އަންނަ ރަމަޟާންމަހު ކޮންމެ ގޭ ބިސީއަަކަށް ހަދިޔާކުރަން ސަރުކާރުން ނިންމާފައިވާ މަސްދަޅުގެ ތެރެއިން މާލެ ސަރައްދުގެ ގޭ ބިސީތަކަށްވާ މަސްދަޅު ކޭސްތައް މާދަމާ ބަހަން ނިންމާފައިވާކަމަށް މާލެ ސިޓީ ކައުންސިލުން ބުނެފި އެވެ.
ސިޓީ ކައުންސިލުން ބުނީ، މާދަމައިން ފެށިގެން މިމަހުގެ 28ގެ ނިޔަލަށް ހުކުރު ދުވަސް ފިޔަވައި ކޮންމެ ދުވަހެއްގެ މެންދުރުފަހު 14:30 ން 18:00 އަށް އަދި ރޭގަނޑު 20:30 ން 23:00 އަށް މަސްދަޅު ކޭސް ބަހަމުންދާނެކަމަށެވެ. މަސް ދަޅު ކޭސް ބަހަނީ ކައުންސިލުން އެކަމަށް ކަނޑައަޅާފައިވާ ޚާއްސަ ސަރަހައްދުތަކުގައި ކަމަށްވެސް ކައުންސިލުން ބުނެފައި ވެއެވެ.
މަސްދަޅު ކޭސް ދޫކުރުމަށް ކަނޑައަޅާފައިވާ ސަރަހައްދުތައް:
- މާލޭ ސިޓީ ކައުންސިލް (ތައިސޭކޮށި، އާންމު ޚިދުމަތްތަކާބެހޭ ބައި)
- މާފަންނު މިފްކޯ (ގޯތިތެރެ)
- ހުޅުމާލެ ފޭސް 1 (އުމަރުޒާހިރު ބިލްޑިންގ
- ހުޅުމާލެ ފޭސް 2 (ހިޔާ ޓަވަރ 10 ގްރައުންޑް ފްލޯ)
- ވިލިމާލެ (ސިޓީ ކައުންސިލް އޮފީސް)
މަސް ދަޅު ހޯދަން ގޭބިސީތަކުންދާ ފަރާތްތަކުން އެ ގޭބިސީއެއްގެ އެންމެ ފަހު 3 މަހުގެ ކަރަންޓް ބިލުގެ ތެރެއިން ކަރަންޓް މީޓަރު އެނގޭނެފަދަ ލިޔުމަކާއި، އައި.ޑީ ކާޑް ގެންދަން ޖެހެއެވެ. މަސް ދަޅު ކޭސް ދޫކުރާނީ ހަމައެކަނި ދިވެހިންނަށް ކަމަށް ކައުންސިލުން ބުންޏެވެ.
އަންނަ ރަމަޟާންމަހު ކޮންމެ ގޭބިސީއަކަށް ސަރުކާރުގެ ހަރަދުގައި، މަސްދަޅު ކޭހެއް ދޭން ސަރުކާރުން ނިންމާފައިވާކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނުކުރެއްވީ ސަރުކާރަށް އެއް އަހަރު ފުރުން ފާހަގަކުރުމަށް ބޭއްވި ޖަލްސާގައެވެ. ސަރުކާރުގެ އެ ނިންމެވުމާ އެއްގޮތަށް ގޭ ބިސީތަކަށް ބަހަނީ މިފްކޯގެ ފަސްމީރު ބްރޭންޑްގެ ތެލުގައި ރައްކާކޮށްފައި ހުންނަ 180ގ ގެ މަސްދަޅު ކޭހެކެވެ.
ސަރުކާރުން ވަނީ މިދިޔަ ރޯދަ މަހު ކޮންމެ ގޭބިސީއަކަށް ހަނޑޫ އަދި ފުށް ބަސްތާއެއް ހަދިޔާ ކުރުމުގެ އިތުރުން ފެން ބިލާއި ކަރަންޓް ބިލަށް ޑިސްކައުންޓް ދީފަ އެވެ. މި އަހަރުވެސް ކަރަންޓާއި ފެންބިލުން ޑިސްކައުންޓް ދެއްވާނެކަމަށް ރައީސް މީގެކުރިން ވިދާޅުވެފައި ވެއެވެ.