

1- ފާނަ މަސްވެރިން ތަމްސީލުކުރާ 1 މަންދޫބު

2- ފާނަ އެކްސްޕޯޓުކުރާ ފަރާތްތައް ތަމްސީލުކުރާ 1 މަންދޫބު

• ހިބަރުގެ މަސްވެރިކަން މެނޭޖްކުރުމަށް ލަފާދޭ ކޮމިޓީގެ މަޤާމުތައް:

1- ހިބަރުގެ މަސްވެރިކަންކުރާ ފަރާތްތައް ތަމްސީލު ކުރާ 3 މަންދޫބުން؛

• ފަރު މަސްވެރިކަން މެނޭޖްކުރުމަށް ލަފާދޭ ކޮމިޓީގެ މަޤާމުތައް:

1- ފަރުމަހުގެ މަސްވެރިން ތަމްސީލުކުރާ 2 މަންދޫބުން؛

2- ފަރުމަހުގެ ވިޔަފާރިކޮށް، އެކްސްޕޯޓުކުރާ ފަރާތްތައް ތަމްސީލުކުރާ 2 މަންދޫބުން؛

3- ދިވެހިރާއްޖޭގައި ރަޖިސްޓަރީކޮށްފައިވާ ކަމާ ގުޅޭ ޖަމްޢިއްޔާއެއް؛

• ހުއިފިލަނޑާގެ މަސްވެރިކަން މެނޭޖްކުރުމަށް ލަފާދޭ ކޮމިޓީގެ މަޤާމުތައް:

1- ހުއިފިލަނޑާގެ މަސްވެރިކަން ތަމްސީލުކުރާ 2 މަންދޫބުން؛

2- ހުއިފިލަނޑާގެ ބާވަތްތައް އެކްސްޕޯޓުކުރާ ފަރާތްތައް ތަމްސީލުކުރާ 2 މަންދޫބުން؛

މި މަޤާމުތަކަށް ކުރިމަތިލުމަށް އެދޭ ފަރާތްތަކުން އިއުލާނު ގައިވާ ލިޔެކިޔުންތައް 10 އޭޕްރިލް 2025 ވާ ބުރާސްފަތި ދުވަހުގެ މެންދުރު 12:00އިގެ ކުރިން ހުށަހަޅަން ޖެހެއެވެ. ލިޔެކިޔުންތައް މިނިސްޓްރީގެ ރިސެޕްޝަނަށް އަދި އީމެއިލް [email protected] އަށްވެސް ފޮނުވާލެވޭނެއެވެ.

ފިޝަރީޒް މިނިސްޓްރީން ބުނީ، މަންދޫބުންގެ ދައުރަކީ 5 އަހަރުގެ މުއްދަތެއްކަމަށާއި، މަންދޫބުން ހޮވުމުގައި، އެ މަސްވެރިކަމެއް ކުރާ ފަރާތްތައް ތަމްސީލު ކުރުމަށް ނުވަތަ އެ މަސްވެރިކަމުގެ ބާވަތްތައް ޕްރޮސެސްކުރާ ފަރާތްތައް ތަމްސީލުކުރުމަށް އެދި ހުށަހަޅާ ފަރާތެއް ނަމަ، މި މަސައްކަތުގައި ހަރަކާތްތެރިވެފައިވާ މުއްދަތަށް ރިޢާޔަތްކުރެވޭނެއެވެ. އަދި، ދިވެހިރާއްޖޭގައި ރަޖިސްޓަރީކޮށްފައިވާ ކަމާގުޅޭ ޖަމްޢިއްޔާގެ މަގާމަށް އެދި ހުށަހަޅާ ފަރާތެއް ނަމަ، މި ދާއިރާއިން އެ ޖަމްޢިއްޔާގެ ފަރާތުން ކޮށްފައިވާ މަސައްކަތްތަކަށް ރިޢާޔަތްކުރާނެކަމަށެވެ، މީގެ އިތުރުން، ޝައުގުވެރިކަން ފާޅުކޮށް އެއްވެސް ފަރާތަކުން ހުށަހަޅައިފައި ނުވާ ނަމަ، ނުވަތަ ޝައުގުވެރިކަން ފާޅުކޮށް ހުށަހަޅައިފައިވާ ފަރާތަކީ އެ މަޤާމުގެ މަސްއޫލިއްޔަތުތަކާއި ވާޖިބުތައް އަދާކުރުމަށް އެންމެ އެކަށީގެންވާ ފަރާތެއް ނޫންކަމަށް މިނިސްޓްރީއަށް ފެނިއްޖެ ނަމަ، އެކަމަށް އެންމެ އެކަށީގެންވާ ފަރާތެއް ނުވަތަ ފަރާތްތަކެއް އައްޔަނުކުރުމަށް މިނިސްޓްރީގެ ފިޝަރީޒް ޑިޕާޓްމަންޓްގެ ލަފާގެ މަތިން މިނިސްޓަރަށް ހުށަހެޅޭނެކަމަށް ފިޝަރީޒް މިނިސްޓްރީގެ އިއުލާނުގައި ވެއެވެ.

އިއުލާނުކޮށްފައިވާ މަގާމުތަކަށް، އިންތިޚާބީ ނުވަތަ ސިޔާސީ މަޤާމެއް އަދާކުރަމުންދާ ފަރާތްތަކަށް ކުރިމަތި ނުލެވޭނެއެވެ. އަދި، ސިޔާސީ ޕާޓީއެއްގެ އިސް މަޤާމެއް ފުރަމުންދާ ފަރާތްތަކަށްވެސް މިމަގާމުތަކަށް ކުރިމަތި ނުލެވެއެވެ.