back to top
28.1 C
Malé
- އިސްތިހާރު -spot_imgspot_img

މަގްބޫލް ލިޔުންތައް

މަސްވެރިކަމުގެ ލައިސަންސް ދޫކޮށްފައިވާ އުޅަނދުފަހަރުން މުދާ ސަޕްލައިކުރުން ހުއްޓުވަން ޖެހޭ

ފިޝަރީޒް މިނިސްޓްރީން ދޫކުރާ މަސްވެރިކަމުގެ ލައިސަންސް ނެގުމަށްފަހު މަހަށް ނުގޮސް، އަތޮޅުތަރެއަށް މުދާ ސަޕްލައި ކުރުމުގައި ހަރަކާތްތެރިވަމުން އަންނަ އޮޑިފަހަރުގެ ހަރަކާތްތައް ހުއްޓުވަން ޖެހޭ ކަމަށް މާލެ ސަރަހައްދުގެ ކެޔޮޅުން ބުނެފި އެވެ.

”ކެޔޮޅާ“ އާ ވާހަކަ ދެއްކި މާލެ ސަރަހައްދުގެ ކެޔޮޅުން ބުނީ، މަސްވެރިކަމަށް ލައިސަންސް ދޫކުރާ އޮޑިފަހަރުތަކަށް ތެލުގެ ސަބްސިޑީ ފަދަ އެތަކެއް އިނާޔަތްތައް ސަރުކާރުންދޭ ކަމަށެވެ. އެހެންނަމަވެސް، އެ ހުރިހައި އިނާޔަތެއް ލިބިގަނެގެން ތިބެ، އޭގެ ނާޖާއިޒު ފައިދާ ބައެއް އޮޑިފަހަރުން ނަގަމުންދާ ދިއުމަކީ ބަލައިގަނެވޭނެކަމެއް ނޫންކަމަށް ކެޔޮޅުން ބުންޏެވެ. އަދި މިއީ ފިޝަރީޒް މިނިސްޓްރީން ރަނގަޅަށް ރެގިއުލޭޓްކޮށް ހުއްޓުވަން ޖެހޭކަމެއްގެ ގޮތުގައި ކެޔޮޅުން ފާހަގަކުރިއެވެ.

މާލެ އަތޮޅު ކެޔޮޅުން ބުނީ، 2023 ވަނަ އަހަރާއި 2024 ވަނަ އަހަރުގެ ކުރީކޮޅު މަސްވެރިން މިފްކޯއަށް ކިރާ މަހަށް ފައިސާ ލިބުން ލަސްވުމުން ދިރިއުޅުމަށް ދަތިވެ، ބައެއް އޮޑިފަހަރު ސަޕްލައި ދޯނިތަކަށް ބަދަލުކޮށް އާމްދަނީ ހޯދަން މަސައްކަތް ކުރި ނަމަވެސް، މިހާރު އެ ހުއްޖަތް ދެއްކެން ނެތްކަމަށެވެ. އެއީ މިހާރު މިފްކޯއަށް ވިއްކާ މަހަށްވެސް ބަރާބަރަށް ފައިސާ ލިބޭތީ ކަމަށް ކެޔޮޅުން ބުންޏެވެ.

”އޮޑި ފަހަރު ސަޕްލައި ދޯންޏެއްގެ ގޮތުގައި ހަރަކާތްތެރިވަންޏާ މަސްވެރިކަމުގެ ލައިސަންސް ނުނަގާ ކުރަންވީ. އަހަރުމެންގެ މައްސަލައެއް ނެތް. އެކަމަކު މަސްވެރިކަމުގެ ލައިސަންސް ނަގައިގެން ތިބެ، އެކަހަލަ ކަންކަން ކުރީމަ ވަރަށް ސަކަރާތް. އަހަރުމެންނަށްވެސް ހުތުރު.ބައެއް އޮޑިފަަހަރުތައް އެއްގޮތަކަށްވެސް މިހާރު މަހަކަށް ނުފުރާ.ފިޝަރީޒް މިނިސްޓްރީން މިކަން ކުރާ އޮޑި ފަހަރު ބަލައި ފިޔަވަޅު އަޅަންޖެހޭ. މިކަން ހުއްޓުވަން ޖެހޭނެ.“ މާލޭ ކެޔޮޅަކު ބުންޏެވެ.

