އެހެން މަސައްކަތްތެރިންނެކޭ އެއްފަދައިން މަސްވެރިކަން ކުރާ ފަރާތްތަކަށްވެސް ކުރިޔަށް އޮތް ތާނގައި ރޯދަ އިނާޔާތް ލިބޭނެ އިންތިޒާމު ހަމަޖެހިގެންދާނެކަމުގެ ”ފެހި ސިގްނަލެއް“ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފި އެވެ.
ދ އަތޮޅަށް އެމަނިކުފާނު ކުރައްވަމުން ގެންދަވާ ދަތުރުފުޅުގައި އެއަތޮޅު މީދޫއަށް ވަޑައިގެން އެރަށުގެ ރައްޔިތުންނާ މުޚާޠަބްކުރައްވައި ދެއްކެވި ވާހަކަފުޅުގައި ރާއްޖޭގެ ތާރީޚުގައި ފުރަތަމަ ފަހަރަށް އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުންނަށް ރޯދަ އިނާޔާތް މިއަހަރު ހަމަޖެހިގެން ދިޔަކަން ފާހަގަކުރައްވައި ވިދާޅުވީ، ކުރިޔަށް އޮތް ދުވަސްތަކުގައި އެހެން ފަންނުތަކުގެ މަސައްކަތްތެރިންނަށްވެސް ރޯދަ އިނާޔަތް ލިބޭނެ އިންތިޒާމު ހަމަޖެއްސުމަކީ އެމަނިކުފާނު ބޭނުންފުޅުވާގޮތް ކަމަށެވެ.
ރޯދަ އިނާޔަތަކީ ނިޒާމުގެ ތެރެއިން މަސައްކަތް ކުރާ ކޮންމެ ދިވެއްސަކަށް ނުވަތަ މުސްލިމަކަށް ލިބެންޖެހޭނެ އެއްޗެއްކަން ގަބޫލުފުޅު ކުރައްވާކަމަށާއި، އެ އަމާޒަށް ވާސިލުވުމަށްް ސަރުކާރުން މަސައްކަތްކުރަމުން ގެންދާކަމަށްވެސް ރައީސް ވިދާޅުވި އެވެ.
”މިސާލަކަށް ގާނޫނީގޮތުން ކަންކަން ފަހިކޮށްގެން ކުރިޔަށް އޮތްތަނުގައި މަސްވެރިންނަށްވެސް އިރާދާކުރެއްވިއްޔާ އަޅުގަނޑު ބޭނުންވަނީ ރޯދަ އިނާޔަތް ލިބޭގޮތް ހަދަން.“ ރައީސް ވިދާޅުވި އެވެ.
މަސްވެރިންނަށް ރޯދަ އިނާޔާތް ދިނުމަށްޓަކައި ކަޑައްތުކުރަންޖެހޭ ގިނަ މަރުހަލާތަކެއް އެބަހުރިކަން ފާހަގަކުރައްވައި، މަސްވެރިންގެ ގައުމީ ދަފްތަރު އިއުލާނުކުރުމަކީ އޭގެ ފުރަތަމަ ފިޔަވަޅުކަން އެމަނިކުފާނު ބަޔާންކުރެއްވި އެވެ. އަދި، މަސްވެރިންނަކީ ދާއިމީ ގޮތެއްގައި މެދުކެނޑުމެއްނެތި އާމްދަނީ ލިބޭ ބައެއްކަން ބޭންކިންގ ނިޒާމް ތެރެއިން މިހާތަނަށް ދެނެގަނެވިފައި ނުވާކަން ފާހަގަ ކުރައްވައި ރައީސް ވިދާޅުވީ، ގާނޫނީ ގޮތުން ބަލައިގަންނަ މަސްވެރިންގެ ގައުމީ ދަފްތަރެއް އުފެއްދެވީ ނިޒާމްގެ ތެރެއިން ލިބެންޖެހޭ އިނާޔާތްތަކާއި ލުއި ފަސޭހަތައް މަސްވެރިންނަށް ފަހިކޮށްދެއްވުމުގެ ބޭނުމުގައި ކަމަށެވެ.
”އެ ދަފްތަރުގައި ޖެހޭ ފަރާތްތަކަށް ކުރިޔަށް އޮތް ދުވަސްތަކުގައި ބޭންކިންގ ނިޒާމުގެތެރެއިން ލޯނު ނެގުމާއި، އެސްޓީއޯ ކްރެޑިޓް ސްކީމް ލިބޭނެގޮތް ފަހިވެގެންގެންދާނެ މިއަހަރުތެރޭގަ.“ ރައީސް ވިދާޅުވި އެވެ.
ރައީސްގެ ވާހަކަފުޅު ނިންމަވާލެއްވީ މިހާރު ކުރިޔަަށްދާ މަރުހަލާތަކުގެތެރެއިން މާ ލަސްތަކެއް ނުވެ މަސްވެރިންނަށް ރޯދަ އިނާޔަތް ލިބޭނެގޮތް ހަމަޖެއްސޭނެކަމަށް އުންމީދުކުރައްވާކަމަށް ވިދާޅުވަމުންނެވެ. އަދި މަސްވެރިންނަށް ރޯދަ އިނާޔަތް ލިބޭތަން ދެކެން ބޭނުންވާކަންވެސް ފާޅުކުރެއްވި އެވެ.