ދ. ކުޑަ ހުވަދޫގައި ސަރުކާރުން ތަރައްގީ ކުރާ ވިޔަފާރި ބަނދަރު ވެރިކަމުގެ މިދައުރުގެ ތެރޭގައި އޮޕަރޭޝަނަށް ގެންނަވާނެކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފި އެވެ.
އެ މަނިކުފާނު މިފަދައިން ޔަޤީންކަން ދެއްވާފައި ވަނީ، ނިލަންދެއަތޮޅު ދެކުނުބުރީގެ މީހުން ދިރިއުޅޭ ހުރިހާ ރަށަކަށް މިހާރު ކުރައްވަމުން ގެންދަވާ ދަތުރުފުޅުގައި، އެ އަތޮޅު ކުޑަހުވަދޫއަށް ވަޑައިގެން ރޭ އެ ރަށުގެ ރައްޔިތުންނާ ބައްދަލުކުރައްވާ، ވާހަކަފުޅު ދައްކަވަމުންނެވެ.
ދ. ކުޑަހުވަދޫގައި ވިޔަފާރި ބަނދަރެއް ތަރައްޤީކޮށް ހިންގުމުގެ މަސައްކަތް އެމްޕީއެލްއާ ހަވާލުކުރުމުގެ އެއްބަސްވުމުގައި ރޭގެ ބައްދަލުވުމުގައި ވަނީ ސޮއިކޮށްފައި ވެއެވެ. ރައީސްގެ ވާހަކަފުޅުގައި އެ މަޝްރޫޢަށް އިޝާރާތް ކުރައްވައި، ވިދާޅުވީ ދ. ކުޑަހުވަދޫ ވިޔަފާރި ބަނދަރުގެ މަޝްރޫޢަކީ ސަރަޙައްދީ ގޮތުން ބަލާއިރު ވަރަށް އެކަށޭނަ، މަޢުޤޫލު މަޝްރޫޢެއް ކަމަށެވެ. އަދި، ސޮއި ކުރެވުނު އެއްބަސްވުމާއެކު ދެންވެސް ހުރި ހުރިހާ ކަމެއް ކުރިއަށް ގެންދެވި، އޭގެ އެންމެ ފުރިހަމަ ގޮތުގައި ހިނގާ، އޮޕަރޭޝަނަލް ބަނދަރެއްގެ ގޮތުގައި މި ވިޔަފާރި ބަނދަރު، މި ދައުރުގެ ތެރޭގައި ހައްދަވައި، ރައްޔިތުންނަށް ދައްކަވައި ދެއްވާނެކަމުގެ ޔަޤީންކަން، ރައީސުލްޖުމްހޫރިއްޔާ ދެއްވިއެވެ.
ބަނދަރުގެ މަޝްރޫޢަކީ ދ. ކުޑަ ހުވަދޫގައި ކުރިޔަށްގެންދާ އެންމެ މުހިންމު އެއް މަޝްރޫޢުކަން ފާހަގަކުރައްވައި ރައީސް ވިދާޅުވީ، ބަނދަރުގެ ޖާގަ ބޮޑުވެގެން ދިއުމަކީ މަސްވެރިންނާއި ވިޔަފާރިވެރިންގެ އިތުރުން އާންމު ރައްޔިތުންނަށްވެސް މުހިންމު، ދެކޮޅުޖެހެނިވި މަޝްރޫޢެއް ކަމަށެވެ. އަދި، މި މަސައްކަތްތައް ދާދި އަވަހަށް ފައްޓަވައި، މަޝްރޫޢު ނިންމަވައިދެއްވާނީ ރައްޔިތުން އުންމީދުކުރައްވާ ފެންވަރުގައި ކަމުގައިވެސް އެ މަނިކުފާނު ވިދާޅުވި އެވެ.
ދ. ކުޑަހުވަދޫއަކީ ރާއްޖޭގެ 7 ސަރަޙައްދެއްގައި ތަރައްޤީކުރާ އަރބަން ސެންޓަރުތަކުގެ ތެރެއިން އެއް މަރުކަޒެވެ.