back to top
29 C
Malé
- އިސްތިހާރު -spot_imgspot_img

މަގްބޫލް ލިޔުންތައް

ރަމަޟާންމަހުގެ ފުރަތަމަ 15ގައި މަސްވެރިން މިފްކޯއަށް 54.8މިލިއަން ރުފިޔާގެ މަސް ވިއްކައިފި

މަސްވެރިން މި ރަމަޟާންމަހުގެ ފުރަތަމަ 15 ދުވަހު 54.8 މިލިއަން ރުފިޔާގެ މަސް ސަރުކާރުގެ މަސްކުންފުނި، މިފްކޯއަށް ވިއްކާފައިވާކަން އެކުންފުނީގެ ތަފާސް ހިސާބުތަކުން ދައްކައިފި އެވެ.

މި ހިނގާ މަރޗްމަހުގެ 1 ވަނަ ދުވަހު ރަމަޟާން މަސް ފެށުނުނަމަވެސް، އާދައިގެ މަތިން މަސްވެރިން އެދުވަހު މަހަށް ނުފުރައެވެ. އަދި، ހުކުރު ދުވަހަކީ އާންމުކޮށް މިފްކޯއިން މަސްކިރާ ދުވަހަކަށް ނުވާތީ 7 އަދި 14 މަރޗް ވީ ހުކުރު ދުވަހު މަސްކިރާފައެއް ނުވެއެވެ. އެހެންކަމުން މި ދުވަސްތައް ނުހިމަނައި ރޯދައިގެ ފުރަތަމަ 15 ދުވަހުގެ ތެރެއިން 12 ދުވަހު 362 އޮޑިއަކުން މިފްކޯގެ އެކި ފެސިލިޓީތަކަށް 54.8 މިލިއަން ރުފިޔާގެ މަސް ވިއްކާފައި ވެއެވެ.

މަސްވެރިން ވިއްކާ މަހަށް ”48 ގަޑީއިރުގެތެރޭގައި ފައިސާ ދޫކުރުމުގެ ޕްލޭން“ގެ ދަށުން މިފްކޯއިން އެ މުއްދަތުގައި ގަތް މަހަށް 2މަރޗްއިން ފެށިގެން މިއަދުގެ ނިޔަލަށް ވަނީ ފައިސާ ދައްކާފައެވެ. މަސްވެރިން މިފްކޯއިން ކްރެޑިޓަށް ކުރިން ނަގާފަ ހުރި ތެލާއި އައިހަށްވާ ފައިސާ އުނިކުރުމަށްފަހު ދޫކޮށްފައިވަނީ 48.5 މިލިއަން ރުފިޔާއެވެ. އެހެންކަމުން، ރޯދައިގެ ފުރަތަމަ ފަނަރައިގައި މިފްކޯއަށް ވިއްކި މަހަށްވާ ފައިސާ މަސްވެރިންނަށް މިވަނީ ލިބިފަ އެވެ.

ރޯދައިގެ ފުރަތަމަ 15ގައި އެންމެ ގިނަ އަދަދެއްގެ އޮޑި މަސް ކިރާފައިވަނީ 9 ވަނަ ދުވަހުއެވެ. އެދުވަހު 45 އޮޑިން 6.2 މިލިއަން ރުފިޔާގެ މަސް މިފްކޯއަށް ވިއްކާފައި ވެއެވެ. މި މުއްދަތުގައި އެންމެ ގިނަ އަދަދަކަށް އޮޑިފަހަރުން މަސް ވިއްކާފައިވަނީ މިމަހުގެ 8 ވަނަ ދުވަހުއެވެ. އެދުވަހު 40 އޮޑިއަކުން 8.1 މިލިއަން ރުފިޔާގެ މަސް މިފްކޯއަށް ވިއްކާފައި ވެއެވެ.

ރޯދަމަހު މަސްވެރިން މަހަށް ނިކުންނަ އަދަދު ނިސްބަތުން ގިނައީ، ބަރާބަރަށް ފައިސާ ލިބި، މަސްވެރިކަން ރަނގަޅުވެފައިވާ މިދަނޑިވަޅުގައި އޮޑީގެ ޚަރަދު ފޫބެއްދޭވަރަށް މަސްބޭނި އޭގެއިން ލިބޭ މަންފާ އިތުރުވަމުންދާތީ އެވެ.

މަސްވެރިން މިފްކޯއަށް ވިއްކާ މަހަށް 48ގަޑީއިރުގެ ތެރޭގައި ފައިސާ ދިނުމަކީ ރައީސް ޑރ. މުއިއްޒުގެ ރިޔާސީ ވައުދުފުޅެކެވެ. އެ ވައުދާ އެއްގޮތަށް މަސްވެރިންނަށް ފައިސާ ދޫކުރަން ފެށީ މިދިޔަ އަހަރުގެ މަސްވެރިންގެ ދުވަސްކަމަށްވާ ޑިސެންބަރުމަހުގެ 10 ވަނަ ދުވަހު އެވެ. ގަވައިދުން ފައިސާ ދޫކުރަން ފެށުމާއެކު މަހަށް ނިކުންނަ އޮޑިތައް ގިނަވެ، މިފްކޯއަށް މަސް ކިރާ އަދަދު އިތުރުވެ، ރާއްޖެއިން ބޭރަށް ރޯ މަސް ބޭރު ކުރާ މިންވަރުވެސް ވަނީ ބޮޑުތަނުން އިތުރުވެފަ އެވެ.

މިލިޔުމާއި ގުޅޭ