back to top
29 C
Malé
- އިސްތިހާރު -spot_imgspot_img

މަގްބޫލް ލިޔުންތައް

ޖެނުއަރީ މަހު ރޯމަސް އެކްސްޕޯޓް ކުރި މިންވަރު ބޮޑުތަނުން މައްޗަށް!

މިިދިޔަ އަހަރުގެ ޑިސެމްބަރު މަހާ އަޅާ ކިޔާއިރު މިއަހަރުގެ ޖެނުއަރީ މަހު ރާއްޖެއިން ބޭރަށް އެކްސްޕޯޓްކުރި ރޯމަހުގެ އަދަދު ބޮޑުތަނުން މައްޗަށް އަރައިފި އެވެ.

ކަސްޓަމްސްއިން އިއްޔެ އާންމުކޮށްފައިވާ ޖެނުއަރީމަހުގެ އިމްޕޯޓް އެކްސްޕޯޓް ތަފާސް ހިސާބުތައް ދައްކާގޮތުން ޖެނުއަރީ މަހު ރާއްޖެއިން 144 މިލިއަން ރުފިޔާގެ މުދާ އެކްސްޕޯޓްކޮށްފައިވާއިރު، އެންމެ ގިނަ އަދަދަކަށް އެކްސްޕޯޓްކޮށްފައިވަނީ މަހެވެ. އެމަހު ޖުމްލަ 127 މިލިއަން ރުފިޔާގެ މަސް އެކްސްޕޯޓްކޮށްފައި ވެއެވެ.ޑިސެންބަރުމަހު އެކްސްޕޯޓްކޮށްފައިވަނީ 97މިލިއަން ރުފިޔާގެ މަހެވެ.

ޖެނުއަރީ މަހު، މަސް އެކްސްޕޯޓްކޮށްފައިވާ ގޮތަށް ބަލާއިރު އެންމެ ގިނަ އަދަދަކަށް މަސް ބޭރުކޮށްފައިވަނީ ގަނޑުކޮށްގެން ނުވަތަ ފިނިކުރި ރޯަމަހުގެ ގޮތުގަ އެވެ. އެގޮތުން، އެމަހު ގަނޑުކުރި އަދި ފިނިކުރި ކަޅުބިލަމަހާއި ރީނދޫ އުރަހެލި ކަންނެލި ހިމެނޭހެން 92 މިލިއަން ރުފިޔާގެ ރޯމަސް އެކްސްޕޯޓްކޮށްފައިވާކަން ކަސްޓަމްސްގެ ތަފާސް ހިސާބުތަކުން ދައްކައެވެ. މިދިޔަ ޑިސެމްބަރު މަހު އެކްސްޕޯޓްކޮށްފައިވަނީ 49 މިލިއަން ރުފިޔާގެ ރޯމަހެވެ. އެހެންކަމުން ދެމަސް އަޅާކިޔާއިރު މިއީ 43 މިލިއަން ރުފިޔާގެ އިތުރުވުމެކެވެ.

ޖެނުއަރީ މަހު އެންމެ ގިނައިން އެކްސްޕޯޓްކޮށްފައިވަނީ ގަނޑުކުރި ކަޅުބިލަމަހެވެ. ޖެނުއަރީ މަހު 73 މިލިއަން ރުފިޔާގެ ގަނޑުކުރި ކަޅުބިލަމަސް އެކްސްޕޯޓްކޮށްފައިވާއިރު ޑިސެމްބަރު މަހު އެކްސްޕޯޓްކޮށްފައިވަނީ 20 މިލިއަން ރުފިޔާގެ ގަނޑުކުރި ކަޅުބިލަ މަހެވެ. ދެ މަސްއަޅާކިޔާއިރު މިއީ 53 މިލިއަން ރުފިޔާގެ އިތުރުވުމެކެވެ.

