މަސްވެރިންނަށް ސަރުކާރުން ދޭންހުރި ފައިސާ ދިނުން ލަސްވެގެން، މިދިޔަމަހު މަސްވެރިން ބޭއްވި އިހުތިޖާޖުން ފެނިގެންދިޔައީ މަސްވެރިކަމުގެ ސިނާއަތުގައި ހުރި މައްސަލަތައް ހައްލު ކުރަން މަސްވެރިންގެ ހުރި ޝައުގުވެރިކަންކަަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެއެވެ.
ވިލިގިލީ ދާއިރާއަށް ވެރިކަންކުރާ ކޯލިޝަނުގެ ޓިކެޓުގައި ވާދަކުރައްވާ ޔަޒްމީދު މުހައްމަދުގެ ކެމްޕޭންގެ މާލެ ޖަގަހަ ހުޅުވުމުގެ ހަފުލާގައި ވާހަކަފުޅު ދައްކަވަމުން މިިނިސްޓަރު ވިދާޅުވީ، ވިލިގިލި ދާއިރާއަކީ އެމަނިކުފާނުގެ ވުޒާރާއާއި ވަރަށް ގާތް މަސްވެރި ދާއިރާއެއްކަން ފާހަގަނކުރައްވައި، މަސްވެރިކަމުގެ ސިނާއަތް ކުރިއަރުވައި ތަރައްގީކުރުމުގައި ވިލިނގިލީ ދާއިރާގެ އެއްބާރުލުން ސަރުކާރަށް މުހިންމުކަމަށް ވިދާޅުވި އެވެ.
”ދިވެހިރާއްޖޭގެ މަސްވެރިކަމުގެ ސިނާއަތް ރައީސުލްޖުމްހޫރިއްޔާ ބޭނުންވާގޮތަށް މަސްވެރިކަމުގެ ސިނާއަތް ތަރައްގީ ކުރުމުގައި ވުލިގިލީ ދާއިރާގެ ރައްޔިތުންގެ ވިސްނުމާއި، ދާއިރާގެ ރައްޔިތުންގެ އެއްބާރުލުން އިންތިހާއަށް ރައީސުލްޖުމްހޫރިއްޔާ ބޭނުންފުޅުވާނެ. މަސްވެރިކަމުގެ ސިނާއަތް ރަނަގޅު ނުކުރެވޭނެ ވިލިނގިލީ ދާއިރާފެ އެހީތެރިކަމާއި އެއްބާރުލުމާއި ނުލާ.“ މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ، މަސްވެރިންގެ ހައްގުގައި އެންމެ ބޮޑަށް ވާކާލާތު ކުރާ އަޑުވެސް އިވިގެންދަނީވެސް ވިލިނގިލި ދާއިރާއިންކަމަށެވެ. އެގޮތުން ދާދިފަހުން ވިލިގިއްޔާއި އިންވެގެން އޮންނަ ކޫއްޑޫގައި ބޭއްވި އިހުތިޖާޖަކީ އެއީ މަސްވެރިކަމުގެ ސިނާއަތުގެ މައްސަލަތައް ޔަގީނުންވެސް ހައްލުކުރުމަށް މަސްވެރިން ހުރި ޝައުގުވެރިކަން އަދި ލޯބި ދައްކުވައިދިން އިހުތިޖާޖެއްގެ ގޮތުގައި ފާހަގަކުރެއްވި އެވެ.
”ރައީސުލްޖުމްހޫރިއްޔާއަށް ވިލިނގިލި ދާއިރާގެ މަސްވެރިން އިތް އުންމީދު އަޅަުގަނޑުމެންނަށް އިހުތިޖާޖުން ފެނިގެން ދިޔައީ.އިހުތިޖާޖުގެ ބައިވެރިންގެ ތެރޭގައިވިލިނގިލީ ދާއިރާގެ މަސްވެރިން އިސްކޮށް ހަރަކާތްތެރިވި“ މިނިސްޓަރު ވިދާޅުވި އެވެ.
