މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އިން ފާއިތުވި 15 މަސްތެރޭ އެންމެ ގިނަ އަދަދަކަށް މަސް ގަނެފައިވަނީ މިމަހުގެ 12 ވަނަ ދުވަހު ކަމަށް، އެކުންފުނިން ބުނެފި އެވެ.
މިފްކޯއިން ބުނީ މިފްކޯގެ ފެސިލިޓީސްތަކާއި، ކަލެކްޓަރ ވެސެލްތަކަށް ފާއިތުވި 15 މަސް ދުވަހު މަސްކިރުވާފައިވާ ގޮތުގެ ތަފްސީލަށް ބަލާއިރު، މި މުައްދަތުގެ ތެރޭގައި އެ ކުންފުންޏަށް އެންމެ ގިނަ އަދަދަކަށް މަސް ކިރުވާފައިވަނީ އިއްޔެ ކަމަށެވެ. އެގޮތުން، އިއްޔެ 546 މެޓްރިކް ޓަނުގެ މަސް ކިރުވާފައިވާކަމަށް މިފްކޯއިން ބުނެފައި ވެއެވެ.
މަސްވެރިކަން ރަނގަޅުވެ ގިނަ އޮޑިފަހަރުތައް މަހަށް ނިކުމެފައިވާއިރު، އެންމެ ބާރު ބޮޑުވެފައިވަނީ ދޮށީ މަސްވެރިކަމުގެ މައި މަރުކަޒުކަމަށްވާ ކޫއްޑޫ އަށެވެ. ކޫއްޑޫއަށް މަސް ކިރާ ކިއު ދިގުލައިގެން ދިއުމުގެ ސަަބަބުން މިފްކޯއިވަނީ، އެއްވެސް ހިފެހެއްޓުމެއް ނެތި އޮޑި ފަހަރަށް މަސްކިރޭނެ އިންތިޒާމު ހަމަޖެއްސުމުގެ ގޮތުން ބޮޑު އޮޕަރޭޝަނެއް ފަށާފައެވެ. މި އޮޕަރޭޝަންގެ ދަށުން މަސް އެކްސްޕޯޓްކުރުމަށް ބޯޓެއް ގެނެސްފައިވާއިރު، މިމަހުގެ ނިޔަލަށް ބޯޓްތައް ވަނީ ޝެޑިއުލްކޮށްފަ އެވެ. އަދި ކެރިއަރ ވެސެލްތައްވެސް ހަމަޖައްސަމުންދާކަމަށް މިފްކޯއިން ބުނެފައި ވެއެވެ. މިއީ، މެކްސިމަމްް ކެޕޭސިޓީގައި ފެސިލިޓީތަކަށް މަސްކިރަން އަވަހަށް ޖާގަ ހުސްކުރުމުގެ ގޮތުން އެޅި ފިޔަވަޅެކެވެ.
”މިއީ މަސްވެރިކަން މިހާ ބޮޑަށް އާދަޔާ ޚިލާފަށް ރަނގަޅު ދުވަސްވަރެއްގަ އާންމުކޮށް މިފްކޯއިން ނަގާ ޗެލެންޖެއް. އިރާދަކުރެއްވިއްޔާ މަސްވެރިންނަށް މަސް ކިރޭނެ އިންތިޒާމު ލުއިކުރުމަށް ކުރަންޖެހޭ ހުރިހައި މަސައްކަތެއް މި ކުންފުނިން ކުރަމުން ގެންދާނެ.“ މިފްކޯއިން ބުނެފައި ވެއެވެ.
މި އޮޕަރޭޝަނުގެ ދަށުން މިފްކޯއިން މިހާރު ވަނީ ކޫއްޑޫ ފިޝަރީޒް ކޮމްޕްލެކްސް(ކޭއެފްސީ) އަށް މަސް ކިރަން ކިއު ނަންބަރު މިހާތަނަށް ނަގާފަ ތިބި އޮޑިފަހަރުގެ ނަންބަރުތައް އަލުން ތަރުތީބުކޮށްފަ އެވެ. އެގޮތުން އަންނަ ހޮނިހިރު ދުވަހަށް މިއަދު ކިރާ ދޯނިތަކުގެ އަދަދު ނުލައި 18 އުޅަނދެއްވަނީ ކިއުގަ ޖައްސާފަ އެވެ، އަދި އާދީއްތަ ދުވަހަށް 6 އޮޑި ވަނީ ކިއުގަ ޖައްސާފަ އެވެ. މިފްކޯއިން ބުނީ އާދިއްތަދުވަހުގެ ނިޔަލަށް އެ އޮޑިތަކުގެ މަސް ކިރައި ނިމޭނެކަމަށެވެ.
މިފްކޯއިން ބުނީ، އައްޑޫ ފިޝަރީޒް ކޮމްޕްލެކްސް(ޢޭއެފްސީ)އަށް މަސްކިރަން މިހާތަނަށް ކިއު ނަންބަރު ނަގާފަ އޮތް 7 އޮޑިފަހަރަށް ވެސް އާދީއްތަ ދުވަހުގެ ނިޔަލަށް މަސް ކިރާލެވޭނެކަމަށެވެ. މިވަގުތު ފެލިވަރު ފިޝަރީޒް ކޮމްޕްލެސް(އެފްއެފްސީ)ގެ އެއްވެސް އޮޑިއެއް ކިއުގައި ނެތެވެ.
މިފްކޯއިން ވަނީ، މިއޮޕަރޭޝަން ކުރިޔަށް ގެންދިއުމުގައި އެކުންފުނީގެ ހީވާގި މުވައްޒަފުން ރެޔާ ދުވާލު ނުނިދައި މަސައްކަތުގައި ހަރަކާތްތެރިވަމުންދާތީ އެކަން ފާހަގަކޮށްފަ އެވެ.