ޑިސެންބަރު މަހާ އަޅާކިޔާއިރު ޖެނުއަރީ މަހު ކަންނެލި މަސް ބޭރުކުރި މިންވަރު ދަށެވެ. ޑިސެމްބަރުމަހު، ގަނޑުކުރި ރީނދޫއުރަހަ ކަންނެއްޔާއި، ފިނިކުރި ތާޒާ ކަންނެލި މަސް(ކަނޑާ ޕެކްކޮށްފައި) ހިމެނޭހެން 29 މިލިއަން ރުފިޔާގެ ކަންނެލި މަސް ބޭރުކޮށްފައި ވެއެވެ. ޖެނުއަރީމަހު އެކްސްޕޯޓްކޮށްފައިވަނީ ގަނޑުކުރި ރީނދޫއުރަހަ ކަންނެއްޔާއި، ފިނިކުރި ތާޒާ މަސް(ކަނޑާ ޕެކްކޮށްފައި) ހިމެނޭގޮތަށް 19 މިލިއަން ރުފިޔާގެ ކަންނެލި މަހެވެ. މިއީ،10 މިލިއަން ރުފިޔާގެ ދަށްވުމެކެވެ.

ރޯމަސް އެތެރެކުރި މިންވަރު ޖެނުއަރީ މަހު އިތުރުވި ނަމަވެސް، މަސް ދަޅު ބޭރުކުރި މިންވަރު އެމަހު ވަރަށް ބޮޑުތަނުން ވަނީ ދަށަށް ގޮސްފަ އެވެ. ޑިސެންބަރު މަހު 48 މިލިއަން ރުފިޔާގެ މަސްދަޅު ބޭރުކޮށްފައިވާއިރު، ޖެނުައަރީ މަހު ބޭރުކޮށްފައިވަނީ 29 މިލިއަން ރުފިޔާގެ މަސް ދަޅެވެ. މިއީ،19 މިލިއަން ރުފިޔާގެ ދަށްވުމެކެވެ.

ޖެނުއަރީ މަހު ރާއްޖެއިން އެންމެ ގިނަ އަދަދަކަށް މަސް ބޭރުކޮށްފައިވަނީ ތައިލޭންޑް، އިނގިރޭސި ވިލާތް އަދި ވިއެޓްނާމަށެވެ. ކުރިން ދެވަނައިގަ އޮތް ތައިލޭންޑް މިހާރު ވަނީ ލިސްޓްގެ އެންމެ ކުރިއަށް އަރާފައެވެ. ޑިސެންބަރު މަހާ އަޅާކިޔާއިރު ޖެނުއަރީ މަހު ރާއްޖެއިން ތައިލޭންޑަށް އެތެރެކުރި މަހުގެ އަދަދު ތިންގުނަ އިތުރުވެފައި ވެއެވެ.

ޖެނުއަރީ މަހުގެ ޖުމްލަ އެކްސްޕޯޓަށް ބަލާއިރު ތައިލޭންޑް %47 ހިއްސާކުރެއެވެ. އެއީ،68 މިލިއަން ރުފިޔާގެ މުދަލެވެ. އޭގެ ކުރީ މަހު 22މިލިއަން ރުފިޔާގެ މުދަލާއެކު ތައިލޭންޑްގެ ހިއްސާއަކީ%19 އެވެ.

ތަފާސް ހިސާބުތައް ދައްކާގޮތުން ޖެނުއަރީ މަހު 5.2 ބިލިއަން ރުފިޔާގެ މުދާ އިމްޕޯޓްކޮށްފައިވާއިރު 144 މިލިއަން ރުފިޔާގެ މުދާ އެކްސްޕޯޓްކޮށްފައިވެއެވެ. މި މުއާމަލާތްތަކުން ދައުލަތަށް ޖުމްލަ 287 މިލިއަން ރުފިޔާގެ އާމްދަނީއެއް ލިބިފައިވެއެވެ.

 

މިލިޔުމާއި ގުޅޭ