ގއ. ދެއްވަދޫ އައިސް ޕްލާންޓް އޮޕަރޭޝަނަށް ގެނައުމުގެ އެންމެ ފަހުގެ ތައްޔާރީތައް ކުރިޔަށްދާކަމަށް ފިޝަރީޒް މިނިސްޓްރީން ބުނެފި އެވެ.
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އިން 2016 ވަނަ އަހަރުން ފެށިގެން ހިންގަމުން ދިޔަ ދެއްވަދޫ އައިސް ޕްލާންޓް އެމްޑީޕީގެ ވެރިކަމުގައި ފެނަކަ ކޯޕަރޭޝަނާ ހަވާލުކުރިއިރު، އެ އައިސް ޕްލާންޓް ބަރާބަރަށް އޮޕަރޭޓް ކުރަމުން ދިޔަނަމަވެސް މީގެ ތިން އަހަރުކުރިން އައިސް ޕްލާންޓްގެ ޚިދުމަތް މެދުކަނޑާލާ ބަންދުކުރި އެވެ.
މިދިޔަ އަހަރު ފެނަކަ ކޯޕަރޭޝަނުން އައިސް ޕްލާންޓްތައް ހިންގުން ހުއްޓާލަން ނިންމުމާއި ގުޅިގެން އަނެއްކާވެސް ފިޝަރީޒް މިނިސްޓްރީ މެދުވެރިވެ އައިސް ޕްލާންޓްގެ ހިންގުން މިހާރު ވަނީ މިފްކޯއާ ރަސްމީކޮށް ހަވާލުކޮށްފަ އެވެ. މިފްކޯއާ އެތަން ހަވާލުކުރިއިރު އެތަން ހުރީ ބޮޑެތި މަރާމާތުތައްކޮށްގެން ނޫނީ ޚިދުމަތް ނުދެވޭ ހާލަތުގަ އެވެ. އެހެންކަމުން އެތަން މަރާމާތުކުރުމުގެ މަސައްކަތް ކުރިޔަށް ގެންދިޔައީ ފިޝަރީޒް މިނިސްޓްރީންނެވެ.
ފިޝަރީޒް މިނިސްޓްރީން ބުނީ، އައިސް ޕްލާންޓް އަލުން އޮޕަރޭޝަނަށް ގެނައުމުގެ މަސައްކަތް ކުރިޔަށް ގެންދިޔައީ ގްރީން ރެފްރިޖަރޭޓަރ ނަމަކަށް ކިޔާ ކުންފުންޏަކާ ހަވާލުކޮށްގެން ކަމަށެވެ. އެ މަސައްކަތް އެ ކުންފުންޏާ ހަވާލުކުރީ 30 ދުވަހުގެ ތެރޭގައި ނިންމާގޮތަށް މިދިޔަ މަހުގެ 9 ވަނަ ދުވަހު އެވެ. އެ މަސައްކަތް ހަވާލުކުރީ 692،900 ރުފިޔާ އަށެވެ.
ދެއްވަދޫ އައިސް ޕްލާންޓްް އަލުން އޮަޕަރޭޝަނަށް ގެންނަނީ ށ ފޮނަދޫގައި ބޭނުންކުރި އައިސް ޕްލާންޓެއް ދެއްވަދޫއަށް ގެންގޮސް އިންސްޓޯލްކޮށްގެންނެވެ. މިނިސްޓްރީން ބުނީ އެ އައިސް ޕްލާންޓް މަރާމާތުކޮށް ކޮމިޝަން ކުރުމުގެ މަަރުހަލާ ފަށަން ތައްޔާރުވަމުން އަންނަކަމަށާއި، އަންނަ ހޮނިހިރު ދުވަހުގެ ނިޔަލަށް އައިސް ޕްލާންޓް ކޮމިޝަން ކުރުމަށްފަހު އާދީއްތަ ދުވަހު މިފްކޯއާ އެތަން ހަވާލުކުރާނެކަމަށެވެ.
ދެއްވަދޫގައި މިހާރު ބެހެއްޓި އައިސް ޕްލާންޓަކީ 25 ޓަނުގެ އައިސް އުފެއްދޭވަރުގެ ޕްލާންޓެކެވެ.
ފާއިތުވެ ދުވަސްތަކުގައި އައިސް ޕްލާންޓް ބަންދުކޮށްފައި ހުރުމުން ދެއްވަދޫ އޮޑިފަހަރުތަކާއި، އެ ސަރަހައްދުގައި ހަރަކާތްތެރިވާ އެހެން އޮޑިފަހަރުތައް އައިސް ގަންނަމުން ދިޔައީ ގއ. ކޫއްޑޫއިންނެވެ. އައިސް ގަންނަން އެ ކުރާ ދަތުރަކީ ޚަރަދުބޮޑު ދަތުރެއްގެ ގޮތުގައި އޮޑިވެރިން ބުނެފައި ވެއެވެ. ދެއްވަދޫ އައިސް ޕްލާންޓް ގިނަ ދުވަސްތަކަކަށްފަހު އޮޕަރޭޝަނަށް ގެނައުމަކީ ދެއްވަދޫ އޮޑިވެރިންނާއި، މަސްވެރިންނަށް ލިބިގެންދާނެ ވަރަށް ބޮޑު ހިތްހަމަޖެހުމެކެވެ.