މިދިޔަ އަހަރުގެ ޑިސެންބަރު މަހު ދިވެހިރާއްޖެއިން އެންމެ ގިނައިން ބޭރު ގައުމުތަކަށް އެކްސްޕޯޓްކޮށްފައިވަނީ މަސްދަޅުކަން މޯލްޑިވްސް ކަސްޓަމްސްގެ ތަފާސް ހިސާބުތަކުން ދައްކައިފި އެވެ.
ކަސްޓަމްސް އިން އާންމުކޮށްފައިވާ ޑިސެންބަރުމަހުގެ އިމްޕޯޓް އެކްސްޕޯޓް ތަފާސް ހިސާބުތަކަށް ބަލާއިރު ރޯމަހާއި، މަހުގެ އުފެއްދުންތަކާއި އަދި އެހެނިހެން ބާވަތްތައް ހިމެނޭގޮތަށް ޖުމްލަ 116 މިލިއަން ރުފިޔާގެ މުދާ އެކްސްޕޯޓްކޮށްފައި ވެއެވެ. އޭގެ ތެރެއިން އެންމެ ގިނައިން ބޭރުކޮށްފައިވަނީ ދަޅުގައި ބަންދުކޮށްފައިވާ ކަޅުބިލަމަހެވެ. ޑިސެންބަރު މަހު 48 މިލިއަން ރުފިޔާގެ މަސްދަޅު އެކްސްޕޯޓްކޮށްފައިވާކަން ކަސްޓަމްސްގެ ހިސާބުތަކުން ދައްކައެވެ. މިދިޔަ އަހަރުގެ ނޮވެމްބަރުމަހު އެކްޕޯޓްކޮށްފައިވަނީ 41 މިލިއަން ރުފިޔާގެ މަސްދަޅެވެ. އެހެންކަމުން ދެމަސް އަޅާ ކިޔާއިރު މިއީ، 7 މިލިއަން ރުފިޔާގެ އިތުރުވުމެކެވެ.
އެކްސްޕޯޓްކުރި ރޯމަހުގެ ތަފްސީލަށް ބަލާއިރު، މިދިޔަ ޑިސެންބަރު މަހު ގަނޑުކޮށްފައި ހުރި 20 މިލިއަން ރުފިޔާގެ ކަޅު ބިލަމަސް އަދި 19 މިލިއަން ރުފިޔާގެ ކަންނެލި މަސް އެކްސްޕޯޓްކޮށްފައި ވެއެވެ. މީގެ އިތުރުން ފިނިކުރި ތާޒާ މަސްބުރިއާއި މަސްއަރި ހިމެނޭހެން ޖުމްލަ 10 މިލިއަން ރުފިޔާގެ ރޯ ކަންނެލި މަސް އެކްސްޕޯޓްކޮށްފައި ވެއެވެ. ޖުމްލަކޮށް ބަލާނަމަ ޑިސެމްބަރު މަހު އެކްސްޕޯޓްކޮށްފައިމިވަނީ 49 މިލިއަން ރުފިޔާގެ ރޯމަހެވެ.
ސަރުކާރުން މިހާރު އަމާޒު ހިފާފައިވަނީ ސީދާ ރޯމަސް އެކްސްޕޯޓްކުރުމުގެ ބަދަލުގައި ވެލިއު އެޑްކޮށްގެން މަސް އެކްސްޕޯޓްކުރާ މިންވަރު އިތުރުކުރުމަށެވެ. އެއީ، ތައްޔާރުކޮށް އަގުއެއްކޮށްގެން އެކްސްޕޯޓްކުރުމުން ބޭރުގެ މާކެޓްތަކަށް ބޮޑު އަގުގައި ވިއްކުމުގެ ފުރުސަތު ފަހިވެ، މަސް އެކްސްޕޯޓުން ލިބޭ ނަފާ އިތުރުކުރުމުގެ ބޭނުމުގަ އެވެ. އެކަމަށް މަގުފަހިކުރުމުގެ ގޮތުން ސަރުކާރުން ދަނީ މަސް ރައްކާކުރެވޭނެ ސްޓޯރޭޖްތައް އިތުރުކޮށް ޕްރޮސެސިން ކެޕޭސިޓީވެސް އިތުރުކުރުމަށް ގިނަ މަޝްރޫއުތަކެއް ހިންގަމުންނެވެ.