އޮޑިދޯނިފަހަރު ބަނުމަށާއި، މަރާމާތުކުރުމުގެ މަސައްކަތްކުރުމަށް ބ. ކިހާދޫން ދިގު މުއްދަތަކަށް ބިމެއް ކުއްޔަށް ދޫކުރަން އެ ރަށު ކައުންސިލުން ނިންމައިފި އެވެ.
ކިހާދޫ ކައުންސިލުން ބުނީ، އޮޑިދޯނިފަހަރު ބަނުމާއި މަރާމާތުގެ މަސައްކަތްތައް ކުރުމަށް 10 އަހަރުގެ މުއްދަތަށް ބީލަން އުސޫލުން ބިމެއް ކުއްޔަށް ދިނުމަށް ނިންމައި، ބިން ކުއްޔަށް ހިފަން ޝައުގުވެރިވާ ފަރާތްތަކަށް ބީލަމުގައި ބައިވެރިވުމުގެ ފުުރުސަތު މިއަދު ހުޅުވާލާފައިވާކަމަށެވެ. އަދި، ބީލަމުގައި ރަޖިސްޓްރީވެވޭނީ ފުރިހަމަކޮށްފައިވާ ’ބީލަމުގައި ރަޖިސްޓްރީވުމަށް އެދޭ ފޯމް‘ އާއި ބީލަން ފޮތަށް ފައިސާ ދެއްކިކަމުގެ ރެސިޕްޓް ކައުންސިލް އިދާރާގެ އީމެއިލް [email protected] އަށް އީމެއިލް ކުރުމުންކަމަށް ކައުންސިލުން ބުންޏެވެ.
ބީލަން ފޮތް ވިއްކަނީ 2،000.00ރުފިޔާ އަށް ކަމަށާއި، ބީލަން ފޮތް ގަތުމަށް ދައްކާ ފައިސާއަކީ ނޮން-ރިފަންޑަބަލް ފައިސާކަމަށް ކައުންސިލުން ބުންޏެވެ. އަދި، ބީލަން ފޮތް 2025 މާރިޗު 06 ވާ ބުރާސްފަތި ދުވަހުގެ 13:00 ގެ ނިޔަލަށް ކިހާދޫ ކައުންސިލް އިދާރާއިން ލިބެން ހުންނާނެކަމަށާއި، ބީލަން ފޮތް ނުގަންނަ ފަރާތަކަށް ބީލަމުގައި ބައިވެރި ނުވެވޭނެކަމަށްވެސް ކައުންސިލުން ބުނެފައި ވެއެވެ.
ކައުންސިލުން ބުނީ، ބީލަން ހުށަހެޅޭނީ ހަމައެކަނި ރާއްޖޭގައި ރަޖިސްޓްރީ ކުރެވިފައިވާ ސައްތައިންސައްތަ ދިވެހި އަމިއްލަ ވިޔަފާރިތަކަށާއި ކުންފުނިތަކަށާއި ދިވެހި ޕާޓްނަރޝިޕްތަކަށާއި، އަމިއްލަ ފަރުދުންގެ ވިޔަފާރީގެ ޤާނޫނުގެ ދަށުން ރަޖިސްޓްރީ ކޮށްފައިވާ ފަރާތްތަކަށާއި، ކުންފުނީގެ ޤާނޫނުގެ ދަށުން ރަޖިސްޓްރީ ކޮށްފައިވާ ފަރާތްތަކަށް އެކަނިކަމަށެވެ.
މި ބީލަމާ ގުޅިގެން ބީލަންފޮތް ގަންނަ ފަރާތްތަކަށް މައުލޫމާތު ދިނުމަށް ބާއްވާ ބައްދަލުވުން އޮންނާނީ 2025 މާރިޗު 10 ވާ ހޯމަ ދުވަހުގެ ހެނދުނު 11:15ގައި ކިހާދޫ ކައުންސިލްގެ އިދާރާގައެވެ. އަދި، ބީލަން ހުށަހެޅުމާއި ބީލަން ހުޅުވުން އޮންނާނީ 2025 މާރިޗު 17 ވާ ހޯމަ ދުވަހުގެ ހެނދުނު 11:15 ގައި ކިހާދޫ ކައުންސިލްގެ އިދާރާގައެވެ.
ބީލަމާއި ގުޅޭ އިތުރު މައުލޫމާތެއް ސާފުކުރަން ބޭނުންވާނަމަ 2025 މާރިޗު 12 ވާ ބުދަ ދުވަހުގެ 14:00 ގެ ކުރިން ލިޔުމަކުން ކައުންސިލް އިދާރާއަށް ހުށަހަޅަން ޖެހެއެވެ.