އިހުތިޖާޖުގައި މަސްވެރިން ހިއްސާކުރި ކަންބޮޑުވުންތަކަށް އަމާޒުކުރައްވައި މިނިސްޓަރު ވިދާޅުވީ، މިސަރުކާރު ވެގެންދާނީ މަސްވެރިކަމުގެ ސިނާއަތުގެ މައްސަލަތަކަށް ދާއިމީ ފުރިހަމަ ހައްލު ގެނެސްދޭ ސަރުކާރަކަށް ކަމަށެވެ.
”އިރާދަކުރެއްވިއްޔާ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މިޒައާމަތް ވެގެންދާނީ މަސްވެރިިކަމުގެ ސިނާއަތުގައިހުރި މައްސަލަތަކަށް ޖުމްލަ، ވަގުތީ ހައްލެއް ނޫން… ދާއިމީ ޖުމްލަ ހައްލު ރައީސުލްޖުމްހޫރިއްޔާގެ ޒައާމަތުގައި ގެނެސްދެއްވާނެ.“ މިނިސްޓަރު ވިދާޅުވި އެވެ.
މަސްވެރިން މިދިޔަ މަހު ކޫއްޑޫއާއި އާއި އައްޑޫ ސިޓީ ފިޝަރީޒް ކޮމްޕްލެކްސްގައި ނުރުހުން ފާޅުކޮށް އިހުތިޖާޖު ކުރީ މިފްކޯއަށް މަސްކިރުވުމަށް ފަހު މަސްވެރިންގެ ބިލަށް ފައިސާ ނުދައްކައި ގިނަ ދުވަސްތަކެއް ވާތީ ހިތްހަމަ ނުޖެހިގެންނެވެ. ފިޝަރީޒް މިނިސްޓަރު އިހުތިޖާޖުގެ ބައިވެރިންނާއި ބައްދަލުކުރައްވައި އެމީހުންގެ ޝަކުވާތައް އަޑު އައްސަވައި، ހައްްލުގެންނަަން މަސައްކަތް ކުރެއްވި އެވެ. އަދި މަސްވެރިންނަށް ދޭން ހުރި ފައިސާ ބައި ބަޔަށް ބަހާލައިގެން ވަކި އުސޫލަކުން ދޫކުރާ ގޮތަށް ހަމަޖައްސަވައިދެއްވި އެވެ. އަދި އެ ވައުދާއި އެއްގޮަތަށް މަސްވެރިންނަށް ފައިސާ ދޫކުރުމުގެ ކަންކަން އެމަނިކުފާނުގެ ބެއްލުވުމުގެ ދަށުން ކުރިޔަށްގެންދާކަން ފާހަގަކުރެވެއެވެ.
މަސްވެރިންނަށް މިފްކޯއިން ދޭން ހުރި ފައިސާގެ ތެރެއިން މިހާތަނަށް 522 މިލިއަން ރުފިޔާ ވަނީ ދޫކޮށްފަ އެވެ. ބެކްލޮގްގެ ބާކީ މިމަހުގެ ފަހެއްގެ ކުރިން ދައްކާ ޚަލާސްކުރާނެކަމަށް ސަރުކާރުން ވަނީ ވައުދުވެފަ އެވެ. ސަރުކާރުން ބުނަނީ މަސްވެރިން މިހާރު ކިރާ މަހަށް ހަފުތާއިން ހަފުތާއަށް ފައިސާ ދޫކުރާނެކަމަށާއި، މުސްތަގުބަލުގައިމަސްކިރާތާ ސާޅިސް އަށްގަޑީއިރުގެތެރޭގައި ފައިސާ ދޫކުރެވޭނެ އިންތިޒާމުވެސް ހަމަޖައްސަދޭނެކަމަށެވެ.