ކޫއްޑޫ ފިޝަރީޒް ކޮމްޕްލެކްސް(ކޭއެފްސީ) އަށް ބޭނުންވާ ދަރު ސަޕްލައިކޮށްދޭނެ ފަރާތެއް ހޯދުމަށް ބީލަމަށް ހުޅުވާލައިފި އެވެ.
ކޭއެފްސީ ހިންގަމުން އަންނަ ސަރުކާރުގެ މަސް ކުންފުނި، މިފްކޯއިން މިއަދު އާންމުކުރި އިއުލާނެއްގައި ބުނެފައިވަނީ، ކޭއެފްސީގައި މަސްކެއްކުމަށް ބޭނުންވާ ދަރު ސަޕްލައި ކޮށްދޭން ބޭނުންވާ ފަރާތްތަކުން، ބިޑް ހުށަހަޅާނީ، 20 ޖަނަވަރީ 2025 ވާ ހޯމަ ދުވަހުގެ 14:00 ގެ ކުރިން، މިފްކޯގެ ސެކިއުއާރ އ-ީމެއިލް mv.mifco@contract އަށް ކަމަށެވެ. އަދި، ބީލަން ކަރުދާސް ހުށަހެޅުމުގެ ސުންގަޑީގެ ފަހުން ހުށަހަޅާ ބީލަން ކަރުދާސްތަކާއ،ި މަޢުލޫމާތު ފުރިހަމަނުވާ ބީލަން ކަރުދާސްތައް ބަލައިނުގަންނާނެކަމަށް މިފްކޯއިން ބުނެފައި ވެއެވެ.
ބިޑް ހުޅުވާނީ، މައިކްރޯސޮފްޓް ޓީމްސް މެދުވެރިކޮށް 20 ޖަނަވަރީ 2025 މެންދުރުފަހު 02:00 ގައި ކަމަށް މިފްކޯއިން ބުންޏެވެ. އަދި، ބިޑް ހުޅުވާ ބައްދަލުވުމުގައި ބައިވެރިވެވޭނީ 20 ޖަނަވަރީ 2025 ވާ ހޯމަ ދުވަހުގެ މެންދުރު 01:00 ގެ ކުރިން mv.mifco@bidއަށް އީމެއިލް މެދުވެރިކޮށް ރަޖިސްޓްރީ ކުރާ ފަރާތްތަކަށް އެކަނިކަމަށްވެސް މިފްކޯއިން ބުންޏެވެ. މިފްކޯއިން ބުނީ މިކަމާގުޅޭ އިތުރު މަޢުލޫމާތު ސާފުކުރަން ބޭނުންވާ ފަރާތްތަކަށް mv.mifco@bid އީ- މެއިލް މެދުވެރިކޮށް މުޢާމަލާތު ކުރެވޭނެކަމަށެވެ. އަދި، 9995235 ފޯނާ ގުޅާލުމުންވެސް މައުލޫމާތު ހިއްސާކުރެވޭނެކަމަށްވެސް މިފްކޯއިން ބުންޏެވެ.
ބިޑުން ހޮވޭ ފަރާތަކާއެކު އެގްރިމެންޓް ކުރެވޭނެ ދިގު މުއްދަތަކީ ގިނަވެގެން މީލާދި 1 (އެކެއް) އަހަރު ދުވަހުގެ މުއްދަތެއް ކަމަށާއި، ނަމަވެސް ކޫއްޑޫއިން ކަނޑައަޅާ ގޮތެއްގެ މަތިން ދަރު ސަޕްލައިކޮށް ނުދެވިއްޖެނަމަ، 14 (ސާދަ) ދުވަހުގެ މުއްދަތެއް ދިނުމަށްފަހު، އެގްރިމެންޓް ބާޠިލް ކުރެވިދާނެކަމަށް މިފްކޯއިން ބުންޏެވެ.
މިފްކޯއިން ބުނީ، ދަރު ސަޕްލައި ކޮށްދޭން ބޭނުންވާ ފަރާތުން ހުށަހަޅާ އަގަކ،ީ އެ ފަރާތެއްގެ އަމިއްލަ ޚަރަދުގައި ދަރު ހޯދައި ގއ. ކޫއްޑޫ އަށް ގެންގޮސް ކޫއްޑޫގެ ޖެޓީއަށް ހުސްކޮށްދިނުމަށް ހުށަހަޅާ އަގެއްކަމަށާއި، ދަރު ސަޕްލައި ކުރުމަށް ބޭނުންވާ ހުއްދަތައް ހޯދުމަކީ ސަޕްލައި ކޮށްދޭފަރާތުން ކުރަންޖެހޭ ކަމެއްކަމަށެވެ. އަދި، ދަރު ސަޕްލައި ކޮށްދޭ ފަރާތުން، ސަޕްލައި ކޮށްދޭ ދަރަކ،ީ ރާއްޖޭގެ ތިމާވެށި ހިމާޔަތް ކުރުމަށް ހެދިފައިވާ ޤާނޫންތަކާއި ޤަވާޢިދު ތަކާ އެއްގޮތްވާ ގޮތުގެމަތިން ހޯދާފައިވާ ދަރުކަން ސާބިތު ކޮށްދިނުމުގެ ގޮތުން، އ.ީއައ،ިއޭ ރިޕޯރޓް ނުވަތަ ރަށު ކައުންސިލް އިދާރާއިން ދޫކުރާ ލިޔުން ހުށަހަޅަންވާނެކަމަށެވެ.
މިފްކޯއިން ބުނީ، ދަރު ސަޕްލައި ކޮށްދޭފަރާތުން، ސަޕްލައި ކޮށްދޭ ދަރަކ،ީ ޑައިމީޓަރުގައި 3 އިންޗި އަށް ވުރެ ހިމަނޫން، ހަރު ދަރުކަމަށާއި، ދަރު ހުންނަންވާނީ ތިންފޫޓަށް ވުރެ ދިގު ނުވާގޮތަށް ބުރިކޮށްފައި ކަމަށެވެ. އަދި ބަނބުކެޔޮ، އަނބު، ޅޮސް، ކަނދު، ނިކަ، ރުއްލަކުޑ،ި ފަދަ ތަކެތި ހަރުދަރުގެ ތެރެއަކު ނުހިމެނޭނެކަމަށް މިފްކޯއިން ބުންޏެވެ.