މަސްވެރިންނަށް އައިސް ފޯރުކޮށްދިނުމަށް އޮޕަރޭޓް ކުރަމުންދާ އައިސް ޕްލާންޓްތަކުން އައިސްޕްލާންޓް ހިންގުމުގެ ލައިސަންސް ނަގަން ފިޝަރީޒް މިނިސްޓްރީން އަންގައިފި އެވެ.
ފިޝަރީޒް މިނިސްޓްރީން 29 ސެޕްޓެމްބަރު 2024ގައި އާންމުކުރި ސާކިއުލާއެއްގައި ”މަސްވެރިކަމާ ގުޅުންހުރި ހަރަކާތްތަކަށް ލައިސަންސް ދިނުމާ ގުޅޭ ގަވާއިދު“ ގެ ދަށުން މިހާރު އައިސްޕްލާންޓްތައް ހިންގަމުންގެންދާ ފަރާތްތަކުން ލައިސަންސް ނަގަންޖެހޭގޮތަށް ކަނޑައަޅައި އައިސްޕްލާންޓްތައް ހިންގަމުންގެންދާ ފަރާތްތަކުން، އައިސްޕްލާންޓް ހިންގުމުގެ ލައިސަންސަށް އެދި 15 އޮކްޓޫބަރު 2024 ގެ ކުރިން ލިޔުމުން ނުވަތަ އީ-މެއިލް މެދުވެރިކޮށް ހުށަހަޅަން އެދިފައިވެއެވެ.
އެ ސާކިއުލާއަށް ހަވާލާދީ މިއަދު ފިޝަރީޒް މިނިސްޓްރީން އަނެއްކާވެސް ވަނީ އައިސް ޕްލާންޓްތައް ހިންގުމުގެ ލައިސަންސް ދިނުމާގުޅޭ ސާކިއުލާއެއް އާންމުކޮށްފަ އެވެ. އެ ސާކިއުލާގައި ބުނެފައިވަނީ މަސްވެރިންނަށް އައިސް ފޯރުކޮށްދިނުމަށް އައިސް ޕްލާންޓް ޤާއިމްކުރުމަށް ހިންގާ މަޝްރޫޢުތަކަކީ އައިސްޕްލާންޓް ޤާއިމްކުރުމުގެ މަސައްކަތް ފެށުމުގެ ކުރިން މަސްވެރިކަމުގެ މަޝްރޫޢުތައް ޤާއިމްކުރުމަށް ހުއްދަދިނުމުގެ ގަވާއިދުގެ ދަށުން ހުއްދަ ނަގައިގެން ފަށަންޖެހޭ މަސައްކަތެއްކަމުން، މިފަދަ މަޝްރޫޢުތައް ފެށުމުގެ ކުރިން ގަވާއިދުން މި މިނިސްޓްރީން އެކަމަށް ހުއްދަ ހޯއްދަވައިގެން އެމަޝްރޫޢުތައް ކުރިއަށް ގެންދިއުމަށް އަންގާކަމަށެވެ. އަދި މިގޮތުން ޤާއިމްކުރެވޭ އައިސްޕްލާންޓުން ޚިދުމަތް ދޭންފެށުމުގެ ކުރިން މަސްވެރިކަމާ ގުޅުންހުރި ހަރަކާތްތަކަށް ލައިސަންސް ދިނުމާ ގުޅޭ ގަވާއިދުގެ ދަށުން އައިސްޕްލާންޓް ހިންގުމުގެ ލައިސަންސް ނެގުމަށްވެސް އަންގާކަމަށެވެ.
މިހާރު އައިސް ޕްލާންޓްތައް ހިންގަމުންގެންދާ ފަރާތްތަކުންވެސް ”މަސްވެރިކަމާ ގުޅުންހުރި ހަރަކާތްތަކަށް ލައިސަންސް ދިނުމާ ގުޅޭ ގަވާއިދު“ގެ ދަށުން ލައިސަންސް ނަގަންޖެހޭގޮތަށް ކަނޑައަޅާފައިވެއެވެ. އެެހެންކަމުން އައިސްޕްލާންޓްތައް ހިންގަމުންގެންދާ ފަރާތްތަކުން އައިސްޕްލާންޓް އޮޕަރޭޓްކުރުމުގެ ލައިސަންސް ނެގުމާއެކު، އައިސްޕްލާންޓްގެ ދުވަހު މަޢުލޫމާތު ރިޕޯޓް މިނިސްޓްރީއަށް ގަވާއިދުން ހުށަހަޅަމުން ގެންދިއުމަށް މިނިސްޓްރީން އެދިފައި ވެއެވެ. އެގޮތުން، މިހާރު އޮޕަރޭޝަނުގައި ހުރި އައިސް ޕްލާންޓްތަކުން ގަވާއިދުން ފޮނުވަންޖެހޭ މަޢުލޫމާތު އައިސްް ވިއްކާ ޢަދަދާއި އައިސް ވިއްކި އުޅަނދުފަހަރުގެ ތަފްޞީލު މަހަކު އެއްފަހަރު މި މިނިސްޓްރީން ދޭ ”އައިސްޕްލާންޓްގެ ދުވަހު މަޢުލޫމާތު ފޯމް“ މެދުވެރިކޮށް ފޮނުވަމުން ގެންދިއުމަށްވެސް ހަނދާންކޮށްދީފައި ވެއެވެ.
