ޗައިނާއިން ރާއްޖެއަށް އޯޑަރު ކުރާ ތާޒާ ކަނޑުމަހުގެ ފްރޯޒެން ކޮންޓެއިނަރ އިމްޕޯޓް ކުރުމުގެ އެއްބަސްވުމެއްގައި ރާއްޖޭގެ އެންސިސް ފިޝަރީޒް އާއި ޗައިނާގެ ޝިންގުއާން ޝޯވް ބެއިޖިން ކޮމާޝަލް މެނޭޖްމަންޓް ކޯޕަރޭޝަން އާ ދެމެދު އެއްބަސްވުމެއްގައި ސޮއިކޮށްފި އެވެ.
މިކަމަށް ޚާއްސަކޮށްގެން ބެއިޖިންގްގައި މިއަދު ބޭއްވި ރަސްއްމިއްޔާތެއްގައި އެންސިންގެ ފަރާތުން އެއްބަސްވުމުގައި ސޮއިކުރެއްވީ ޖެނެރަލް މެނޭޖަރ ހުސައިން އަފީފް އެެވެ. އަދި ޗައިނާ ކުންފުނީގެ ފަރާތުން ސޮއި ކުރެއްވީ ޗެއަރމަން ލިން ޔުޗެންގ އެވެ.
އެންސިސްގެ ޖެނެރަލް މެނޭޖަރ ހުސައިން އަފީފް ކެޔޮޅާއަށް ވިދާޅުވީ، ގަނޑުކުރި ތާޒާ ކަޅުބިލަމަހާއި، ކަންނެލި ކޮންސައިންމެންޓް ޗައިނާއަށް އެކްސްޕޯޓްކުރުމަށް ސޮއިކުރެވުނު މި އެބަސްވުމުގެ ދަށުން، ފުރަތަމަ ޝިޕްމެންޓް އަންނަ މެއި މަހު ޗައިނާއަށް ފޮނުވާނެކަމަށެވެ.
މި އެއްބަސްވުމަކީ ރާއްޖެ-ޗައިނާ މިނިވަން ވިޔަފާރީގެ އެއްބަސްވުން ތަންފީޒް ކުރަން ފެށުމާއެކު ރާއްޖެއިން ޗައިނާއަށް މަސް އެކްސްޕޯޓްކުރަން ދިވެހި ކުންފުންޏަކާއެކު ވެވުނު ފުރަތަމަ އެއްބަސްވުމެވެ. މިނިވަން ވިޔަފާރީގެ އެއްބަސްވުމުގެ ދަށުން ރާއްޖެއިން ޗައިނާއަށް އެތެރެކުރާ މަހުގެ އެއްވެސް ބާވަތަަކަށް ޑިއުޓީއެއް ނުނަގާނެއެވެ. އެންސިސް އިން ބުނީ، މިދަނޑިވަޅުގައި ޗައިނާއަށް މަސް އެކްސްޕޯޓްކުރަން ނިންމީ، ޗައިނާގެ މާކެޓްގައި މިވަގުތު ގަނޑުކުރި ރޯ މަހަށް އޮތް ޑިމާންޑް ބޮޑުވެފައި، އެކަހަލަ ކޮމްޕެޓެޓިވް މާކެޓަކަށް މިހާރު ވަދެއްޖެނަމަ، ރާއްޖޭގެ މަހުގެ އުފެއްދުންތަކަށް ޖާގަލިބި، އެއްބަސްވުމުގެ ދަށުން ރަނގަޅު ފައިދާއެއް ލިބިގެންދާނެކަމަށް ބެލެވޭތީ ކަމަށެވެ.
