ރ. ފައިނުގެ ބަނދަރު ސަރަހައްދުން ތެލުގެ ވިޔަފާރިކުރުމަށް ބިމެއް ދޫކުރުމަށް ނިންމައި ބީލަމަށް ހުޅުވާލައިފި އެވެ.
ފައިނު ކައުންސިލުން ބުނީ، ތެލުގެ ވިޔަފާރި ކުރުމަށް ކުއްޔަށް ދޫކުރުމަށް ނިންމާފައިވަނީ އެރަށު ބަނދަރު ހުޅަނގު ސަރަޙައްދުން 1500 އަކަފޫޓްގެ ބިމެއް ކަމަށެވެ. އަދި އެކަމަށް ޝައުގުވެރިވާ ފަރާތްތަކަށް ބީލަން ހުށަހެޅުމުގެ ފުރުޞަތު އިއްޔެއިން ފެށިގެން ހުޅުވާލާފައިވާކަމަށެވެ.
ބީލަމުގައި ބައިވެރިވާން ބޭނުންވާ ފަރާތްތަކުން 23 ޖަނަވަރީ 2025 ވަނަ ދުވަހުގެ 13.00 ގެ ކުރިން، ”ބީލަމުގައި ރަޖިސްޓްރީވުމަށް އެދޭ ފޯމް“ ފުރުއްވުމަށްފަހު ކައުންސިލް އިދާރާގެ އީމެއިލް އީމެއިލް [email protected] ފޮނުއްވައިގެން ނުވަތަ ކައުންސިލް އިދާރާއަށް ގޮސް ފޯމް ހުށަހަޅައި ރަޖިސްޓްރީ ކުރުމަށް ކައުންސިލުން އެދިފައި ވެއެވެ. ކައުންސިލުންބުނީ، މިމަސައްކަތަށް ބީލަން ހުށަހެޅޭނީ ވިޔަފާރިކުރުމުގެ ޤާނޫނުގެ ދަށުން މިނިސްޓްރީ އޮފް އިކޮނޮމިކް ޑިވެލޮޕްމަންޓްގައި ރަޖިސްޓްރީކޮށްފައިވާ ފަރާތްތަކަށްކަމަށެވެ.
ބީލަމުގައި ބައިވެރިވެވެނީ 100 ރުފިޔާގެ ފީއެއް ދައްކައިގެންނެވެ. ބީލަން ބަލައިގަންނާނީ 30 ޖަނަވަރީ 2025 ދުވަހުގެ 13.00 ގެ ނިޔަލަށެވެ. އަދި ބީލަން ހުޅުވާނީ ހަމަ އެދުވަހުގެ 13:00 ގައި ކައުންސިލް އިދާރާގެ ޖަލްސާކުރާ މާލަމުގައި ކަމަށް ކައުންސިލުން ބުނެފައި ވެއެވެ.
ބީލަން ހުޅުވުން އޮންނާނީ ބީލަން ހުށަހަޅާ ފަރާތްތަކުގެ އެއް ހާޒިރުގައިކަމަށާއި، ބީލަން ހުށަހެޅުމަށް ބަދަލުގައި އެހެންފަރާތެއް ފޮނުވާނަމަ، އެކަން އަންގައިދޭ ސިޓީއެއް ހުށަހަޅަންވާނެކަމަށް ކައުންސިލުން ބުނެފައި ވެއެވެ. ބީލަމާ ގުޅޭގޮތުން އިތުރު މަޢުލޫމާތު ބޭނުންވާ ފަރާތްތަކުން ކައުންސިލް އިދާރާގެ ނަމްބަރު 4000311 އާއި ގުޅައިގެން ނުވަތަ އީމެއިލް [email protected] މެދުވެރިކޮށް މަޢުލޫމާތު ސާފުކުރުމަށް ކައުންސިލުން އެދިފައި ވެއެވެ.