މިކަމާއި ގުޅޭގޮތުން އިތުރު މަޢުލޫމާތު ސާފުކުރަން ބޭނުންވާ ފަރާތްތަކުން ފިޝަރީޒް މިނިސްޓްރީގެ ނަންބަރު:3339214 ނުވަތަ 3339215 ފޯނަށް ގުޅާލަައިގެން ނުވަތަ [email protected] އަށް އީމެއިލްކޮށްގެން މައުލޫމާތު ސާފުކޮށްލެވޭނެއެވެ.
މަސްވެރިކަމާ ގުޅުންހުރި ހަރަކާތްތަކަށް ލައިސަންސް ދިނުމާ ގުޅޭ ގަވާދުގައިވާގޮތުންނަމަ، އައިސް ޕްލާންޓް އޮޕަރޭޓްކުރުމަށް ލައިސަންސަށް އެދި ހުށަހަޅަންޖެހެނީ، ފިޝަރީޒް އިންފޮމޭޝަން ސިސްޓަމް (އެފް.އައި.އެސް) ”ކެޔޮޅު“ ސޮފްޓްވެއަރ މެދުވެރިކޮށްނެވެ. މަސްވެރިކަމުގެ އުޅަނދުފަހަރަށް އައިސް ވިއްކުމަށް ނުވަތަ އައިސް ފޯރުކޮށްދިނުމަށް ލައިސަންސް ދޫކުރަނީ 36 މަހުގެ މުއްދަތަަކަށެވެ. ލައިސަންސްއަށް ނަގަނީ 500ރުފިޔާގެ ފީއެކެވެ. އެ ލައިސަންސްގެ ދަށުން އައިސް ދޫކުރެވެނީ ލައިސަންސްގައި ބަޔާންކޮށްފައިވާ ވަގުތާއި ސަރަހައްދުތަކުގައި ލައިސަންސްގައި ބަޔާންކޮށްފައިވާ މަސްވެރިކަމާ ގުޅުންހުރި ހަރަކާތްތައް ހިންގުމަށް އެކަންޏެވެ. ލައިސަންސް ދޫކޮށްފައިވާ ފެސިލިޓީގައި ލައިސަންސްގެ ކޮޕީއެއް އާންމުކޮށް ފެންނާނޭހެން ބެހެއްޓުމާއި، ފިޝަރީޒް އެންފޯސްމަންޓް އޮފިސަރަކު ނުވަތަ ފިޝަރީޒް ރޭންޖަރަކު އެދިއްޖެނަމަ ލައިސަންސްގެ އަސްލު ނުވަތަ ލައިސަންސްގެ ކޮޕީ އެ ފަރާތަކަށް ދައްކަންޖެހެއެވެ. ލައިސަންސެއް ލިބިފައިވާ ފަރާތަކުން ކުށެއް ތަކުރާރުކޮށް ތިންވަނަ ފަހަރަށް ކޮށްފި ނަމަ، އެ ފަރާތަށް ދޫކޮށްފައިވާ ލައިސަންސް ބާތިލު ކުރެވެއެވެ. އަދި އެ ފަރާތަކަށް ލައިސަންސް އަލުން ދޫކުރެވޭނީ ލައިސަންސް ބާތިލުކުރާ ތާރީހުން ފެށިގެން 3 މަސްދުވަހުގެ މެދުކެނޑުމަކަށްފަހުގަ އެވެ.
ދިވެހިރާއްޖޭގެ މަސްވެރިކަމުގެ ޤާނޫނުގެ ދަށުން އެކުލަވާލާފައިވާ މަސްވެރިކަމުގެ މަޝްރޫޢުތައް ޤާއިމްކުރުމަށް ހުއްދަދިނުމުގެ ގަވާއިދާއި، މަސްވެރިކަމާ ގުޅުންހުރި ހަރަކާތްތަކަށް ލައިސަންސް ދިނުމާ ގުޅޭ ގަވާއިދަކީ، ދިވެހިރާއްޖޭގައި ހިންގާ މަސްވެރިކަމުގެ މަޝްރޫޢުތަކަކީ ދިވެހިރާއްޖޭގެ މަސްވެރިކަމުގެ ޞިނާޢަތަށް އެކަމުގެ މަންފާ އެދެވޭގޮތުގައި ކުރާނެ ގޮތަށް ފަރުމާކޮށްގެން ހިންގާ މަޝްރޫޢުތަކެއްކަން ކަށަވަރުކުރުމާއެކު، މަސްވެރިކަމުގެ މަޝްރޫޢު ޤާއިމްކުރުމަށް ހުއްދަ ހޯދުމާއި، އެ މަޝްރޫޢުތަކުގެ ދަށުން ޤާއިމްކުރާ ފެސިލިޓީތައް ހިންގުމަށް ލައިސަންސް ހޯދުމުގައި ޢަމަލުކުރަންޖެހޭ މަރުޙަލާތައް ކަނޑައަޅައި، ހަރުދަނާ އުޞޫލުތަކެއްގެ ތެރެއިން އެކަންކަން ތަންފީޒުކުރުމުގެ މަގުސަދުގައި އެކުލަވާލާފައިވާ ގަވާއިދުތަކެކެވެ.