މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އިން ގއ އަތޮޅުގައި ހިންގަމުން އަންނަ ކޫއްޑޫ ފިޝަރީޒް ކޮމްޕްލެކްސް(ކޭއެފްސީ) އަށް މަސްކިރަން ބޭނުންވާ އޮޑިފަހަރަށް، އެކުންފުނިން އައްޑޫ ސިޓީ ހިތަދޫގައި ހިންގަމުން އަންނަ އައިސް ޕްލާންޓުންވެސް ކިއު ނަންބަރު ނެގޭނެ އިންތިޒާމު ހަމަޖައްސައިފި އެވެ.
މިފްކޯއިން އެގޮތަށް ހަމަޖެއްސީ މިދުވަސްވަރަކީ މަސްވެރިކަން ރަނގަޅު ދުވަސްވަރަކަށްވެފައި، ގިނަ އޮޑިފަހަރުތައް މަހަށް ނިކުމެ މަސްބާނައިގެން މަސްކިރަން ކޫއްޑޫއަށް ދާތީ، ކިއުގައި ގިނައިރު މަޑުކުރަން ޖެހިދާނެކަމަށް ބަލައި، އެ އޮޑިފަހަރުތަކަަށް ފަސޭހައިން ކިއު ނަންބަރު ލިބޭނެ އިންތިޒާމުު ހަމަޖެއްސުމުގެ ގޮތުންނެވެ.
ކޫއްޑޫއަށް މަސް ކިރަން ބޭނުންވާ އުޅަނދުފަހަރަށް ހިތަދޫ އައިސް ޕްލާންޓުން ކިއު ނަންބަރު ދޫކުރަން ފެށީ މިއަދު އެވެ. މިއާއެކު ކިއު ނަންބަރު ދޫކުރަމުންދާ ސެންޓަރުތަކުގެ އަދަދުވަނީ 6އަށް އަރާފަ އެވެ. ކޫއްޑޫގެ އިތުރުން މީގެކުރިން ކިއު ނަންބަރު ދޫކުރަމުން އައިސްފައިވަނީ ގދ. ގައްދޫ، ގދ. ތިނަދޫ، ގދ. ފަރެސްމާތޮޑާ އަދި ގއ. ގެމަަނަފުށީ އައިސް ޕްލާންޓުންނެވެ.
މި ދުވަސްވަރު މަސްވެރިކަން ރަނގަޅުވުމާއެކު އަނެއްކާވެސް މަސްކިރާ ކިއުލައިން ވަނީ ބޮޑުވެފަ އެވެ. މަސްވެރި މޫސުމެއްގައި ގިނައިން މަސް ބާނާނަމަ، ސްޓޯރޭޖް ފުލްވެ ކިއުލައިން ބޮޑުވުމަކީ އާންމުކަމެކެވެ. ސަރުކާރުން މިހާރު ގެންދަނީ ފެސިލިޓީތަކުގެ ސްޓޯރޭޖް ބޮޑުކުރުމަށް ބޮޑެތި މަޝްރޫއުތައް ހިންގަމުންނެވެ. މަސްވެރިކަމުގެ ސިނާއަތުގެ ތަރައްގީއަށް ސަރުކާރުން ގެންގުޅޭ މި ޕްލޭނާއެކު މަސްވެރިން މަސް ކިއުގައި ތިބޭ ތިބުން ނިމުމަކަށް ގެނެވޭނެއެވެ. މިއަހަރަކީ މަސްވެރިން ކިއުގައި މަޑުކުރަންޖެހޭ ފަހު އަހަރުކަމަށް މަސްވެރިކަމާ ބެހޭ ވަޒީރު އަހްމަދު ޝިޔާމް ވިދާޅުވެފައި ވެއެވެ.