މާލެ އުތުރުފަރާތު ފަޅުތެރޭ މަސްވެރިކަންކުރާ އުޅަނދުފަހަރަށް ޚާއްސަކޮށްފައިވާ ފަޅުތެރޭ ގަވައިދާ ޚިލާފަށް ދަތުރުނުކޮށް އަޅައިގެން ތިބޭ އުޅަނދުތައް ނަގަން މާލެ ސިޓީ ކައުންސިލުން މުހުލަތެއް ދީފި އެވެ.
މިކަން އާންމުކޮށް އަންގާ ސިޓީ ކައުންސިލުން މިއަދު ނެރުނު އިއުލާނެއްގައި ބުނެފައިވަނީ، މާލެއާއި ވިލިނގިލީގެ ފަޅު ބެލެހެއްޓުމާބެހޭ ޤަވާއިދާއި ޚިލާފަށް، އުޅަނދު ބަލަހައްޓާނެ ޒިންމާދާރު ފަރާތެއް ނެތި އެއްގޮތަކަށްވެސް ދަތުރުނުކޮށް ގިނަދުވަސްތަކެއް ވަންދެން ފަޅުތެރޭގެ އެކި ސަރަޙައްދުތަކުގައި އަޅާފައިހުރި އުޅަނދުފަހަރާއި، ރަޖިސްޓްރީ ނަމްބަރ އެއްގޮތަކަށްވެސް ނުޖަހާ ހުރި އުޅަނދުތައް ހިމެނޭގޮތުން 4 އުޅަނދެއް އެތާނގައި އަޅާފައިވާ އެބައޮތްކަމަށެވެ. އަދި އެ އުޅަނދު ފަހަރުގެ ސަބަބުން ފަޅުގެ ޤަވާޢިދާ އެއްގޮތަށް ހުއްދަ ނަގައިގެން ފަޅުބޭނުންކުރާ ފަރާތްތަކަށް ވަރަށް ބޮޑަށް ދަތިވަމުންދާކަމުގެ ޝަކުވާ ކައުންސިލަށް ލިބެމުންދާކަމަށް އިއުލާނުގައި ވެއެވެ.
ނަގަން އަންގާފައިވާ އުޅަނދުތަކުގެ ތަފުސީލު:
|
# |
އުޅަނދުގެ ރަޖިސްޓްރީ ނަމްބަރ |
އުޅަނދުގެ ނަން |
އުޅަނދު އަޅާފައިވާ ސަރަހައްދު |
|
1 |
P4020B.01.01B |
މުނިޔާ |
މާލޭ މަސްމާރުކޭޓް ކުރިމަތި ފަޅުގެ ބޭރުތޮށި ކައިރި |
|
2 |
P4034A.01.10N |
އުންމީދު |
މާލޭ މަސްމާރުކޭޓް ކުރިމަތި ފަޅުގެ ބޭރުތޮށި ކައިރި |
|
3 |
ރަޖިސްޓްރީ ނަމްބަރ ނުޖަހާ |
ނަން ނުޖަހާ |
މާލޭ މަސްމާރުކޭޓް ކުރިމަތި ފަޅުގެ ބޭރުތޮށި ކައިރި |
|
4 |
ރަޖިސްޓްރީ ނަމްބަރ ނުޖަހާ |
ނަން ނުޖަހާ |
މާލޭ މަސްމާރުކޭޓް ކުރިމަތި ފަޅުގެ ބޭރުތޮށި ކައިރި |
ކައުންސިލުން ބުނީ، މި އުޅަނދުތަކުގެ ވެރިފަރާތްތަކުން ނުވަތަ އުޅަނދު ބެލެހެއްޓުމަށް ޙަވާލުވެހުރި ފަރާތަކުން ކައުންސިލަށް ހާޒިރުވެ އެކަން އެންގުމަށްފަހު 10 ފެބުރުވަރީ 2025 ގެ ނިޔަލަށް، އުޅަނދު ނެގުމަށް އަންގާކަމަށެވެ.
”އުޅަނދާއި ބެހޭ ގޮތުން އުޅަނދުގެ ވެރިފަރާތުން ކައުންސިލަށް ހާޒިރުވާއިރު އުޅަނދުގެ ރަޖިސްޓްރީގެ ކޮޕީ އަކާއި، ވެރިފަރާތުގެ ދިވެހިރައްޔިތެއްކަން އަންގައިދޭ ކާޑުގެ ކޮޕީ އަކާއި، އުޅަނދު ބެލެހެއްޓުމަށް ހަވާލުވެހުރި ފަރާތުން ނަމަ އެފަރާތުގެ ދިވެހި ރައްޔިތެއްކަން އަންގައިދޭ ކާޑު ގެންނެވުމަށް ފަހު އުޅަނދާ ބެހޭ މައްސަލަ ނިންމަވާ އެ އުޅަނދުފަހަރުގެ ވެރިފަރާތްތަކުން އެއުޅަނދުފަހަރު މާލޭ ފަޅުން ނެންގެވުމަށް ދަންނަވަން“ ސިޓީ ކައުންސިލުން ބުނެފައި ވެއެވެ.
ސިޓީ ކައުންސިލުން ބުނީ، 10 ފެބުރުވަރީ ފަހުން ނުނަގާ ހުންނަ އެފަދަ އުޅަނދުފަހަރަކީ ބަލަހައްޓާނެ ފަރާތެއް ނެތި ފަޅުތެރެއަށް ދޫކޮށްލާފައި ހުރި އުޅަނދުފަހަރުކަމަށް ބަލައި، މާލެއާއި ވިލިނގިލީގެ ފަޅު ބެލެހެއްޓުމާބެހޭ ޤަވާއިދާ އެއްގޮތަށް އެ އުޅަނދު ފަހަރު ނަގާ އެފަދަ އުޅަނދުފަހަރު ބޭއްވުމަށް ވިލިމާލޭ ބަނދަރުން، ކަނޑައަޅާ ފައިވާ ސަރަހައްދަކަށް ގެންދާނެކަމަށެވެ. އަދި، އުޅަނދު ފަހަރު ނެގުމާއި، ގެންދިއުމުގެ ތެރޭގައި، އަދި ގެންގޮސް ބޭއްވުމަށް ފަހު އުޅަނދާއި، އުޅަނދުގައިވާ ތަކެއްޗަށް ލިބޭ ގެއްލުމަށް ޒިންމާ ނުވާނެކަމަށް ކައުންސިލުން ބުންޏެވެ.