”މިހާރު ފުރަތަމަ ކޮންސައިންމެންޓް ގައި މި ސޮކުރެވުނީ. މިނިވަން ވިޔަފާރީގެ އެއްބަސްވުމުގެ ސަބަބުން މީގެ ކުރިން ޗައިނާއަށް މަސް އެތެރެކުރި އަގަށް ވުރެ ހެޔޮކޮށް އެކްސްޕޯޓް ކުރުމުގެ ފުުރުސަތު ފަހިވެގެން މިދިޔައީ. މާކެޓް އޮންނަގޮތުން މިހާރު ޔޫރަޕްގެ ސްޕެއިން ކަހަލަ ތަންތަނުން ރޯ މަސް ގެންގޮސްގެން ޗައިނާގަ ދަޅުގަ ބަންދުކުރަނީ. އެންސިސް އަށް ލިބޭނެ ފައިދާއަކީ މިހާރު ތައިލޭންޑަށްވުރެ ރަނގަޅު އަގެއްގަ ޗައިނާއަށް ރޯ މަސް ފޮނުވޭނެ ޕްރޮސެސް ކުރަން ދަޅަށް އަޅަން.%15-%20 އެބަކުޑަވޭ.“ އެންސިސްގެ ޖެނެރަލް މެނޭޖަރ ހުސައިން އަފީފް ވިދާޅުވި އެވެ.
އާންމުކޮށް މިހާރު އެންސިސްއިން ގަނޑުކުރި ރޯ މަސް އެކްސްޕޯޓްކުރަމުންދަނީ ޔޫރަޕްގެ ގައުމުތަކުގެ އިތުރުން ތައިލޭންޑް، ވިއެޓްނާމް އަދި މޮރިޝަސްއަށެވެ. މީގެ ކުރިން ޗައިނާއަށް ގަނޑުކުރި ތާޒާ ރޯމަސް އެންސިސްއިން އެކްސްޕޯޓްކޮށްފައެއް ނުވެއެވެ. އެހެންނަމަވެސް 2020ގެ ކުރީކޮޅު ޗައިނާގެ ޝަޝިމީ ރެސްޓޯރެންޓްތަކަށް މަދު އަދަދެއްގެ ތާޒާ ރޯ މަސް ވިއްކާފައި ވެއެވެ.
ހުސެން ވިދާޅުވީ، އޭރު ހުއްޓާލީ ޗައިނާއަށް އިމްޕޯޓްކުރާ މަހަށް ޑިއުޓީ ނެގުމުގެ އިތުރުން، ޗައިނާގެ އިމްޕޯޓަރުންގެ މެދުގައިވެސް އެދުވަސްވަރު މާބޮޑު ޝައުގުވެރިކަމެއް ނެތުމުންކަަށެވެ. އެހެންނަމަވެސް މިނިވަން ވިޔަފާރީގެ އެއްބަސްވުމާއެކު ރާއްޖެއިން ޗައިނާއަށް އެތެރެކުރާ މަހަށް ކުރިން ނަގަމުން އައި ޑިއުޓީ އުނިކޮށްފައިވުމާއެކު، ރާއްޖޭގެ މަހުގެ އުފެއްދުންތައް ޗައިނާއަށް އެކްސްޕޯޓްކުރާ މިންވަރު ބޮޑުތަނުން އިތުރުވެގެންދާނެކަމަށް ބެލެވޭކަމަށް ހުސެން ވިދާޅުވި އެވެ.
ހުސެން އިތުރަށް ވިދާޅުވީ، އެންސިސްއިން ދަޅާއި ޕައުޗްގައި މަސް ބަންދުކުރުން މިވަގުތަށް ހުއްޓާލާފައި އޮތްނަމަވެސް، އަލުން ޕްރޮޑަކްޝަން ފެށުމާއެކު، ޗައިނާއަށް އެ އުފެއްދުންތައްވެސް އެކްސްޕޯޓްކުރާނެކަމަށެވެ.
މިނިވަން ވިޔަފާރީގެ އެއްބަސްވުމެއްގައި ޗައިނާއާއެކު ރާއްޖެއިން ސޮއިކުރީ 2014 ވަނަ އަހަރުއެވެ. ނަމަވެސް މި އެއްބަސްވުމަށް އަމަލުކުރަންފެށީ މި އަހަރުގެ ޖެނުއަރީ މަހުގެ 1ވަނަ ދުވަހުއެވެ.