މިދިޔަ އަހަރު ރާއްޖެއިން މަސް އެކްސްޕޯޓް ކުރި މިންވަރު ބޮޑުތަނުން ދަށަށް ހިނގައްޖެއެވެ.
މޯލްޑިވްސް މަނިޓަރީ އޮތޯރިޓީ(އެމްއެމްއޭ) އިން އާންމުކޮށްފައިވާ ތަފާސް ހިސާބުތަކަށް ބަލާއިރު، މިދިޔަ އަހަރު ރާއްޖެއިން އެކްސްޕޯޓްކޮށްފައިވަނީ 40,050.2 މެޓްރިކް ޓަނުގެ މަހެވެ. އަދި 2023 ވަނަ އަހަރު އެކްސްޕޯޓްކޮށްފައިވަނީ، 78,766.4 މެޓްރިކް ޓަނުގެ މަހެވެ. ދެއަހަރު އަޅާކިޔާއިރު، މިދިޔަ އަހަރުގެ އެކްސްޕޯޓް މިވަނީ %49.2 ދަށަށް ގޮސްފަ އެވެ.
މިދިޔަ އަހަރުގެ މަސް އެކްސްޕޯޓްގެ ތަފުސީލަށް ބަލާއިރު އެންމެ ގިނަ އަދަދަކަށް އެކްސްޕޯޓްކޮށްފައިވަނީ، ކަޅުބިލަމަހެވެ. މިދިޔަ އަހަރު 22,391.7 މެޓްރިކް ޓަނުގެ ކަޅުބިލަމަސް އެކްސްޕޯޓްކޮށްފައިވާއިރު، 9,331.3 މެޓްރިކް ޓަަނުގެ ކަންނެލި މަސް އެކްސްޕޯޓްކޮށްފައި ވެއެވެ. އަދި ދަޅު ނުވަތަ ޕޯޗްގެ ގޮތުގައި 5,811.8 މެޓްރިކް ތަނުގެ މަސް އެކްސްޕޯޓްކޮށްފައި ވެއެވެ.
މަސް އެކްސްޕޯޓްކުރި މިންވަރު ދަށްވެފައި މިވަނީ، މަސްވެރިކަން ދަށްވުމާއި، މަސްވެރިކަމުގެ ސިނާއަތުގައި ކުރިމަތިވި ތަފާތު އެކި މައްސަލަތަކާހުރެ މަހަށް ނިކުންނަ އޮޑިތައް މަދުވެ މަސްކިރާ މިންވަރު ދަށްވުމުގެ ސަބަބުންނެވެ. އެހެންނަމަވެސް، މިއަހަރު ފެށުނުއިރު މަސްވެރިކަން ރަނގަޅުވެ އަދި މަސް އޮޑިފަހަރުން ވިއްކާ މަހަށް ބަރާބަރަށް ފައިސާ ލިބެން ފެށުމާއެކު، ގިނަ އޮޑިތައް މަހަށް ނިކުމެ، މަސްކިރާ ނިސްބަތް ވަނީ ބޮޑު ތަނުން އިތުރުވެފައެވެ. އެހެންކަމުން މިއަހަރުގެ އެކްސްޕޯޓަށް ހެޔޮ ބަދަލެއް އަންނާނެކަމަށް ބެލެވެއެވެ.