އަންނަ މެއިމަހު ބޭއްވުމަށް ހަމަޖެހިފައިވާ ދިވެހީންގެ އުފެއްދުންތެރިކަމުގެ މައުރަޒު 2025ގެ ވާދަކުރުމުގެ ބައިގެ ތެރޭގައި މަސްވެރިކަމުގެ ދާއިރާ ހިމެނެއެވެ.
ރާއްޖޭގެ އުފެއްދުންތެރިކަން އިތުރުކޮށް ވިޔަފާރި ފުޅާކުރުމަށް ހިތްވަރުދިނުމުގެ ގޮތުން، މިނިސްޓްރީ އޮފް އިކޮނޮމިކް ޑިވެލޮޕްމެންޓް އެންޑް ޓްރޭޑްގެ އިސްނެގުމުގެ މަތިން އިންތިޒާމުކޮށްގެން ބޭއްވުމަށް ހަމަޖެހިފައިވާ މި މައުރަޒު އޮންނާނީ މެއި 23 އިން 31 ގެ ނިޔަލަށް ހުޅުމާލޭ ސެންޓްރަލް ޕާކްގައެވެ.
މި މައުރަޒުގައި ރާއްޖޭގެ އުފެއްދުންތެރިކަމުގެ މައިގަނޑު 14 ދާއިރާއަކުން ވާދަކުރުމުގެ ފުރުސަތު ހުޅުވާލާފައި ވެއެވެ. މިނިސްޓްރީން ބުނީ، މައުރަޒުގެ ވާދަކުރުމުގެ ބައިގެ ތެރެއިން މަސްވެރިކަމުގެ ދާއިރާއިން 4 ގިންތިއަކުން ކުރިމަތި ލެވޭނެކަމަށެވެ. އެއީ، މަހުގެ އުފެއްދުން(އަގުއެއްކޮށްގެން)، މަސްވެރިކަމުގެ ދާއިރާގެ އާ އުފެއްދުން، މަސްވެރިކަމުގެ އާލާތް(މެޝިނަރީޒް/ ޓޫލްސް) އަދި މަސްވެރިކަމުގެ އެހެނިހެން އުފެއްދުންތަކުގެ ގިންތި އެވެ.
މި މައުރަޒުގައި ވާދަކުރުމަށް ކަނޑައަޅާފައިވާ ދާއިރާތަކަށް ވަކިވަކިފަރުދުންނާއި، ރަށްރަށާއި ސިޓީތަކުގެ މަންދޫބުންނާއި، ރަޖިސްޓްރީކޮށްގެން ހިންގާ ވިޔަފާރިތަކަށާއި، ތައުލީމު އުގަންނައިދޭ މަރުކަޒުތަކުންނާއި، މަދަނީ ޖމްއިއްޔާ ޖަމާއަތްތަކުންނާއި، ނުކުޅެދުންތެރިކަން ހުންނަ ފަރާތްތަކަށް ބައިވެރިވެވޭނެއެވެ. މައުރަޒުގައި ބައިވެރިވުމުގެ ފުރުސަތު މިދިޔަ އަހަރުގެ ނޮވެމްބަރު މަހުގެ ތެރޭގައި ހުޅުވާލާފައިވާއިރު، މިހާރުވެސް އޮންލައިންކޮށް މައުރަޒުގައި ބައިވެރިވެވެއެވެ. މައުރަޒުގައި expo.mv ލިންކު މެދުވެރިކޮށް ރަޖިސްޓަރީ ކުރެވޭނެއެވެ.
މިމައުރަޒު އިންތިޒާމުކުރުމުގައި ހަރަކާތްތެރިވަމުން އަންނަ ބިޒްނެސް ސެންޓަރ ކޯޕަރޭޝަން(ބީސީސީ) އިން ބުނީ، މިއީ މިހާތަނަށް ރާއްޖޭގައި ބޭއްވެ މިފަދަ އެންމެ ބޮޑު މައުރަޒުކަމަށާއި، މިއީ އުފެއްދުންތެރިން ނުވަތަ ފަންނުވެރިންނާއި ވިޔަފާރިވެރިންނާއި އެއްތަނަކުން ބައްދަލުވެ، ވިޔަފާރިތަކާއި ގުޅުވާލަން ލިބޭ ވަރަށް ބޮޑު ފުރުސަތެކެވެ. މި މައުރަޒުގައި ފަންނުވެރިންގެ އުފެއްދުންތައް ދައްކާލާ ޕްރޮމޯޓްކޮށް ވިއްކުމުގެ ފުރުސަތުވެސް ލިބިގެންދާނެކަމަށް ބީސީސީން ބުންޏެވެ.