ކެޔޮޅު ބުނީ އެންމެ ދަތިވާ އެއްކަމަކީ މާލެ އުތުރު ހާބަރު ސަރަހައްދުން މަސްވެރި އުޅަނދުފަހަރަށް ޚާއްސަކޮށްފައި އޮންނަ ސަރަހައްދު އެފަދަ އޮޑި ފަހަރުން ގަވާއިދާ ޚިލާފަށް ބޭނުންކުރަމުންދިއުމެވެ. އަދި، މަސްވެރިކަމުގެ ލައިސަންސް އެ އޮޑިފަހަރުން ނަގާފަ އޮތުމުން، އެ ސަރަހައްދަށް ގާތްކޮށް މުދާ އަރުވައި ބޭލުމުގެ މަސައްކަތް ކުރަމުން އަންނާތީ މަހުން އައިސް ލަފަން ބޭނުންވާ މަސް އޮޑިވަހަރަށް އެ ސަރަހައްދުން ޖާގަ ނުލިބުމުގެ ދަތިކަންކަމަށެވެ.

”ރޯދަމަހު މި އަތޮޅުގެ ގިނަ މަސް އޮޑިފަހަރު ދާދި އެއް ފަހަރާ މަހުން ލަފާނީ. މަހުން އައިސް ގާތްކުރަން ބަލާއިރު، މިބުނާ އޮޑިފަހަރުތައް މިއޮންނަނީ މުދާ ބަރުކުރަން ގާތްކޮށްފަ. މުދާ އުފުލައިގެން އާމްދަނީ ހޯދިޔަސް އަހަރުމެންގެ މައްސަލައެއް ނެތް. އެކަމަކު މުދާ ބަރުކޮށް ސަޕްލައި ދޯންޏެއް ގޮތަށް ހަރަކާތްތެރިވަންޏާ، އެކަމަށް ޚާްއްސަކޮށްފަ އޮންނަ ސަރަހައްދު ބޭނުންކުރަންވީ އަހަރުމެންނަށް އުދަނގޫނުކޮށް. މަސްވެރިންގެ ނަން ބޭނުންކޮށްގެން ގަވައިދާ ޚިލާފަށް އުޅުން ބަލައެއް ނުގަނެވޭ. މިކަހަލަ ދޯނިތަކަށް ސަރުކާރުން ދީފަ އޮތް ލައިސަންސް އަތުލަންޖެހޭނެ.“ މާލޭ ސަރަަހައްދުގެ އެހެން ކެޔޮޅަކު ބުންޏެވެ.

މާލެ ސަރަހައްދުގެ ކެޔޮޅުން ބުނީ މާލޭ އުތުރު ބަނދަރުން މަސް އޮޑި ފަހަރަށް ޚާއްސަ ސަރަހައްދެއް ކަނޑައަޅާފައި އޮތް ނަމަވެސް އެ ސަރަހައްދުގެ ބޭނުން އެންމެ ރަނގަޅުގޮތުގައި މަސްވެރި އޮޑިފަހަރަށް މިހާރު ނުހިފޭ ކަމަށެވެ. ސަބަބަކީ މަސްވެރި ލައިސަންސް އޮވެ މުދާ އުފުލުމުގެ ޚިދުމަތް ދޭ ދޯނިތަކާއި އަދި މުދާ ސަޕްލައި ކުރާ އުޅަނދު ފަހަރުން އެ ސަރަހައްދު ނަހަމަގޮތުގައި ބޭނުންކުރުން ކަމަށެވެ. އެހެންކަމުން މިހާރު ސިޓީ ކައުންސިލާއި، މެރިން ޕޮލިހާއި، ފިޝަރީޒް މިނިސްޓްރީ ގުޅިގެން މިކަންކަން ބަލައި އަވަސް ފިޔަވަޅުތަކެއް އެޅުމަކީ އެންމެ ބޭނުންވާގޮތް ކަމަށް ކެޔޮޅުން ބުންޏެވެ.

 

 

މިލިޔުމާއި ގުޅޭ