މާޗް 11 ވަނަ ދުވަހުން ފެށިގެން، ރޯދަ ހަދިޔާ ދޫކުރާނީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ)ގެ ފިހާރަތަކުން ކަމަށް އާންމު ޚިދުމަތްތަކާ ބެހޭ ވަޒީރު އާދަމް ޝަރީފް އުމަރް ވިދާޅުވެއްޖެއެވެ.
އެކްސްގައި ހިއްސާކުރެއްވި ޕޯސްޓެއްގައި ވަޒީރު ވިދާޅުވެފައިވަނީ މިރެއާއި މާދަމާރޭ، މިހާރެކޭ އެއްގޮތަށް 13 މަރުކަޒުގައި ރޯދަ ހަދިޔާ ދޫކުރުން ކުރިޔަށްދާނެކަމަށެވެ. އަދި ގިނަ ފަރާތްތަކަކަށް ރޯދަ ހަދިޔާ ދޫކުރެވިފައިވުމާއެކު، މާޗް 11 ވަނަ ދުވަހުން ފެށިގެން، ރޯދަ ހަދިޔާ ދޫކުރާނީ މާލެ އަދި ހުޅުމާލޭގައި ހުރި މިފްކޯގެ ފިހާރަތަކުންކަމަށް ވަޒީރު ވިދާޅުވި އެވެ.
”މާލެ އަދި ހުޅުމާލޭގައި ހުރި މިފްކޯގެ 4 ފިހާރަ ހުޅުވިފައި ހުންނަ ގަޑި ތަކުގައި ދޫކުރުން(މަސްދަޅު ކޭސް ދޫކުރުން) ކުރިޔަށްދާނެ. ރޯދަ ހަދިޔާ ދޫކުރާ މަރުކަޒުތައް 11 ވަނަ ދުވަހުން ފެށިގެން ބަދަލުވީ ނަމަވެސް، ދޫކުރުން ކުރިޔަށްދާނީ މިހާރެކޭ އެއްގޮތަށް، އޮންލައިން ޓޯކަން ނިޒާމުގެ ތެރެއިންކަން ފާހަގަކުރަން.“ ވަޒީރު ވިދާޅުވެފައި ވެއެވެ.
ރޯދަ ހަދިޔާއަކަށް ކޮންމެ ގޭ ބިސީއަކަށް މަސްދަޅު ކޭހެއް ދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްޞަ ވަޢުދުފުޅެކެވެ. އެވައުދުފުޅާ އެއްގޮތަށް ގޭ ބިސީތަކަށް ހަދިޔާ ކުރަމުންދަނީ މިފްކޯގެ ފަސްމީރު ބްރޭންޑްގެ ތެލުގައި ރައްކާކޮށްފައި ހުންނަ 180ގ ބަރުދަނުގެ 48 މަސްދަޅުގެ ކޭހެކެވެ. ފެބްރުއަރީ މަހުގެ 20 ވަނަ ދުވަހު މާލެ ސަރަހައްދުގައި ރޯދަ ހަދިޔާ ބަހަންފަށާފައިވާއިރު 48 ހާސް ގޭބިސީއަކަށް ރޯދަ ހަދިޔާ ފޯރުކޮށްދެވިފައިވާކަމަށް ވަޒީރު އާދަމް ޝަރީފް އުމަރް ވިދާޅުވެފައި ވެއެވެ.އަދި ބޭނުންވާ ހުރިހާ ފަރާތްތަކަށް ރޯދަހަދިޔާ ލިބެންދެން އިންތިޒާމުތައް ކުރިޔަށްގެންދާނެކަމަށްވެސް ވަޒީރު ވިދާޅުވެފައި ވެއެވެ.