ޓްރާންސްފޯރމިންގ ފިޝަރީޒް މެނޭޖްމަންޓް އިން ސައުތު ވެސްޓް އިންޑިއަން އޯޝަން ރީޖަން އެންޑް މޯލްޑިވްސް ޕްރޮޖެކްޓްގެ ދަށުން ރާއްޖެއިން ބޭރުން މަތީ ތަޢުލީމު ހޯދަން އެދި އެޕްލިކޭޝަން ހުށަހެޅުމުގެ ފުރުސަތު ހުޅުވާލައިފި އެވެ.
ދިވެހި ސަރުކާރާއި ވާރލްޑް ބޭންކް ގުޅިގެން ހިންގާ މި ޕްރޮޖެކްޓުގެ ދަށުން ބެޗެލަރސް ޑިގްރީ ފެންވަރުގެ ތިން ކޯހެއް އިއުލާނުކޮށް އެކަމަށް ޝައުގުވެރިވާ ފަރާތްތަކަށް އެޕްލިކޭޝަން ހުށަހެޅުމުގެ ފުރުސަތު މި މަހުގެ 13 ވަނަ ދުވަހު ފިޝަރީޒް މިނިސްޓްރީން ވަނީ ހުޅުވާލާފަ އެވެ. މި ކޯސްތަކަށް ކުރިމަތިލުމުގެ ސުންގަޑިއަކީ 13 އޭޕްރިލް 2025 ވާ އާދީއްތަ ދުވަހުގެ 12:00 އެވެ. ފިޝަރީޒް މިނިސްޓްރީން ބުނީ، ސްކޮލަރޝިޕް ލިބޭ ފަރާތްތަކުން ކޯސް ފުރިހަމަކުރުމަށްފަހު ސިވިލް ސަރވިސްގެ ޤަވާއިދުގައި ވާގޮތަށް، މިނިސްޓްރީގައި ޚިދުމަތް ކުރުމަށް ބޮންޑުކުރެވޭނެކަމަށެވެ.
ސްކޮލަރޝިޕަށް ކުރިމަތިލެވެނީ ޖީ.ސީ.އީ އޯލެވެލް އިމްތިހާނުގެ 05 މާއްދާއިން ’ސީ‘ އިން ފެށިގެން މަތީ ގްރޭޑެއް އަދި ޖީ.ސީ.އީ އޭލެވެލްގެ 03 މާއްދާއިން ’ސީ‘ އިން ފެށިގެން މަތީ ގްރޭޑެއް ޙާސިލުކޮށްފައިވާ ދަރިވަރުންނަށެވެ. އަދި، ފައުންޑޭޝަން ނުވަތަ ސަރޓިފިކެޓް ލެވެލްގެ ޔުނިވަރސިޓީ އެންޓްރެންސް ގަބޫލުކުރާ ސަނަދެއް ހާސިލްކޮށްފައިވާ ފަރާތްތަކަށްވެސް މި ކޯސްތަކަށް އެދި ކުރިމަތިލެވިދާނެއެވެ.
ކޯސްތަކުގެ ތަފްސީލު:
|
ކޯހުގެ ލެވެލް: |
ކޯހުގެ ދާއިރާތައް: |
ކޯހުގެ ޢަދަދު: |
|
ބެޗްލަރސް ޑިގްރީ |
ފިޝަރީޒް ސައިންސް/ މެރިން ސައިންސް |
02 |
|
ބެޗްލަރސް ޑިގްރީ |
އެކުއަކަލްޗަރ |
01 |
މި ސްކޮލަރޝިޕްގެ ދަށުން ކުރެވޭނެ ޚަރަދުތަކުގެތެރޭގައި، ކޯސް ފީ، ސްކޮލަރޝިޕްގައި ކިޔަވަމުންދާ މުއްދަތަށް އަހަރަކު އެއްފަހަރު ބުކް އެލަވަންސް، އެސްޓަބްލިޝްމަންޓް އެލަވަންސް، ޑިޕާރޗަރ އެލަވަންސް އަދި ސްކޮލަރޝިޕްގައި ކިޔަވަމުންދާ މުއްދަތަށް ސްޓައިޕަންޑް ހަމަޖެހޭނެކަމަށް މިނިސްޓްރީން ބުނެފައި ވެއެވެ.
ސްކޮލަރޝިޕާބެހޭ އިތުރު މަޢުލޫމާތު ހޯދުމަށް ބަންދުނޫން ކޮންމެ ދުވަހެއްގެ ހެނދުނު 08:00 އާއި 14:00 ދެމެދު 3033484 ނަމްބަރު ފޯނަށް ގުޅުމަށް ފިޝަރީޒް މިނިސްޓްރީން އެދިފައި ވެއެވެ.