ލ. މާވަށު ބަނދަރުމަތީ މަސްކަނޑާ އަށި ހެދުމުގެ މަސައްކަތް ކޮށްދިނުމަށް ޝައުޤުވެރިވެލައްވާ ފަރާތްތަކަށް އެކަމަށްއެދި އަންދާސީހިސާބު ހުށަހެޅުމުގެ ފުރުޞަތު އަލުން ހުޅުވާލައިފި އެވެ.
މިއީ މި މަސައްކަތަށް އެރަށު ކައުންސިލުން ބީލަމަށް ހުޅުވާލި ތިންވަނަ ފަހަރެވެ. ކައުންސިލުން ބުނިގޮތުގައި އެންމެ ފަހުން ޖެނުއަރީ މަހުގެ 15ގައި ނެރުނު އިއުލާނުގައިވާ ބީލަމުގެ ލިޔެކިއުންތަކަށް ބަދަލުގެންނަން ޖެހުމާއި ގުޅިގެން އެ އިއުލާނު ބާޠިލުކޮށް އިއްޔެ އަލުން ބީލަމަށް ހުޅުވާލާފައިވާކަމަށެވެ.
ބީލަން ހުށަހެޅުމާއި ބީލަން ހުޅުވުން އޮންނާނީ 2025 މާރޗް 20 ވާ ބުރާސްފަތި ދުވަހު 13:00ގައި ކައުންސިލް އިދާރާގެ ޖަލްސާކުރާ މާލަމުގައެވެ. އަދި، މިމަހުގެ 19 ވާ ބުދަ ދުވަހުގެ 12:00 ގެ ކުރިން ބީލަން ހުށައެޅުމަށް ރަޖިސްޓްރީ ކުރަންވާނެކަމަށް ކައުންސިލުން ބުންޏެވެ. ބީލަން ރަޖިސްޓްރޭޝަން ފީއަކީ -/150 ރުފިޔާއެވެ. ބީލަން ރަޖިސްޓްރީ ކުރަން ބޭނުންވާ ފަރާތްތަކުން ބީލަން ރަޖިސްޓްރޭޝަންފޯމް ފުރައި، ރަޖިސްޓަރޭޝަން ފީ ޖަމާކުރުމަށްފަހު، ފޯމާއި ސްލިޕް މި ކައުންސިލްގެ މެއިލްއެޑްރެސް އަށް ([email protected]) މެއިލް ކުރުމަށް ކައުންސިލުން އެދިފައި ވެއެވެ.
ކައުންސިލުން ބުނީ، މި ބީލަމުގައި ރަޖިސްޓްރީ ކުރެވޭނީ، ވިޔަފާރި ރަޖިސްޓްރީ ކުރުމުގެ ޤާނޫނުގެދަށުން ވިޔަފާރި ރަޖިސްޓްރީ ކޮށްފައިވާ ފަރާތްތަކަށް އެކަނިކަމަށެވެ. އަދި، ބީލަން ހުށައެޅުމަށް ރަޖިސްޓްރީ ނުކުރާ ފަރާތްތަކަށް ބީލަން ހުށައެޅުމުގެ ފުރުސަތު ނޯންނާނެކަމަށް ކައުންސިލުން ބުނެފައި ވެއެވެ.
މި ބީލަމާއި ގުޅޭގޮތުން އިތުރު މައުލޫމާތު ހޯދުމަށް ގުޅުއްވާނީ 6800718, 9832494 ނަންބަރު ފޯނަށެވެ. އީމެއިލް ކުރައްވާނީ [email protected] އީމެއިލް އަށެވެ.