މާލެ އުތުރުފަރާތު ފަޅުތެރޭގައި މަސްވެރިކަންކުރާ އުޅަނދުފަހަރަށް ޚާއްސަކޮށްފައިވާ ފަޅުތެރޭ ގަވައިދާ ޚިލާފަށް އަޅައިގެން ތިބޭ އުޅަނދުތަކުގައި ސްޓިކަރ ޖަހަން މާލެ ސިޓީ ކައުންސިލުން ފަށައިފި އެވެ.
ސިޓީ ކައުންސިލުން ބުނީ މަސްވެރިންނަށް ޚާއްސަ ސަރަހައްދުގައި ޤަވާއިދާއި ހިލާފަށް ބަނދަރުކުރާ މުދާ އުފުލާ އުޅަނދުތަކުގައި ސްޓިކަރ ޖަހަން ނިންމައި، އިއްޔެއިން ފެށިގެން ސްޓިކަރ ޖަހާނެކަން އުޅަނދުތަކަށް އަންގާފައިވާކަމަށެވެ.
ސިޓީ ކައުންސިލުން މިފަދަ ނިންމުމެއް ނިންމާފައިވަނީ މަސްވެރި އުޅަނދު ފަހަރަށް ޚާއްސަ ސަރަަހައްދަށް މުދާ އުފުލާ އުޅަނދުފަހަރުތަކުން އަބަދު ފުރާލާފައި އޮންނާތީ، މަހުން އަންނަ އޮޑި ފަހަރު ލަފާނެ ޖާގަ ލިބުމުގައި ދަތިވެ، މަސްވެރިންގެ ހައްގުގައި މަސައްކަތް ކުރާ ޖަމްއިއްޔާތަކުން އެކަމުގެ ކަނބޮޑުވުންތައް ފާޅުކުރަމުން އަންނަ ދަނޑިވަޅެއްގައެވެ.
ސިޓީ ކައުންސިލުން މިމަހުގެ ކުރީކޮޅު ވަނީ، މާލެއާއި ވިލިނގިލީގެ ފަޅު ބެލެހެއްޓުމާބެހޭ ޤަވާއިދާއި ޚިލާފަށް، އުޅަނދު ބަލަހައްޓާނެ ޒިންމާދާރު ފަރާތެއް ނެތި އެއްގޮތަކަށްވެސް ދަތުރުނުކޮށް ގިނަދުވަސްތަކެއް ވަންދެން ފަޅުތެރޭގެ އެކި ސަރަޙައްދުތަކުގައި އަޅާފައިހުރި އުޅަނދުފަހަރާއި، ރަޖިސްޓްރީ ނަމްބަރ އެއްގޮތަކަށްވެސް ނުޖަހާ ހުރި އުޅަނދުތަކެއް ނެގުމަށް އަންގާފަ އެވެ. ކައުންސިލުން އޭރު އެގޮތަށް އެންގީ، އެ އުޅަނދު ފަހަރުގެ ސަބަބުން ފަޅުގެ ޤަވާޢިދާ އެއްގޮތަށް ހުއްދަ ނަގައިގެން ފަޅު ބޭނުންކުރާ ފަރާތްތަކަށް ވަރަށް ބޮޑަށް ދަތިވަމުންދާކަމުގެ ޝަކުވާ ލިބެމުންދާތީކަމަށް ސިޓީ ކައުންސިލުން ބުނެފައިވެއެވެ.