ރ. އިންނަމާދޫގެ އިރު ދެކުނު ކަންމަތިން ލޮނުމަސް އެޅުމަށް ކަނޑައަޅާފައިވާ ސަރަހައްދުން ކުއްޔަށް ދިނުމަށް ނިންމާފައިވާ ބިންތައް ބީލަމަށް ހުޅުވާލައިފި އެވެ.
ލޮނުމަސް އެޅުމުގެ މަސައްކަތް ކުރުމަށް 30 ފޫޓް ދިގު 20 ފޫޓް ފުޅާ (600 އަކަފޫޓް)ގެ 04 ބިން ކުއްޔަށް ދިނުމަށް އެރަށު ކައުންސިލުން ނިންމާފައިވަނީ އެ ކައުންސިލްގެ 8 ވަނަ ޖަލްސާގަ އެވެ. ލޮނުމަސް އެޅުމާއި ލޮނުމަހުގެ ވިޔަފާރިކުރުމުގެ އިތުރުން މަސްކައްކާ ހިއްކުމަށް ބޭނުންކުރެވޭގޮތަށް މިބިންތައް ދޫކުރުމަށް ނިންމާފައިވަނީ ފަސް އަހަރަށްވުރެ ދިގުނޫން މުއްދަތަކަށެވެ. ބިންތައް ކުއްޔަށް ދޭން ނިންމައި އެންމެ ފުރަތަމަ ބީލަމަށް ހުޅުވާލީ މިދިޔަ އަހަރުގެ ޑިސެންބަރުމަހުގެ ތެރޭގައެެވެ. އެ ފަހަރު 4 ބިމުގެ ތެރެއިން 1 ނަންބަރު ބިން ވަނީ ކުއްޔަށް ދޫކޮށްފަ އެވެ.
ކުއްޔަށް ނުދީ ބާކީ އޮތް ތިން ބިން އަލުން ކުއްޔަށް ނެގުމަށް ޝައުގުވެރިވާ ފަރާތްތަކަށް އަނެއްކާވެސް ބީލަމުގައި ރަޖިސްޓްރީވުމުގެ ފުރުސަތު ކައުންސިލުން ވަނީ ހުޅުވާލާފަ އެވެ. ކައުންސިލުން ބުނީ، ބީލަން އުސޫލުން ކުލީބިން ހޯދަން އެދޭ ފަރާތްތަކުން ބިޑް ރެޖިސްޓްރޭޝަން ފޯރމް ފުރިހަމަ ކުރުމަށްފަހު ކައުންސިލް އިދާރާގެ އީ-މެއިލް: [email protected] އަށް މެއިލް ކުރުމުން ނުވަތަ ކައުންސިލްގެ ނަންބަރ: 7380052 އަށް ވައިބަރ ކުރުމުން ބީލަމުގައި ރަޖިސްޓްރީ ކުރެވޭނެ ކަމަށެވެ.
ބީލަމުގައި ބައިވެރިވެވޭ ފަރާތްތައް:
- ވިޔަފާރި ރަޖިސްޓްރީ ކުރުމުގެ ޤާނޫނުގެ ދަށުން ރަޖިސްޓްރީކޮސްފައިވާ ވިޔަފާރިތައް
- އަމިއްލަ ފަރުދުންގެ ވިޔަފާރީގެ ޤާނޫނުގެ ދަށުން ރަޖިސްޓްރީ ކޮށްފައިވާ އަމިއްލަ ފަރުދުންނަށް.
- ރަޖިސްޓްރީކުރެވި ހިންގަމުންދާ ކުލަބު ޖަމިއްޔާތައް،
- އަމިއްލަ ފަރުދުން
ބީލަމުގައި ރަޖިސްޓްރީވުމުގެ ސުންގަޑިއަކީ 20 ފެބްރުއަރީ 2025 ވާ ބުރާސްފަތި ދުވަހުގެ ހެނދުނު 10:00 އެވެ. ބީލަން ރަޖިސްޓްރީކުރުމަށް ދީފައިވާ ގަޑީގެ ފަހުން ހުށަހަޅާ ފޯމުތައް ބަލައި ނުގަންނާނެކަމަށް ކައުންސިލުން ބުނެފައި ވެއެވެ.
ބިޑާއި ގުޅިގެން ފްރީ ބިޑް ބައްދަލުވުމެއް 20 ފެބްރުއަރީ 2025 ވާ ބުރާސްފަތި ދުވަހުގެ މެންދުރު 13:00 ގައި ކައުންސިލް އިދާރާގައި ބާއްވަން ނިންމާފައިވާއިރު، ބީލަން ހުޅުވުން އޮންނާނީ 23 ފެބްރުއަރީ 2025 ވާ އާދިއްތަ ދުވަހުގެ 13:00 ގައި ކައުންސިލް އިދާރާގައެވެ. ބީލަން ހުޅުވުމަށް އޮންނަ ބައްދަލުވުމުގައި ބައިވެރިވެވޭނީ ކަނޑައެޅިފައިވާ މުއްދަތުގައި ބީލަން ރަޖިސްޓްރީ ވުމަށް އެދި ފޯމު ހުށަހަޅައި ބީލަމުގައި ރަޖިސްޓްރީ ކުރެވިފައިވާ ކަމުގެ ސްލިޕް ފޯރުކޮށްދެވިފައިވާ ފަރާތްތަކަށް އެކަނި ކަމަށް އިންނަމާދޫ ކައުންސިލުން ބުނެފައިވެއެވެ.